ދިވެހިރާއްޖެއާއި އިންޑިޔާއާއި ދެމެދު 9 އެއްބަސްވުމެއްގައި ސޮއިކޮށްފިއެވެ.

ރާއްޖެއާއި އިންޑިޔާއާއި ދެމެދު މިއަދު ސޮއި ކުރެވުނު އެއްބަސްވުންތަކަކީ ދެޤައުމުގެ ދެމެދުގައި ހައި އިމްޕެކްޓް ޑިވެލޮޕްމެންޓް ޕްރޮޖެކްޓްސްގެ ދެވަނަ ފިޔަވަހީގެ ދަށުން ކުރެވުނު އެއްބަސްވުން ތަކެކެވެ.

މި އެއްބަސްވުންތަކުގައި ސޮއި ކޮށްފައިވަނީ ރާއްޖޭގެ ފޮރިން މިނިސްޓަރ އަބުދުالله ޝާހިދު މިހާރު އިންޑިޔާއަށް ކުރައްވާ ދަތުރުގެ ތެރެއިން ނެވެ.

މިއަދު ސޮއިކުރެވުނު އެއްބަސްވުންތަކުގެ ތެރޭގައި ހިމެނޭ އެއް ކަމަކީ ށ.ކަނޑިތީމުގައި ވޮލީކޯޓެއް ޤާއިމްކުރުމުގެ މަސައްކަތެވެ. ޚާރިޖީ ވަޒީރު އަބުދުالله ޝާހިދު ވިދާޅުވެފައިވަނީ ކަނޑިތީމުގައި ޤާއިމް ކުރުމަށް ހަމަޖެހުނު ވޮލީ ކޯޓުގެ ސަބަބުން މުޖުތަމަޢުގައި ކުޅިވަރާއި ޞިއްޙީ ދުޅަހެޔޮ ވާދަވެރިކަން ކުރިއަރައިގެންދާނެކަމަށެވެ. 

މިއަދު ސޮއި ކުރެވުނު ދެވަނަ އެއްބަސްވުމަކީ އިންޑިއާގެ ހިލޭ އެހީގެ ދަށުން ރ.އުނގޫފާރު ހޮސްޕިޓަލުގައި ޤާއިމްކުރެވިގެންދާނެ އާ މެންޓަލް ހެލްތު ޔުނިޓު ޤާއިމްކުރުމުގެ އެއްބަސްވުމެވެ. ވަޒީރު ޝާހިދު ވިދާޅުވެފައިވަނީ މިތަނުގެ ސަބަބުން ރައްޔިތުންގެ ނަފްސާނީ ދުޅަހެޔޮކަމަށް ފޯރުކޮށްދޭ ޚިދުމަތްތައް ފަހިވެގެންދާނެކަމަށެވެ.

ތިންވަނަ އެއްބަސްވުމެއްގެ ގޮތުގައި ސޮއިކުރެވިފައިވަނީ މ.ދިއްގަރުގައި ޤާއިމްކުރެވިގެންދާނެ ގޭދޮށު މަސް ޕްލާންޓު ޤާއިމް ކުރުމުގެ އެއްބަސްވުމެވެ. މިކަމާއި ބެހޭގޮތުން ޝާހިދު ވިދާޅުވެފައިވަނީ މިކަމުގެ ސަބަބުން ދެމެހެއްޓެނިވި ގޮތެއްގައި ބާނާ މަސް އެކި ބާވަތުގެ ތައްޔާރީ ކާނާގެ ގޮތުގައި ބާޒާރަށް ނެރުމަށް  ރައްޔިތުންނަށް ދިމާވާ ގިނަ މައްސަލަތަކެއް ހައްލުވެގެންދާނެކަމަށެވެ.

މީގެ އިތުރު ށ.ފޯކައިދޫގައި އިންޑިއާގެ ހިލޭ އެހީގެ ދަށުން ބިނާ ކުރެވިފައިވާ ކޮމިއުނިޓީ ސެންޓަރަށް ބޭނުންވާ ވަޞީލަތްތައް ފުރިހަމަ ކުރުމުގެ އެއްބަސްވުމާއި، އުތީމު ގަނޑުވަރުގެ ފުރާޅު ރައްކާތެރި ކުރުމަށާއި އެސަރަޙައްދު ތަރައްޤީ ކުރުމަށް އެއްބަސްވެވުނު އެއްބަސްވުމާއި، ގއ ކޮނޑޭ މަގު ބައްތި ޖެހުމުގެ ޕްރޮޖެކްޓް ހިންގުމަށް އިންޑިއާ އާއެކު ވެވުނު އެއްބަސްވުން ހިމެނެއެވެ.

މީގެ އިތުރުން ފ.ނިލަންދޫ ހޮސްޕިޓަލް އަޕްގްރޭޑްކުރުމުގެ މަޝްރޫޢު ވެސް ހިމެނެއެވެ. މިކަމާއި ގުޅޭގޮތުން ވަޒީރު ޝާހިދު ވިދާޅުވީ ސަރުކާރުގެ މުހިންމު މަޝްރޫއެއް ކަމަށްވާ ފ.ނިލަންދޫ ހޮސްޕިޓަލް އަޕްގްރޭޑްކުރުމާ ގުޅޭގޮތުން އިއްޑިޔާއެކު ބަދަލުކުރެވުނު އެމް.އޯ.ޔޫގެ ދަށުން ހިންގޭ މަޝްރޫޢަކީ ޑަޔަލިސިސްގެ ޚިދުމަތް މާލެ ދަތުރުނުކޮށް ލިބޭނޭ މަގެއް ޤާއިމު ކުރެވިގެންދާނެ މަޝްރޫޢެއްކަމަށެވެ.

މީގެ އިތުރުން ތ. ވިލުފުށީ ސުކޫލުގައި ސުކޫލް ޑިޖިޓަލައިޒޭޝަން ޕްރޮޖެކްޓެއް ހިންގުމާއި، ސަރުކާރު ސުކޫލުތަކުގެ ކޮމްޕިއުޓާ ލެބްތައް އަޕްގްރޭޑް ކުރުމުގެ  އެއްބަސްވުމުގައި ސޮއިކުރެވިފައިވެއެވެ.