ދިވެހި ރާއްޖޭގައި ހިންގާ ސިޔާސީ ޕާޓީ ތަކިގެ ދަފްތަރުގައި ދަ ޑިމޮކްރެޓްސް ހިމަނައިފިކަމަށް އިލެކްޝަންސް ކޮމިޝަނުން ހާމަކޮށްފިއެވެ.

އީސީގެ ނައިބު ރައީސް އިސްމާއިލް ޙަބީބް ކޮށްފައިވާ ޓްވީޓެއްގައި ވިދާޅުވެފައިވަނީ "ދަ ޑިމޮކްރެޓްސް" ނަމުގައި، ސިޔާސީ ޕާޓީ އެއް އުފެއްދުމަށް، ހ. ސީވީޑް އަލްއުސްތާޛް ޙަސަން ލަތީފް ހުށަހަޅުއްވާފައިވާ ހުށަހެޅުއްވުމާ ގުޅިގެން، ސިޔާސީ ޕާޓީއެއް ރަޖިސްޓަރީ ކުރުމަށްޓަކައި ފުރިހަމަ ވާންޖެހޭ އިޖްރާއާތު ފުރިހަމަ ކޮށްފައިވާތީ،"ދަ ޑިމޮކްރެޓްސް" ސިޔާސީ ޕާޓީތަކުގެ ދަފްތަރުގައި ހިމެނުމަށް، މިއަދު ބޭއްވި އިލެކްޝަންސް ކޮމިޝަންގެ 793 ވަނަ ޢާންމު ޖަލްސާގައި، މެންބަރުންގެ އިއްތިފާގުން ފާސްކޮށްފި ކަމަށެވެ.

ދަ ޑިމޮކްރެޓްސް އުފެއްދުމުގެ މަސައްކަތް ފަށައިފައިވަނީ މެއި މަހުގެ ތެރޭގައެވެ.

އެޕާޓީ އުފެއްދުމަށް ބާއްވާ ޖަލްސާ ބޭއްވުމަށް އީސީ އިން ހުއްދަދީފައިވަނީ 24 ޖޫންގައެވެ.  އެޕާޓީއިން އެޖަލްސާ ބާއްވާފައިވަނީ ޖުލައި މަހުގެ 5 ވަނަ ދުވަހުއެވެ.

އެޖަލްސާގައި ވަނީ އެޕާޓީގެ ވަގުތީ ޗެއަރޕާސަން އަކަށް ހަސަން ލަތީފް ހަމަޖައްސައިފައެވެ. އަދި އޭގެއިތުރުން ވަގުތީ ޗެއާޕާސަންގެ ނައިބުންގެ ގޮތުގައި ތިން ބޭފުޅެއްގެ ނަން ވަނީ ހުށަހަޅައިފައެވެ.

އެ ނަންތައް ހުށަހެޅުއްވީ މަޖިލިހުގެ ނައިބު ރައީސް އީވާ އަބްދުاللهއެވެ. ވަގުތީ ޗެއާޕަސަންގެ ނައިބުންނަކީ ނ.އަތޮޅު ކައުންސިލްގެ ރައީސް މުހައްމަދު ބަޝީރު ، އެންވަޔަރްމެންޓް މިނިސްޓްރީގެ ކުރީގެ ޑެޕިއުޓީ މިނިސްޓަރު މުހައްމަދު އަންސަރު އަދި އެލްޖީއޭގެ ކުރީގެ ސީއީއޯ އަފްޝަން ލަތީފެވެ.

އެޖަލްސާ އަށްފަހު ޑިމޮކްރެޓްސް ރަޖިސްޓަރ ކުރުމަށް އީސީ އަށް ހުށައަޅައިފައިވަނީ ޖުލައި 9 އެއް ގައެވެ.