މިހާރު ކުރިއަށްދާ ކޮންކްރިޓް މަސައްކަތްތައް ހުއްޓާލާފައި ނިޒާމީ މަސައްކަތް ފަށަން ވެއްޖެ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ ރޭ ޑިމޮކްރެޓްސްއިން ބޭއްވި މަޝްވަރާ ބައްދަލުވުމެއްގައި ވާހަކަ ދައްކަވަމުންނެވެ.
"އަޅުގަނޑު ދެކޭގޮތުގައި ފުޓްސަލް ދަނޑު އެޅުންވެސް ހުއްޓާލަންވެއްޖެ، މަލްޓީޕާޕަސް ހޯލްވެސް، އެކިޔާ ހުރިހާ ކޮންކްރިޓެއް މަޑުޖައްސާލާފަ، ވިސްނާލަން ވެއްޖެ އަޅުގަނޑުމެން، ދެން ކޮންތާކަށް ތޯ ދާން މިއުޅެނީ، ކިހިނެއްތޯ ވާން މިއުޅެނީ، އެތައް ބިލިއަން ރުފިޔާއެއްގެ ފައިސާ، މިހާރު އާމްދަނީ އިތުރުވީމަ، ޓެކްސް އާމްދަނީ އިން އާމްދަނީ އިންތިހާއަށް އިތުރުވެއްޖެ، ދެން ހަމަ ރާސްރާސް އަޅައިގައި ބިލިއަނުން ރުފިޔާ ހަރަދު މިކުރަނީ،، ދެން ގިނަ ރުފިޔާ ނުވެއް ނެތް، ދަރަންޏަށް ނަގައިގެން ލިބުނު ގޮތަކަށް ހޯދައިގެން، މިހާބޮޑުކޮށް މިކަން ވަމުންދާއިރުގައި، އަޅުގަނޑު ދެކޭގޮތުގައި މިފަހަރުގެ ރިޔާސީ އިންތިޚާބުގައި އަޅުގަނޑުމެން ދައްކަމުންދާންވީ ވާހަކައަކީ ކިހިންއްހޭ މިވަނީ، ކޮންތާކަށްހޭ އަޅުގަނޑުމެންގެ ރާއްޖޭ ދާން މިއުޅެނީ، މިދާ މަގުން ދިޔައިމާ އަޅުގަނޑުމެންނަށް ކޮންތާކަށްތޯއޭ ދެވޭނީ"
ރައީސް ނަޝީދު ވިދާޅުވިއެވެ.
ރައީސް ނަޝީދުގެ ވާހަކައިގައި ވިދާޅުވީ މަގުހެދުން ފަދަ ކަންކަމުގެ ބަދަލުގައި ދައްކަންވީ ނިޒާމީ ވާހަކަތައް ކަމަށް އެމަނިކުފާނު ޤަބޫލް ކުރައްވާކަމަށެވެ.
ރައީސް ނަޝީދު ވިދާޅުވީ އެހެން ކެނޑިޑޭޓަކު ސިޔާސަތެއް ހުށައަޅުއްވާން އުޅޭ ވާހަކަ ދައްކަވާ ވާހަކަ އަޑުއިވިލައްވާފައި ނުވާ ކަމަށެވެ. އަދި އެހެން ޕާޓީތަކުން ޑިމޮކްރެޓްސްގެ ކެނޑިޑޭޓަކު ނެތް ވާހަކަ ދައްކާކަމަށާއި ނަމަވެސް އެމަނިކުފާނު ދެކިލައްވާ ގޮތުގައި މުހިންމީ ކެނޑިޑޭޓެއް ނޫން ކަމަށާއި، މުހިންމުވަނީ ސިޔާސަތު ކަމަށެވެ. ކޮންމެ މީހަކު ލީނަމަވެސް ވަނީ ގޯސް ކަމަށާއި އަދިއެއް ރަނގަޅުމީހަކު ވެރިކަމަށް ނުލެވޭ ކަމަށް އެމަނިކުފާނު ވިދާޅުވިއެވެ.
"އަޅުގަނޑުމެން މިއުޅެނީ ގޯސްމީހާއަށްވެސް ރަނގަޅުކަމެއް ނޫން ކަމެއް ނުކުރެވޭނެ ނިޒާމެއް ތައްޔާރުކުރަން"
ރައީސް ނަޝީދު ވިދާޅުވިއެވެ.
ނަޝީދުގެ ވާހަކައިގި ވިދާޅުވީ ޔޫރަޕްގެ ޤައުމުތަކުގައިވެސް ކަންކަން ރަނގަޅަށް ދަނީ މީހާ ރަނގަޅުވެގެން ނޫން ކަމަށާއި ނިޒާމު ރަނގަޅުވެގެން ކަމަށެވެ.
ރޭ ކުރިއަށްދިޔަ ޑިމޮކްރެޓްސްގެ މަޝްވަރާ ބައްދަލުވުމުގައި ރައްޔިތުންގެ މަޖިލިސް އެކުލަވާލާނެ އައު ނިޒާމެއްގެ ކަރުދާސް ރައީސް ނަޝީދު ވަނީ ހުށައަޅުއްވައިފައެވެ. އަދި ބައްދަލުވުމަށް ހާޒިރުވެތިބި ޢާންމުންވެސް ވަނީ ޚިޔާލު ފާޅުކޮށްފައެވެ.
Advertisement
This content is created and paid for by advertisers and does not involve Voice Journalists
