ދިވެހި ރައްޔިތުން ބޭނުންވަނީ އެއްޤައުމަކަށް ޤައުމު ވިއްކާލާ ވިއްކާލުމާއި ދެކޮޅަށް ތެދުވަން ކަމަށް ޕީއެންސީގެ ލީޑަރު ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.
ޢަބްދުއް ރަޙީމް މިހެން ވިދާޅުވީ ޕީޕީއެމް ޕީއެންސީ އިން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުންނެވެ.
ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޢަބްދުއްރަޙީމް ވިދާޅުވީ ޕީޕީއެމް ޕީއެންސީގެ ސަޕޯޓަރުންވެސް ރައީސް ޔާމިންގެ ސަޕޯޓަރުންވެސް އަދި ދިވެހި ރައްޔިތުންވެސް ބޭނުންވަނީ މިވެރިކަން ބަދަލު ކުރަން ކަމަށާއި އަދި ރައީސް ޞާލިޙްގެ އަނިޔާވެރިކަމުން ސަލާމަތްވާން ކަމަށެވެ. އަދި ރައްޔިތުން ބޭނުންވަނީ ވަކި އެއްޤައުމަކަށް ޤައުމު ވިއްކާލާ ވިއްކާލުމާއި ދެކޮޅަށް ތެދުވަން ކަމަށާއި މިކަހަލަ ނާޤާބިލު ވެރިއެއްގެ ކިބައިން ސަލާމަތް ވާން ކަމަށެވެ.
"ދިވެހި ރައްޔިތުން ބޭނުންވަނީ ރައީސް ޔާމިން ފަދަ ޤާބިލް ވެރިއެއް މިރާއްޖެއަށް ގެންނަން، ރައީސް ޔާމިންގެ ޒަޢާމަތުގައި ދިވެހިން ދުށް އުފާވެރިކަމާއި ތަޖުރިބާކުރި ހިތްހަމަޖެހުމާއި މިކަންކަން އަލުން އަނބުރާ އިޔާދަ ކުރަން ރައްޔިތުން ބޭނުންވަނީ"
ޢަބްދުއްރަޙީމް ޢަބްދުﷲ
ރައީސް ނަޝީދާއި ޕީޕީއެމާއި ހުރި ހިޔާލު ތަފާތުވުންތަކެއްގެ ސަބަބުން އަލުން ރައީސް ޞާލިޙް އަލުން އަނބުރާ ވެރިކަމަށް ގެންނަން ރައްޔިތުން ބޭނުން ނުވާކަމަށް ޢަބްދުއްރަޙީމް ވިދާޅުވިއެވެ.
ރައީސް ޔާމިންގެ އެއްވެސް ސަޕޯޓަރަކު ރައީސް ޔާމިންގެ ނިންމުމަކާއި ޚިލާފެއް ނުވާނެ ކަމުގެ ޔަޤީންކަން އެބައޮތްކަމަށް ވިދާޅުވަމުން ޢަބްދުއްރަޙީމް ވިދާޅުވެފައިވަނީ އެބޭފުޅާޔާއި ރައީސް ނަޝީދާއި ނުވަތަ އެހެން ބޭފުޅަކާއި ވެސް ޒާތީ މައްސަލައެއް އޮވެދާނެ ކަމަށެވެ.
ނަމަވެސް މިހާރު މިއުޅެނީ އަމިއްލަ ކަމެއް ކުރަން ނޫން ކަމަށާއި މިހާރު މިއުޅެނީ މިޤައުމަށް އެންމެ ފައިދާހުރި ގޮތް ހޯދައި ދިނުމަށްކަމަށް އޭނާ ވިދާޅުވިއެވެ.
"މިޤައުމަށް އެންމެ ފައިދާހުރި ގޮތަކީ ރައީސް ޔާމިން ވެރިކަމަށް ގެނައުން"
ޢަބްދުއްރަޙީމް ވިދާޅުވިއެވެ.
ޢަބްދުއްރަޙީމް މިއަދުގެ ނޫސްވެރިންގެ ބައްދަލުވުމުގައި މިގޮތައް ވާހަކަފުޅު ދައްކަވައިފައިވާއިރު ދަ ޑިމޮކްރެޓްސް އުފެއްދުމަށް ބޭއްވި ޖަލްސާގައި ވަހަކަފުޅު ދައްކަވަމުން ރައީސް ނަޝީދު ވިދާޅުވެފައިވަނީ އެމަނިކުފާނަށް ފެނިލައްވާ ގޮތުގައި މިރިޔާސީ އިންތިޚާބަށް ރައީސް ޔާމިންވެސް އަދި އެބޭފުޅާވެސް ކުރިމަތިނުލައްވައި ދެބޭފުޅުން އެކުގައި ބާރަށް މަސައްކަތް ކޮށްގެން ރާއްޖޭގެ ރައްޔިތުން މިއެދޭ ގޮތް ހޯދައިދޭންވީ ކަމަށެވެ.
ޕީޕީއެމް ޕީއެންސީ ކޯލިޝަނާއި ދަ ޑިމޮކްރެޓްސް އިން ދަނީ ސިލްސިލާ ބައްދަލުވުންތަކެއް ކުރިއަށްގެންދަމުންނެވެ.
އެސިލްސިލާގެ ތިން ބައްދަލުވުމެއް މިހާރު ބޭއްވިފައިވާއިރު މިރޭ އޭގެ ހަތަރުވަނަ ބައްދަލުވުން އޮންނާނެ ކަމަށް މިއަދުގެ ނޫސްވެރިންގެ ބައްދަލުވުމުގައި ޢަބްދުއްރަޙީމް ވިދާޅުވިއެވެ.
އިއްޔެ ޕީޕީއެމް ޕީއެންސީ ކޯލިޝަނުން ވަނީ ރައީސް ޔާމިންގެ އެދިލެއްވުމަށް ޖޭޕީގެ ލީޑަރު ޤާސިމް އިބްރާހިމާއި ވެސް ބައްދަލުކުރައްވައިފައެވެ.
Advertisement
This content is created and paid for by advertisers and does not involve Voice Journalists
