ސަރުކާރުން ބޭނުންވީމަ ކިތަންމެ ބޮޑު ކުށެއްގެ ތުހުމަތުގަ ހުރި މީހެއްނަމަވެސް ފޮނުވާލާކަމަށް ވިލިމާލެ ދާއިރާގެ މެމްބަރު އަޙްމަދު އުޝާމް ވިދާޅުވެއްޖެއެވެ.

އުޝާމް މިހެން ވިދާޅުވީ އަންހެން މުވައްޒަފުން ތަކަކަށް ޖިންސީ ގޯނާ ކުރިކަމުގެ ތުހުމަތު ކުރެވުނު ކުރީގެ ޓުވަރިޒަމް މިނިސްޓަރ ޢަލީ ވަހީދަށް ކުރެވުނު ދައުވާތައް އަނބުރާ ގެންދިޔުމުން ދެއަހަރަށްފަހު އޭނާ ރާއްޖެ އެނބުރިވަޑައިގަތުމުންނެވެ.

"މިޤައުމުގަ މިއަދު ޢަދުލުވެރިކަމާ އިންސާފުވެރިކަން އޮތް މިންވަރު މިމައްސަލައަށް އެކަނި ބަލާލުމުންވެސް ހާމަވޭ، ސަރުކާރުން ބޭނުންވީމަ ކިތަންމެ ބޮޑު ކުށެއްގެ ތުހުމަތުގަ ހުރި މީހެއްނަމަވެސް ފޮނުވާލަނީ، ގެންނަން ބޭނުންވީމަ ކޮށްފައިވާ ހުކުމްތައް ސިއްރުސިއްރުން ބާތިލްކޮށްލަނީ" މިކަމާއި ގުޅިގެން ކުރެއްވި ޓްވީޓުގައި އުޝާމް ވިދާޅުވެފައިވެއެވެ.

ޢަލީ ވަހީދު ރާއްޖެއިން ބޭރަށް ވަޑައިގެންފައިވަނީ ޓުވަރިޒަމް މިނިސްޓްރީގެ އަންހެން މުވައްޒަފުންތަކަކަށް ޖިންސީ ފުރައްސާރަ ކުރި ކަމުގެ ދައުވާ ކުރެވުމުން 2021 ވަނަ އަހަރުގެ ފެބްރުއަރީ މަހުއެވެ.  

ދެއަހަރަށްފަހު އިއްޔެ އަލީ ވަހީދު އެނބުރި ރާއްޖެ ވަޑައިގެންނެވީ އެނާގެ މައްޗަށް ކުރެވުނު ޖިންސީ ފުރައްސާރައިގެ ދައުވާ ބާޠީލް ކުރެވުމުންނެވެ.

އިދިކޮޅު ފަރާތްތަކުން މިކަމާއި ގުޅިގެން ފާޑު ކިޔަމުންދާއިރު ސަރުކާރަށް ތާއީދު ކުރާ ބައެއް އިސްލީޑަރުން އަލީ ވަހީދަށް މަރުހަބާ ދެންނެވުމަށް އިއްޔެ އެމަނިކުފާނު މާލެ ވަޑައިގެންނެވި ވަގުތު އެސަރަހައްދަށް ގޮސްފައިވެސް ވެއެވެ.