ތާރުއަޅައިގެން ރީތިކޮށް ހަދާފައިވާ މަގުތައް ބޭނުން ނުކުރުމުގެ ސަބަބުން ހަލާކުވެފައިވާ ރަށްތަށް ވެސް ރާއްޖޭގައި އެބަހުރިކަމަށް މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެ އެވެ. 

ނަޝީދު މިފަދައިން ވިދާޅުވެފައި ވަނީ ޤާނޫނު އަސާސީއަށް ގެންނަން ފެންނަ ނިޒާމީ ބަދަލުތަކާއި ގުޅޭގޮތުން މަޝްވަރާކުރުމަށް ދަ ޑިމޮކްރެޓްސްގެ ޖަގަހައިގައި ކުރިއަށް ގެންދިޔަ މަޝްވަރާ ބައްދަލުވުމުގައި ވާހަކަދައްކަވަމުން ނެވެ. 

ނަޝީދު ވިދާޅުވީ ޓެކްސް ނިޒާމުގެ ތެރެއިން ދައުލަތަށް ވަންނަ އާމްދަނީ މިހާރު ވަރަށް ބޮޑަށް އިތުރުވެފައިވާ ކަމަށެވެ. އަދި އާމްދަނީގެ އިތުރުންވެސް ބޮޑެތި ލޯނުތައް ވެސް ސަރުކާރުން ނަގަމުންދާ ކަމަށާއި، މިހާލަތުގައި ފައިސާ ބޭނުން ކުރެވެނީ ނުވަތަ ޚަރަދު ކުރެވެނީ އެންމެ ރަނގަޅަށް ތޯ ބަލާލުން މުހިންމު ކަމަށެވެ. 

Advertisement

އެގޮތުން ތަރައްގީ ކުރުމުގެ ނަމުގައި މަޝްރޫއުތަކެއް ހިންގާއިރު، އެ ހިންގާ މަޝްރޫއަކީ ދެމެހެއްޓެނިވި ގޮތެއްގައި ފައިދާކުރަނިވި މަޝްރޫއުތެއް ތޯ ވެސް މިހާރު ބަލާ ނުލެވޭކަމަށް ނަޝީދު ވިދާޅުވި އެވެ. 

މި ސަރުކާރުން ގެންގުޅޭ ކުޑަ ރަށެއް ބޮޑު ރަށެއް ނުބަލާ ތަރައްގީ ކުރާ ސިޔާސަތުގެ ތެރެއިން ކުރަމުންދާ ބައެއް ކަންކަމުން އެކަށީގެންވާ ނަތީޖާތަކެއް ނުނިކުންނަ ކަމަށާއި، އަދި ބޮޑު ޚަރަދުކޮށްގެން ހިންގާ ބައެއް މަޝްރޫއުތަކުގެ ބޭނުން ރައްޔިތުންނަށް ނުހިފޭކަމަށް ނަޝީދު ވިދާޅުވި އެވެ. 

މިސާލެއް ދައްކަވަމުން ނަޝީދު ވިދާޅުވީ ބޮޑު ޚަރަދުކޮށްގެން ހަދާފައިވާ މަގުތައް ބޭނުން ނުކުރުމުގެ ސަބަބުން ހަލާކުވެފައިވާ ރަށްތައް ވެސް ރާއްޖޭގައި ހުރި ކަމަށެވެ. 

ނަޝީދު ވިދާޅުވީ ފައިސާ އަތުގައި ޖެހުނީމަ ކޮންކްރިޓް އަޅާ އުސޫލު މަޑުޖައްސާލަން ޖެހޭކަމަށެވެ. އަދި ރާއްޖެ ގެންދަން މަސައްކަތް ކުރާ މިސްރާބާއި، އެ މިސްރާބުން ގެންދާއިރު ދެވޭނެ މަންޒިލަކީ ކޮބައިތޯ އާއި ހާސިލުވާނެ ނަތީޖާއަކީ ކޮބައިތޯ ބަލާ ދިރާސާކުރުން ވެސް މުހިންމު ކަމަށެވެ. 

ރައީސް ނަޝީދަކީ ތަރައްގީގެ ނަމުގައި ހަމައެކަނި އުސް އިމާރާތްތައް ހެދުމާއި ދެކޮޅު ބޭފުޅެކެވެ. ތަރައްގީއަކީ މީހުންގެ ވިސްނުމަށް އަންނަ ބަދަލުތައް ކަމަށާއި، އެންމެ ފުރަތަމަ ތަރައްގީ ކުރަންވީ މީހާ ކަމަށް ނަޝީދު ގެންދަވަނީ މީގެ ކުރިންވެސް ވަކާލާތު ކުރައްވާފަ އެވެ. 

ނަޝީދު ވިދާޅުވެފައި ވަނީ ރާއްޖެ ގެންދަން މި އުޅޭ މިސްރާބު ސާފުނުވެ ލިބޭ ފައިސާ ކޮންކުރިޓަށް ޚަރަދުކޮށްގެން ނެރެވޭނެ މާ ބޮޑު ނަތީޖާއަކެއް ނޯންނާނެ ކަމަށެވެ. އަދި ދިވެހިރާއްޖެ ތަރައްގީ ކުރަންވީ ގޮތާއި ގުޅޭގޮތުން ވަރަށް ފުން ވިސްނުމަކަށް ދާން ޖެހޭކަމަށް ނަޝީދު ވަނީ ވިދާޅުވެފަ އެވެ.