އަލް ނަސްރުގެ ކޯޗުކަމާއި ޕޯޗުގަލްގެ ތަޖުރިބާކާރު ކޯޗު ލުއިސް ކާސްޓްރޯ ހަވާލުވިފަހުން އެޓީމު ކުޅުނު ފުރަތަަމަ މެޗުގައި މިރޭ ޕޯޗުގަލްގެ ދެވަނަ ޑިވިޝަންގެ ކުލަބެއްކަމަށްވާ އަލްވާކާ އަތުން 2-0 ގެ ނަތީޖާއަކުން އެޓީމު މޮޅުވެއްޖެއެވެ.

ކުރިއަށް އޮތް ސީޒަނަށް ތައްޔާރުވުމުގެ ގޮތުން ސައުދީ ޕްރޮފެޝަނަލް ލީގުގެ އަލް ނަސްރު އިން ޕްރީ ސީޒަން ޓްރޭނިންގ ފެށިއިރު އެޓީމުގެ ކެޕްޓަން ކްރިސްޓިއާނޯ ރޮނާލްޑޯ ޗުއްޓީގައި ހުރިއިރު، މިދިޔަ ޖޫން މަހު އިޓަލީގެ އިންޓަ މިލާނުން 18 މިލިއަން ޔޫރޯގެ ޓްރާންސްފާ ފީއެއްގައި އެޓީމާއި ގުޅުނު ކްރޮއޭޝިޔާގެ މިޑްފީލްޑަރު މާސެލޯ ބްރޮޒޮވިޗް ވެސް އެޓީމުގެ ފަރިތަކުރުންތަކުގައި އަދި ބައިވެރިއެއް ނުވެއެވެ.

މިރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މި މެޗުގައި އަލް ނަސްރުން ކާމިޔާބުކުރި ފުރަތަަމަ ލަނޑު ފުރަތަމަ ހާފު ފެށިގެން 7 ވަނަ މިނެޓުގައި ކާމިޔާބުކޮށްދިނީ ފޯވާޑް އަބްދުލް ފައްތާހު އާދަމް އެވެ. މިލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އަލް ނަސްރު ކުރީގައި އޮވެގެންނެވެ.

މެޗުގެ ދެވަަނަ ހާފުގައި އަލް ނަސްރުން ގިނަ ބަދަލުތަކަކާއެކު ކުޅެން ނުކުތްއިރު، މިހާފުގައި އެޓީމުން ވަނީ އަލްވާކާގެ ގޯލަށް ނުރައްކާތެރި ގިނަ ހަމަލާތަކެއް ފޮނުވާލާފައެވެ. މި މެޗުގައި އެޓީމުން ކާމިޔާބުކުރި ދެވަނަ ލަނޑު ފަހުހާފުގެ 59 ވަނަ މިނެޓުގައި ކާމިޔާބުކޮށްދިނީ ބްރެޒިލްގެ މިޑްފީލްޑަރު އެންޑަސަން ޓަލިސްކާ އެވެ. މިލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން އަލް ނަސްރު ކުރީގައި އޮވެގެންނެވެ.

ކުރިއަށް އޮތް ސީޒަނަށް ތައްޔާރުވުމުގެ ގޮތުން އަލް ނަސްރު އިން ޔޫރަޕްގެ ބޮޑެތި ކުޅަބުތަކާއި އެކު ގިނަ މެޗުތަކެއް ކުޅުމަށް ރާވާފައިވާ އިރު އޭގެތެރޭގައި މިމަހުގެ ފަހުކޮޅު ފްރާންސްގެ ޗެމްޕިއަން ޕީއެސްޖީގެ އިތުރުން އިޓަލީގެ އިންޓަ މިލާނާއި ދެކޮޅަށް ކުޅުމަށް ހަމަޖެހިފައިވާ ދެ މެޗު ވެސް ހިމެނެއެވެ.