އަލްޝާލީ މެރިން މޯލްޑިވްސް ގައްދޫ ފުޓްސަލް ޗެލެންޖު 2023 ގެ ފިރިހެން ޑިވިޝަނުގެ ފައިނަލުން ބޮއްކުރާ އަދި އުތުރުކޮޑާ ޖާގަހޯދައިފި އެވެ.

ބޮއްކުރާ ފައިނަލުގެ ޖާގައެއް ހޯދީ ރޭ ކުޅެވުނު ސެމީ ފައިނަލްގެ ފުރަތަމަ މެޗުގައި ފަސޭހަކަމާއި އެކު 6-0 ގެ ނަތީޖާއަކުން އެންދަޓާ އެފްސީ ބަލިކުރުމަށްފަހުގައެވެ. މި މެޗުގެ ފުރަތަަމަ ހާފުގައި ބޮއްކުރާ އިން 3 ލަނޑުގެ ލީޑެއް ހޯދިއިރު، ދެވަނަ ހާފުގައި އެޓީމުން ވަނީ އިތުރު ތިން ލަނޑު ކާމިޔާބުކޮށްފައެވެ.

އަލީ ހާފިޒް (ހާއްޕެ) ގައްދޫ ފުޓްސަލް ޗެލެންޖު 2023 ގައި ބޮއްކުރާ ޓީމަށް ކުޅެނީ... ފޮޓޯ: ޝަޖާއަތު އަހުމަދު/ ގާފު

މި މެޗުގައި ބޮއްކުރާގެ އަބްދުﷲ ޖުނައިދު ދެލަނޑު ކާމިޔާބުކުރިއިރު އެޓީމުގެ ހުސެއިން ޝަރީފް (އޮންލީ), އަލީ ހާފިޒު (ހާއްޕެ), އާލިމް އަބްދުލް އަޒީޒް (ޓޯރޭ), އަހުމަދު ރިފްޝާން ( ދޮންބެއްޔާ) މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ. މި މެޗުގެ މޭން އޮފް ދަ މެޗަކަށް ހޮވުނީ ބޮއްކުރާގެ ހުސެއިން ޝަރީފް އެވެ.

މިރޭ ކުޅެވުނު ސެމީ ފައިނަލުގެ ދެވަނަ މެޗުގައި ރިއަލްސީ އާއި އުތުރުކޮޑާ ވާދަކުރި ފޯރިގަދަ މެޗު 1-1 ގެ ނަތީޖާއަކުން އެއްވަރުވެ ނަތީޖާ ނެރުމަށްޓަކައި ޖެހި ޕެނަލްޓީގައި އުތުރުކޮޑާ ކުރިހޯދީ 4-5 ގެ ނަތީޖާއަކުން ނެވެ.

އިސްމާއިލް ވަޖީހު (ވައްޖެ) ގައްދޫ ފުޓްސަލް ޗެލެންޖު 2023 ގައި އުތުރުކޮޑާ ޓީމަށް ކުޅެނީ... ފޮޓޯ ޝަޖާއަތު އަހުމަދު/ ގާފު

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ އުތުރުކޮޑާ އިންނެވެ. މިލަނޑު ފުރަތަމަ ހާފުގެ 16 ވަނަ މިނެޓުގައި ކާމިޔާބުކޮށްދިނީ އެޓީމުގެ އަނޫ އަހުމަދު އެވެ. ރިއަލްސީ އިން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ އެންމެ ފަހު މިނެޓްގައި ކާމިޔާބުކޮށްދިނީ އެޓީމުގެ ނަދީމް މުހައްމަދު އެވެ.

ހުސެއިން ޝަރީފް (އޮންލީ) އަދި ސައިފާން ގައްދޫ ފުޓްސަލް ޗެލެންޖު 2023 ގައި ކުޅެނީ .... ފޮޓޯ: ޝަޖާއަތު އަހުމަދު/ ގާފު

ނަތީޖާ ނެރުމަށްޓަކައި ޖެހި ޕެނަލްޓީގައި އުތުރުކޮޑާގެ ފަސް ޕެނަލްޓީގެ ތެރެއިިން ހަތަރު ޕެނަލްޓީ އެޓީމުން ކާމިޔާބުކުރިއިރު ރިއަލްސީގެ ފަސް ޕެނަލްޓީގެ ތެރެއިިން އެޓީމަށް ކާމިޔާބު ކުރެވުނީ ދެ ޕެނަލްޓީއެވެ.

މި މެޗުގެ މޭން އޮފް ދަ މެޗަކަށް ހޮވުނީ އުތުރުކޮޑާގެ ގޯލްކީޕަރު ސަބާހް މުހައްމަދު އެވެ.

މުބާރާތުގެ ފައިނަލްގައި ބޮއްކުރާއާއި އުތުރުކޮޑާ ވާދަކުރަ މެޗު ކުޅުނަށް ހަމަޖެހިފައިވަނީ މި މަހުގެ 12 ވަނަ ދުވަހުގެ ރޭ 20:30 ގައެވެ.

ގައްދޫ ކައުންސިލްގެ މިއަހަރުގެ ފުޓްސަލް މުބާރާތުގައި ޖުމްލަ 15 ޓީމު ބައިވެރިވެފައިވާއިރު މުބާރާތް ކުރިއަށް ގެންގޮސްފައިވަނީ ތިން ޑިވިޝަނަކަށް ބަހާލައިގެންނެވެ. އެގޮތުން ފިރިހެން ޑިވިޝަންގައި 7 ޓީމު، އަދި އަންހެން ޑިވިޝަނާއި ޖޫނިއަރ ޑިވިޝަންގައި ކޮންމެ ޑިވިޝަނެއްގައި ހަތަރު ޓީމު ބައިވެރިވެފައިވެއެވެ.