ޕީޕީއެމްގެ ރިރާސީ ކެންޑިޑޭޓު ކުރީގެ ރައީސް އަބްދުالله ޔާމީން އަބްދުލްގައްޔޫމު ޖަލުގައި އޮންނެވުމަކީ ޤައުމަށް އެންމެ ރަނގަޅުގޮތް ކަމަށް ޤަބޫލުނުކުރާ ކަމަށް މި ސަރުކާރުގެ ފުރަތަމަ ޓުއަރިޒަމް މިނިސްޓަރު އަލީ ވަހީދު ބުނެފި އެވެ.

އަލީ ވަހީދު މިފަދައިން ބުނެފައި ވަނީ ވަނީ އޭނާގެ މައްޗަށް އުފުލާފައިވާ ޖިންސީ ފުރައްސާރައިގެ ދައުވާތައް އަނބުރާ ގެނައުމުން، އިނގިރޭސި ވިލާތުގައި ހުރުމަށްފަހު އެނބުރި ރާއްޖެ އައިސް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ނެވެ. 

އަލީ ވަހީދު ބުނީ އެމްއެމްޕީއާރުސީގެ ޚިޔާނާތުގެ މައްސަލައިގައި "ސެލެކްޓިވް ޖަސްޓިސް" ގެ އުސޫލު ގެންގުޅުމަކީ އިންސާފުކަމަށް ނުދެކޭ ކަމަށެވެ. 

Advertisement

އެގޮތުން އެ މައްސަލައިގައި ހަމައެކަނި ރައީސް ޔާމިނަށް ދައުވާކުރުމަކީ އިންސާފުކަމަށް ގަބޫލު ނުކުރާ ކަމަށާއި، އެމަނިކުފާނު ޖަލުގައި އޮންނެވުމަކީ ވެސް ގައުމަށް އެންމެ ފައިދާ ހުރި ގޮތްކަމަށް ޤަބޫލުނުކުރާ ކަމަށް އަލީ ވަހީދު ބުންޏެވެ. އަދި ރިޔާސީ އިންތިޚާބުގައި ވާދަކުރުމުގެ ފުރުސަތު އެންމެންނަށް ވެސް ލިބެން ޖެހޭނެކަމަށް އަލީ ވަހީދު ވަނީ ބުނެފައެވެ. 

އަލީ ވަހީދު ވަނީ އޭނާގެ މައްޗަށް އުފުލި ދައުވާތަކަކީވެސް ސިޔާސީ ދައުވާތަކެއް ކަމަށާއި، އެއީ އޭނާ ނިޒާމުން ނައްތާލަން ކުރި ކަމެއްކަމަށް ބުނެފަ އެވެ. 

އޭނާ ފްރޭމްކުރީ ރައީސް ޔާމީން ނުވަތަ ޕީޕީއެމް އަޑީގައި އޮވެގެން ނޫން ކަމަށާއި، އެ ތުހުމަތުތަކާއި ގުޅިގެން ރާއްޖެއިން ބޭރުގައި ހުންނަން ޖެހުނު ދުވަސްވަރު ރައީސް ޔާމީން ބެހެއްޓެވި ގާތްކަމަށް އަލީވަހީދު ވަނީ ޝުކުރުވެސް އަދާކޮށްފަ އެވެ. 

އަލީ ވަހީދު ވަނީ އެމްއެމްޕީއާރުސީގެ މައްސަލައިން ސިޔާސީ މަންފާ ހޯދުމަށް މަސައްކަތް ކުރާކަމަށް ތުހުމަތުކޮށްފަ އެވެ. އަދި އެ މައްސަލަ މިހާރު އޮތް ގޮތުން އިންސާފުވެރި ކަމާއެކު ބެލިދާނެ ކަމާމެދުވެސް ސުވާލު އުފެދޭކަމަށް އަލީވަހީދު ބުންޏެވެ.