ކުރީގެ ރައީސް އަދި އިދިކޮޅު ކޯލިޝަންގެ ރިޔާސީ ކެންޑިޑޭޓް ރައީސް އަބްދުالله ޔާމީން އަބްދުލްގައްޔޫމްގެ މައްޗަށް ދައުލަތުން ހިންގަނީ ސެލެކްޓިވް ޕްރޮސެކިއުޝަން ކަމާއިމެދު ޝައްކެއްނެތް ކަމަށް އެމަނިކުފާނުގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ އަބްދުالله ޝިޔާޒު ވިދާޅުވެއްޖެއެވެ.
ފުއްގިރި މައްސަލައިގައި ރައީސް ޔާމީންގެ އިތުރުން ދައުވާ އުފުލާފައިވާ ކްރިކް ރިޒާގެ މައްޗަށް ކޮށްފައިވާ ދައުވާތައް އަނބުރާ ގެންދަން ދައުލަތުން ނިންމުމާއި ގުޅިގެން ޝިޔާޒު ކުރެއްްވި ޓުވީޓެއްގައި ވިދާޅުވީ ދައުލަތުން ޔާމީންގެ މައްޗަށް ދޮގު ދައުވާތައް އުފައްދައިގެން ހުކުމްތައް ކުރަމުންދާ ކަމަށެވެ. އަދި އެމަނިކުފާނުގެ މައްޗަށް ހިނގަމުންދަނީ ސެލެކްޓިވް ޕްރޮސެކިޔުޝަން ކަން ޝައްކެއްވެސް ނެތް ކަމަށް ޝިޔާޒު ވިދާޅުވި އެވެ.
2015 ވަނަ އަހަރު ތެރޭގައި އެމްއެމްޕީއާރސީ މެދުވެރިކޮށް ރ. ފުއްގިރި ޓޫރިޒަމް ބޭނުމަށް ދޫކުރުމުގެ މުޢާމަލާތުގައި ރިޝްވަތު ހިފައި މަނީ ލޯންޑަރކުރި މައްސަލައިގައި, މއ.ކުރިކީލަހހިޔާ, އަޙްމަދު ކުރިކް ރިޟާގެ މައްޗަށް ކޮށްފައިވާ ދައުވާތައް އަނބުރާ ގެންދަން ޕީޖީ އޮފީހުން ނިންމިކަން ހާމަކުރީ މިއަދު އެވެ.
އެކަމާއި ގުޅިގެން ޕީޖީ އޮފީހުން ނެރުނު ބަޔާނެއްގައި ބުނީ، ކްރިކް ރިޒާގެ ފަރާތުން ހުށަހެޅި މެޑިކަލް ޑޮކިއުމަންޓްތަކަކާ ގުޅިގެން ފުއްގިރި މައްސަލަ ކޯޓުގެ ތާވަލާ އެއްގޮތަށް ކުރިއަށް ގެންދެވިފައި ނުވާ ކަމަށެވެ.
އަދި ހަމައެހެންމެ، އަޙްމަދު ކުރިކް ރިޟާގެ ފަރާތުން ހުށަހެޅި ދިފާޢީ ހެކިތަކެއްގެ ޞައްޙަކަން ކަށަވަރުކުރުމަށްޓަކައި ފުލުހުންގެ ގެންދަނީ އިތުރަށް ބަލަންޖެހޭ ބެލުންތައް ބަލަމުން އަންނަ ކަމަށްވެސް ބުނެފައިވެއެވެ.
މީގެ އިތުރުން އަޙްމަދު ކުރިކް ރިޟާގެ ބައިގައި ދިމާވި އެ ޙާލަތާ ގުޅިގެން އެބައި ވަކިން ކޯޓުގައި ކުރިއަށްގެންދެވޭނެ ގޮތެއް އޮތްތޯ ބެލިއިރު އެ މަގު ޤާނޫނީ ގޮތުން އޮތީ ބަންދުވެފައިވާ ކަމަށް ޕީޖީ އޮފީހުން ބުނެފައި ވެއެވެ.
"އެހެންކަމުން މި މައްސައަކީ ޢާންމު މަސްލަޙަތު މަތީ މިންވަރަކަށް އެކުލެވޭ މައްސަލައަކަށްވެފައި, މިފަދަ މައްސަލައެއްގައި ދަޢުވާލިބޭ އެކެއްގެ ބައިގައި ދިމާވި ޙާލަތަކާ ކޯޓުގެ ތާވަލާ އެއްގޮތަށް މައްސަލަ ކުރިއަށް ނުގެންދެވި ވުމަކީ ޢާންމު މަސްލަޙަތު އޮތް ގޮތް ކަމަށް ނުފެންނާތީއާއި, އަޙްމަދު ކުރިކް ރިޟާ ހުށަހެޅި ހެކިތަކާ ގުޅިގެން އިތުރަށް ބަލަންޖެހޭ ކަންކަން ބެލުމަށް, އަޙްމަދު ކުރިކް ރިޟާގެ މައްޗަށް ކޮށްފައިވާ ދަޢުވާތައް މިވަގުތަށް މަޑުޖައްސާލުމަށްޓަކައި, އެ ދަޢުވާތައް ފަހުން ހުށަހަޅާ ގޮތަށް ކޯޓުން އަނބުރާ ފޮނުއްވައިދެއްވުމަށް ވާނީ ދަންނަވާފައެވެ." ޕީޖީ އޮފީހުން ބުނެފައި ވެއެވެ.
ޕީޖީން މިފަދައިން ނިންމާފައި މިވަނީ، ފުއްގިރި މައްސަލައިގެ ތަހުގީގުގެ ބޭރުން އެސިސްޓެންޓް ކޮމިޝަނާ އޮފް ޕޮލިސް މުހައްމަދު ރިޔާޒު، ކްރިކް ރިޒާއާ ބައްދަލުކޮށް ދައްކާފައިވާ ވާހަކަތަކެއް ހުރި ކަމަށް ބުނާ އޯޑިއޯ އެއް، ކްރިކް ރިޒާގެ ފަރާތުން ދިފާއީ ހެއްކެއްގެ ގޮތުގައި ހުށަހަޅާފައިވަނިކޮށެވެ.
މި މައްސަލާގައި ދެން ދައުވާ ލިބެނީ ރައީސް އަބްދުالله ޔާމީން އަބްދުލް ޤައްޔޫމަށެވެ. ރިޒާ ހުށަހެޅި މެޑިކަލް ޑޮކިއުމެންޓުތަކުގެ ސަބަބުން ޝަރީއަތް ކުރިއަށް ނުގެންދެވޭތީ ރައީސް ޔާމީންގެ ބައިވެސް ކުރިއަށް ނުދެއެވެ. ނަމަވެސް ދައުވާ އަނބުރާ ގެންދިޔުމުން ޔާމީންގެ ބައި ހަލުވިކަމާއެކު ކުރިއަށްދާނެ ކަމަށް ބެލެވެއެވެ.
Advertisement
This content is created and paid for by advertisers and does not involve Voice Journalists
