އެމްޓީސީސީން ކުރިއަށް ގެންދާ ބިން ހިއްކުމުގެ މަޝްރޫޢު ތައް އަވަސް ކުރުމަށް އެ ކުންފުނިން ކުއްޔަށް ހިފި، ދުވާލަކު އެއް ހެކްޓަރުގެ ބިން ހިއްކުމުގެ ގާބިލްކަން ލިބިފައިވާ ޑްރެޖަރު ރާއްޖެ އަތުވެއްޖެއެވެ.
"ފިލީޕޯ ބްރޫނެލޭޝީ" ނަމަކަށް ކިޔާ މި ޑްރެޖަރަކީ ބެލްޖިއަމްގެ ކުންފުންފުންޏެއްގެ އުޅަނދެކެވެ. މި އުޅަނދު ކަސްޓަމްސް ކްލިއަރެންސަށް ހއ. އުލިގަމުގައި ބަނދަރުކޮށްފަ މި ވަގުތު އޮތް ނަމަވެސް އެކަން ނިމުމާއި އެކު ހއ. އިހަވަންދޫ ބިން ހިއްކުމަށް އެ ރަށަަށް ދާނެ ކަމަށް އެމްޓީސީސީން ބުނެއެވެ.
މިޑްރެޖަރުގެ އެހީގައި އިހަވަންދޫގައި ހިއްކުމަށް ހަމަޖެހިފައިވާ ސަރަޙައްދު 10 ދުވަހުގެ ތެރޭގައި ހިއްކާ ނިމޭނެކަމަށް އެމްޓީސީސީން ބުނެއެވެ. އަދި އިހަވަންދޫ ހިއްކާ ނިންމުމަށްފަހު މަތިކޮމަންޑޫ ހިއްކުމުގެ މަސައްކަތް ފަށާނެކަމަށް އެމްޓީސީސީން ބުނެއެވެ.
މީގެ އިތުރުން، ބޮޑުފުޅަދޫއާއި ފީއަލި އާއި، އުކުޅަހާއި ދިއްގަރާއި އުގޫފާރުވެސް ހިއްކުމަށް ހަމަޖެހިފައިވަނީ މި ޑްރެޖަރު ގައި ކަމަށް އެމްޓީސީސީން ބުނެއެވެ. އެމްޓީސީސީން ބުނީ މިރަށްތަކުގެ އިތުރުންވެސް ބައެއް ރަށްތައް ހިއްކުމުގެ މަސައްކަތްއްވެސް އެ ޑްރެޖަރ ބޭނުންކޮށްގެން ކުރިއަށް ގެންދާނެކަމަށެވެ.
ދިގުމިނުގައި 142.5 މީޓަރު (467 ފޫޓް) އަދި ފުޅާ މިނުގައި 27.5 މީޓަރު (90 ފޫޓް) ހުންނަ މި އުޅަނދަކީ 11،300 ކިއުބިކް މީޓަރުގެ ހޮޕަ ކެޕޭސިޓީ (އެއްފަހަރާ ލޯޑްކުރުމުގެ ގާބިލްކަން) ލިބިފައިވާ އެއްޗެކެވެ.
"ފިލީޕޯ ބްރޫނެލޭޝީ" އަކީ 2003 ބަނދެފައިވާ އުޅަނދެކެވެ. އެމްޓީސީސީން މި އުޅަނދު ކުއްޔަށް ހިފާފައި ވަނީ، ބިންހިއްކުމުގެ މަސައްކަތް ކުރުމުގައި އެ ކުންފުނިން ބޭނުންކުރާ އެއް ޑްރެޖަރު ހަލާކުވެގެންނެވެ. އެ ޑްރެޖަރު މިހާރުވެސް އަންނަނީ ދުބާއީގައި މަރާމާތުކުރަމުންނެވެ.
Advertisement
This content is created and paid for by advertisers and does not involve Voice Journalists
