ދިވެހި އަދަބިއްޔާތައް ގިނަގުނަ ޚިދްމަތްތަކެއް ކޮށްދެއްވި އާމިނަތު ޢައްބާސް ނިޔާވެއްޖެއެވެ.
އޭޑީކޭ ހޮސްޕިޓަލުގައި ކެންސަރު ބަލީގެ އާލާސްކަންފުޅަށް ފަރުވާ ހޯއްދަވަމުން ދަނިކޮށް އާމިނަތު ޢައްބާސް ނިޔާވީ ޢުމުރުފުޅުން 68 އަހަރުގައެވެ.
އާމިނަތު ޢައްބާސް އަކީ ރާއްޖޭގެ މަޝްހޫރު އަދީބާ ގ.ޑޭޒީމާގޭ، އާމިނަތު ފާއިޒާގެ ދަރިކަނބަލެކެވެ. އާމިނަތު ޢައްބާސްއަކީ ޅެން ހެއްދެވުމުގެ އިތުރުން ޅެން ވެރިކަމުގެ ހުނަރު މީހުނަށް ދަސްކޮށްދެއްވުމާއި ޅެންވެރިކަމުގެ މުބާރާތްތަކުގެ ފަނޑިޔާރުކަންވެސް ކުރައްވައިފައިވެއެވެ.
އާމިނަތު ޢައްބާސްއަކީ އަދަބީ ގޮތުން ފާހަގަ ކޮށްލެވޭ ކާމިޔާބީ ތަކެއް ހޯއްދަވައިފާ ބޭފެޅެކެވެ.
އެގޮތުން ކުޑަކުދިންގެ ޅެންފޮތް އެކުލަވައިލުމުގެ މުބާރާތުން 1 ވަނަ، އިސްލާމީ ކަންތައްތަކާބެހޭ އެންމެމަތީ މަޖިލީހުން 1996 ވަނަ އަހަރު ބޭއްވެވި ދީނީ ޅެންހެދުމުގެ މުބާރާތުން 1 ވަނަ، ޤައުމީ ޅެންހެދުމުގެ މުބާރާތްތަކުން މަތީ ވަނަތައް ހާސިލުކުރެއްވުން ހިމެނެއެވެ. މީގެ އިތުރުން ދީނީ ޅެން ހެދުމުގެ މުބާރާތްތަކުންވެސް އެކަމަނާ ވަނީ ވަނަތަކެއް ހާސިލްކުރައްވައިފައެވެ.
އެކަމަނާއަކީ ދިވެހި އަދަބިއްޔާތަށްޓަކައި ގިނަ ޚިދްމަތްތަކެއް ކޮށްދެއްވި ބޭފުޅެކެވެ. އެކަމަނާ ވަނީ ދިވެހި ބަހުން ފޮތްތައްވެސް ލިޔުއްވާފައެވެ. އެގޮތުން ކުޑަކުދީންގެ ޅެންފޮތާއި، ޔޫސުފް މުޙައްމަދުފުޅުގެ ޅެންތަކާއި، ބަރާބަރު ބާރަ 1، ނޭވަޔަށް އުނދަގޫކުރުމުގެ ބައްޔަށް ލުއިކަމެއްފަދަ ފޮތްތައް ވަނީ ލިޔުއްވާފައެވެ.
Advertisement
This content is created and paid for by advertisers and does not involve Voice Journalists
