އެމަނިކުފާނުގެ ހަޔާތުގައިވެސް މިހާތަނަށް ރަނގަޅު އެއްވެސް މީހަކާ ދިމާ ނުވާ ކަމަށާ، އެހެން ކަމުން ރަނގަޅު މީހެއް ހޯދުމުގެ ބަދަލުގައި އޮންނަންވީ، ގޯސް މީހާއަށް ވެސް ނުބައެއް ނުހެދޭނެ ވަރުގެ ނިޒާމެއް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ގާނޫނު އަސާސީއަށް ގެންނަން ފެންނަ ބައެއް ނިޒާމީ ބަދަލުތަކާ ގުޅޭ ގޮތުން ދަ ޑިމޮކްރެޓްސްގެ މެންބަރުންނާ އެކު ރޭ ބޭއްވި ބައްދަލުވުމެއްގައި ވާހަކަދައްކަވަމުން ވިދާޅުވީ، ބައެއް ޕާޓީ ތަކުން، އެހެން ޕާޓީ ތަކުގައި ކެންޑިޑޭޓެއް ނެތް ވާހަކަ ދައްކަވާ ކަމަށެވެ. އެހެން ނަމަވެސް، އެމަނިކުފާނަށް ފެންނަ ފެނުމުގައި ކެންޑިޑޭޓަށްވުރެ މުހިންމީ ސިޔާސަތު ކަން ފާހަގަކުރައްވައި ވިދާޅުވީ ރަނގަޅު ސިޔާސަތެއް އެކުލަވާލެވިފައިވާ ޕާޓީއެއް ނެތް ކަމަށެވެ.

އެހެންވެ، މިހާރު "ރަނގަޅު މީހެއް" ހޯދަން މަސައްކަތް ނުކުރައްވާ ކަމަށާއި ބޭނުންފުޅު ވަނީ ރަނގަޅު ނިޒާމެއް ކަމަށް އެ މަނިކުފާނު ތަކުރާރުކޮށް ވިދާޅުވިއެވެ.

އޭގެ މިސާލެއް ދައްކަވަމުން އެ މަނިކުފާނު ވިދާޅުވީ އިނގިރޭސިވިލާތުގެ ކުރީގެ ބޮޑުވަޒީރު ބޮރިސް ޖޯންސަން އިސްތިއުފާ ދެއްވީ އޭނާގެ ރަނގަޅުކަމުން ނޫން ކަމަށެވެ. އެއީ، އެ ގައުމުގައި އެކަން އެހެން ނުކޮށް ވާން ނެތުމުން ކަމަށް ނަޝީދު ވިދާޅުވިއެވެ.

އެހެންވެ، މި އަހަރުގެ ރިޔާސީ އިންތިޚާބަށް ނުކުންނައިރުގައި ކުރަންވީ ކަމަކީ "ކޮންކްރީޓް ތަރައްގީ" ގެނައުން ނޫން ކަމަށާއި އުޅެންވީ، ހެޔޮ ވެރިކަމުގެ ނިޒާމެއް ގާއިމް ކުރެވޭތޯ ކަމަށް އެ މަނިކުފާނު ވިދާޅުވިއެވެ.