2015 ވަނަ އަހަރު ތެރޭގައި އެމްއެމްޕީއާރސީ މެދުވެރިކޮށް ރ. ފުއްގިރި ޓޫރިޒަމް ބޭނުމަށް ދޫކުރުމުގެ މުޢާމަލާތުގައި ރިޝްވަތު ހިފައި މަނީ ލޯންޑަރކުރި މައްސަލައިގައި, އަޙްމަދު ކުރިކް ރިޟާގެ މައްޗަށް ކޮށްފައިވާ ދައުވާތައް އަނބުރާ ގެންދިޔުމަށްފަހު، އެ މައްސަލާގައި ދައުވާ އުފުލާފައިވާ އަނެއް ފަރާތް ކަމުގައިވާ، ކުރީގެ ރައީސް އަބްދުالله ޔާމީން އަބްދުލްގައްޔޫމް ގެ ޝަރީޢަތް މާދަމާއަށް ތާވަލް ކޮށްފި އެވެ. 

ކްރިކް ރިޟާގެ މައްސަލަ އަނބުރާ ގެންދިޔުމަށްފަހު، ދައުލަތުން އެދުނު ގޮތަށް، ރައީސް ޔާމީންގެ މައްސަލަ ވަކީން ކުރިއަށް ގެންދަން ކްރިމިނަލް ކޯޓުން މިހާރު ވަނީ ނިންމާފައެވެ. އެގޮތުން މި މައްސަލައިގެ ޝަރީއަތެއް މާދަމާ ހެނދުނު 9:00 އަށް ވަނީ ތާވަލުކޮށްފައެވެ.

މި މައްސަލައިގައި މި މަހުގެ ފާއިތުވި ހަފްތާ ތަކުގައިވެސް ގިނަ ޝަރީއަތް ތަކެއް ކްރިމިނަލް ކޯޓުން ތާވަލް ކުރިއެވެ. އެހެން ނަމަވެސް، ކްރިކް ރިޟާ ބަލިވެ އުޅޭތީ ޝަރީއަތްތައް ވަނީ ކެންސަލްވެފައެވެ. 

މި މައްސަލައިގައި ރިޟާއަށް ކޮށްފައިވާ ދައުވާތައް އަނބުރާ ގެންދަން ޕީޖީ އޮފީހުން ނިންމީ، ރިޟާގެ ފަރާތުން ހުށަހެޅި މެޑިކަލް ރިޕޯޓް ތަކާއި ގުޅިގެން އެ މައްސަލަ ކުރިއަށް ނުގެންދެވުމާއި، އޭނާގެ ފަރާތުން ހުށަހެޅި ދިފާޢީ ހެކިތަކެއްގެ ޞައްޙަކަން ކަށަވަރުކުރުމަށްޓަކައި ފުލުހުން އިތުރަށް ބަލަންޖެހޭ ބެލުންތައް ބަލަމުން އަންނާތީ ކަމަށް ޕީޖީ އޮފީހުން ބުނެއެވެ.

ފުއްގިރި ކުއްޔަށް ދިނުމުގައި ހިޔާނާތްތެރިވި މައްސަލައިގައި ޔާމީނާއި ރިޒާގެ އިތުރުން ދައުވާކޮށްފައި ވަނީ ސަން ކޮންސްޓްރަކްޝަން އެންޑް އިންޖިނިއަރިން، އަދި ސަން އިންވެސްޓްމަންޓްގެ މައްޗަށެވެ.

ޔާމީންގެ މައްޗަށް އުފުލާފައި ވަނީ މަނީ ލޯންޑަރިން އާއި ރިޝްވަތު ގަބޫލު ކުރުމުގެ ދައުވާ އެވެ. ރިޒާގެ މައްޗަށް ކުރަނީ މަނީ ލޯންޑަރިން އަދި ރިޝްވަތު ހިފުމުގައި މެދުވެރިއަކަށް ވުމުގެ ދައުވާ އެވެ. ސަންގެ ދެ ކުންފުނީގެ މައްޗަށް ކޮށްފައި ވަނީ މަނީ ލޯންޑަރިންގެ ދައުވާ އެވެ.