1964 ވަނަ އަހަރު ޔޫރޯ ފުޓްބޯޅަ މުބާރާތް ސްޕެއިނުން ހޯދިއިރު އެޓީމުގައި ހިމެނުނު މުހިންމު ކުޅުންތެރިއަކު ކަމަށްވާ ލުއިސް ސުއަރޭޒް އުމުރުން 88 އަހަރުގައި މަރުވެއްޖެއެވެ.

ސްޕެއިންގެ ޑިޕޯޓިއޯ ލަކަރޫނިއާ އާއި ބާސެލޯނާގެ އިތުރުން އިޓަލީގެ އިންޓަ މިލާނާއި ސަމްޕްޑޯރިއާ އަށް ކުޅެފައިވާ ސުއަރޭޒް އަކީ 1960 ވަނަ އަހަރުގެ ބެލެންޑޯ އެވޯޑް ކާމިޔާބުކުރި ކުޅުންތެރިޔާ އެވެ. އަދި އޭނާ އަކީ މިހާތަނަށް މި އެވޯޑް ކާމިޔާބު ސްޕެއިންގެ ހަމައެކަނި ކުޅުންތެރިއާ ވެސް މެއެވެ.

އޭނާ ވަނީ އެފްސީ ބާސެލޯނާއާއެކު 2 ލީގު ތަށި، 2 ފެއާސް ކަޕް އަދި 2 ސްޕެނިޝް ކަޕް ކާމިޔާބުކޮށްފައެވެ. މީގެއިތުރުން އިންޓަ މިލާނާއެކު އޭނާ ވަނީ ޔޫރަޕިއަން ކަޕް 2ފަހަރު، އަދި އިންޓަކޮންޓިނެންޓަލް ކަޕް 2 ފަހަރު ހޯދުމުގެ އިތުރުން 3 އިޓާލިއަން ކަޕް ކާމިޔާބުކޮށްފައެވެ.

އޭނާ ވަނީ ސްޕެއިންގެ ގައުމީ ޓީމަށް 32 މެޗު ކުޅެދީ އެޓީމާއި އެކު 1964 ވަނަ އަހަރުގެ ޔޫރަޕިއަން ޗެމްޕިއަންޝިޕް ކާމިޔާބުކޮށްފަ އެވެ.

ލުއިސް ސުއަރޭޒް އަކީ 1988 ވަނަ އަހަރުން ފެށިގެން 1991 ވަނަ އަހަރާ ދެމެދު ސްޕެއިންގެ ގައުމީ ޓީމުގެ ކޯޗުކަމާއި 1986 ވަނަ އަހަރުގެ 21 އަހަރުން ދަށުގެ ޔޫރަޕިއަން ޗެމްޕިއަންޝިޕް ކާމިޔާބުކުރި ސްޕެއިންގެ 21 އަހަރުން ދަށުގެ ކޯޗެވެ.

މީގެއިތުރުން އޭނާ ވަނީ އިންޓަ މިލާން، ޔޫސީ ސަމްޕްޑޯރިއާ، ކޮމޯ 1907، ކަގްލިއާރީ ކަލްސިއޯ އަދި ޑިޕޯޓިވޯ ލަކޮރޫނިއާ ފަދަ ކްލަބްތަކަށް ކޯޗުކޮށްދީފަ އެވެ.