ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ސަރުކާރުން ޖުޑިޝަރީއަށް ނުފޫޒު ފޯރުވާކަމަށް އިންކާރު ނުކުރެވޭނެ ވަރުގެ ހެކިތައް ފެންނަން އެބަހުރިކަމަށް ކުރީގެ ނައިބު ރައީސް ޑރ މުޙައްމަދު ޖަމީލު އަހުމަދު ވިދާޅުވެއްޖެ އެވެ. 

ޑރ. ޖަމީލު ފޭސްބުކް ލިޔުއްވި ޕޯސްޓެއްގައި ވަނީ މި ސަރުކާރުން ޝަރުއީ ނިޒާމަށް ނުފޫޒުފޯރުވަން ކޮށްފައިވާ ބައެއް ކަންކަން ހާމަ ކުރައްވާފައެވެ.

އެގޮތުން ޓެރަރިޒަމްގެ ދައުވާ އުފުލާފައިވާ ކުރީގެ ނައިބު ރައީސް އަހުމަދު އަދީބުގެ މައްޗަށް އެދައުވާ ނުއުފުލާނެކަމަށް އެއްބަސްވުންހަދާ އެކުށްތައް އޮތްބާލަން މަސައްކަތް ކޮށްފައިވާ ކަމަށް ޑރ. ޖަމީލު ވިދާޅުވިއެވެ. އަދި އަދީބާއެކު އެފަދައިން އެއްބަސްވުން ހެދީ ރައީސް ޔާމިނާއި ދެކޮޅަށް ހެކިބަސް ދިނުމުގެ މުގާބިލުގައިކަން ޑރ ޖަމީލު ފާހަގަކުރެއްވި އެވެ.

Advertisement

ހަމައެއާއެކު، ޔޫތު މިނިސްޓަރު އަހްމަދު މަޙްލޫފަކީ ގާތް ވަޒީރަކަށްވާތީ އޭނާގެ މައްސަލަ ފޮރުވައިދިނުމާއި، ރައްޔިތުން މަޖިލީހުގެ މާފަންނު ހުޅަނގު ދާއިރާގެ މެމްބަރު ފަލާޙަކީ ގާތް ބޭފުޅަކަށް ވާތީ އޭނާގެ ދަރިފުޅުގެ މަސްތުވާތަކެތީގެ މައްސަލަ ހިންގިޔަ ނުދިނުމަކީ މި ސަރުކާރުން ޝަރުއީ ނިޒާމަށް ނުފޫޒު ފޯރުވާކަން ހާމަކޮށްދޭ ބައެއް މިސާލުތަކުގެ ގޮތުގައި ޑރ ޖަމީލު ވަނީ ލިސްޓުކުރައްވާފަ އެވެ. 

އޭގެ އިތުރުން މެމްބަރުންގެ ޖިންސީ ކުށްތަކުގެ ތުހުމަތު ނުބެލުމާއި، އެފަދަ އެތަކެއް ބައެއްގެ އެއްޖިންސުން ގުޅުން ހިންގުމުގެ ކުށުގެ މައްސަލައަށް ފަސްއަޅާ ފޮރުވައިދިނުން ވެސް އެ ލިސްޓުގައި ހިމެނޭ ކަމަށް ޑރ. ޖަމީލު ވިދާޅުވިއެވެ.

ޑރ. ޖަމީލު ވިދާޅުވީ ރައީސް ޔާމީނުގެ ވޮޑެމުލާ މައްސަލާގައި ފަނޑިޔާރު އަހުމަދު ހައިލަމަށް ބިރުދެއްކި ކަމަށް އޭނާ ބަޔާންނެރެފައިވުމާއި، 5 ފަނޑިޔާރުންގެ ބެންޗްގައި ހިމެނޭ ފަނޑިޔާރުންތަކަށް ބިރުދެއްކިކަމަށް އެމީހުން ބުނެފައިވާ އޯޑިއޯތަކާއި ތަކުރާރުކޮށް ރައީސް ޔާމީނަށް ދައުވާކުރުމަށް ހެކިއުފައްދުމާއި، ހެއްކަށް ރިޝްވަތު ހުށަހެޅާފައިވާކަމަށް ހެކިން ބުނެފައިވުމަކީ މި ސަރުކާރުން ޝަރުއީ ނިޒާމަށް ނުފޫޒު ފޯރުމަށް ކޮށްފައިވާ ކަންތައްތައް ކަމަށެވެ.

މީގެ އިތުރުން ވައްކަން އިންތިހާއަށް އިތުރުވެ، އިސްލާމްދީނަށް ފުރައްސާރަކުރި މީހާ ފުރުވާލަދީ، ދީނާއިދެކޮޅު ޙަރަކާތް ހިންގުމަށް މިނިވަންކަމާއެކު ދޫކޮށް އެކަމަށް އެހީތެރިވުން ޑރ. ޖަމީލު ފާހަގަކުރެއްވިއެވެ.

ޑރ. ޖަމީލު ވިދާޅުވީ ސަރުކާރުން ޝަރުއީ ނިޒާމަށް ނުފޫޒު ފޯރުވުމަށް ކުރާ ކަންކަމުގެ ލިސްޓު ވަރަށް ދިގު ކަމަށެވެ.

އެހެންކަމުން ރާއްޖޭގެ ތާރީޚުގައި ވެސް މި ފަސް އަހަރަކީ އިންސާފުގެ ނިޒާމަށް އަތްބޭނުމަށް ކޮށްފައިވާ މަސަކަތް ސާފުކޮށް ފެންނަން އޮތް ފަސް އަހަރު ކަމަށާއި އެކަންކަމަށް އިންކާރު ނުކުރެވޭނެ ހެކި މި މުއްދަތުގެ ތެރޭގައި ފެނިފައިވާ ކަމަށް ޑރ ޖަމީލު ވިދާޅުވި އެވެ.