މި ވެރިކަމަށް އައި އިރު، ދައުލަތުގެ އިދާރާތަކުގެ މެދުގައި މުއާމަލާތްކުރަން ބޭނުންކުރާ ޖެމްސް ނިޒާމު އޮތީ އައިސީޔޫގައި ކަމަށް، ޓެކްނޮލޮޖީ މިނިސްޓަރު އާމިނަތު ޝައުނާ ވިދާޅުވެއްޖެ އެވެ.
ދައުލަތުގެ ހުރިހާ އިދާރާއަކުން އާއްމުން ހިދުމަތް ހޯދޭ އޮންލައިން ޕޯޓަލް، "ވަންގަވް" ލޯންޗުކުރުމަށް އިއްޔެ ބޭއްވި ރަސްމިއްޔާތުގައި ވާހަކަ ދައްކަވަމުން ޝައުނާ ވިދާޅުވީ ސަރުކާރުގެ އެއް އިދާރާއިން އަނެއް އިދާރާއަށް ފޮނުވާ ސިޓީތައް ފޮނުވުމުގައި މާޒީގައި ގިނަ ތަކުލީފު ތަކެއް އުފުލަން ޖެހުނު ކަމަށެވެ.
2010 ވަނަ އަހަރު އެންމެ ފުރަތަަމަ ޖެމްސް ލޯންޗުކުރީ. އެހެން ނަމަވެސް އެ ޖެމްސް ގާތްގަނޑަކަށް އަޅުގަނޑުމެން ސަރުކާރާއި ހަވާލުވިއިރު އޮތީ އަޅުގަނޑު ދަންނަވާނީ އައިސީޔޫގައޭ. ސަރުކާރުގެ ސިޓީތައް ޑްރާފްޓް ކޮށްފައި، ސިޓީތައް ނުފޮނުވި ދެތިން ހަތަރު ދުވަސް ވާ ފަހަރުވެސް ހިނގައްޖެ. ވަޒީރުންވެސް ވެރިންވެސް އަޅުގަނޑަށް ވަރަށް ގިނަ ފޯން ކޯލްތައް ކުރޭ.
ޓެކްނޮލޮޖީ މިނިސްޓަރު އާމިނަތު ޝައުނާ
އެހެންކަމުން، އޭނާ ޓެކްނޮލޮޖީ މިނިސްޓަރުކަމަށް ވަޑައިގެން އެންމެ އިސްކަންދެއްވި އެއް ކަމަކީ ސަރުކާރަށް ފޮނުވާ ސިޓީތަކަށް އަވަހަށް ޖަވާބު ދިނުމުގައި ލުއި ފަސޭހަތަކެއް ހަމަޖައްސައިދީ ޖެމްސް އަޕްގްރޭޑް ކުރުމުގެ މަސައްކަތް ކޮށްފައިވާ ކަމަށް ޝައުނާ ވިދާޅުވިއެވެ.
މީގެ އިތުރުން ޖެމްސް އަދި އާއްމުންނަށް ހިދުމަތް ދޭ "ވަންގަވް" އާއެކު ޑިޖިޓަލް ރާއްޖެއަކަށް ދާއިރު މައުލޫމާތުގެ ރައްކާތެރިކަމަށް ވިސްނަންޖެހޭ ކަމަށް ވެސް މިނިސްޓަރު ވިދާޅުވި އެވެ. އެގޮތުން، ޑިޖިޓަލް ރާއްޖެއަށް ހެދުމަށް ކުރާ މަސައްކަތް ފުރިހަމަވާނީ ސައިބަ ސެކިއުރިޓީ ބިލާއި، ޑޭޓާ ޕްރައިވެސީ އަދި ޕްރޮޓެކްޝަން ބިލާއެކު ގާނޫނަށް ގެނެވޭ އިސްލާހާއި އެކު ކަމަށްވެސް ޝައުނާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
