ޗެލްސީއަށް އެމެރިކާ ފޯވާޑް ކްރިސްޓިއަން ޕްލިސިޗް އިޓަލީގެ އޭސީ މިލާނަށް ވިއްކާލުމަށް ދެކުލަބުން އެއްބަސްވެފައިވާކަމަށް މީޑިއާ ރިޕޯޓްތައް ބުނެފިއެވެ.

މީޑިއާ ރިޕޯޓްތައް ބުނާގޮތުގައި އުމުރުން 24 އަހަރުގެ ފޯވާޑް ކްރިސްޓިއަން ޕުލިސިޗް ޗެލްސީއާއިއެކު ހަދާފައިވާ ކޮންޓްރެކްޓްގައި ބާކީ އެއް އަހަރު އޮއްވައި އެޓީމުން ބޭނުންވަނީ، އޭނާ ވިއްކާލުމަށެވެ.

2019 ވަނަ އަހަރު ޖަރުމަނުގެ ބޮރޫޝިއާ ޑޯޓްމަންޑް އިން 57.6 މިލިއަން ޕައުންޑް ޗެލްސީ އަށް ބަދަލުވި ޕްލިސިޗް އަކީ މިހާތަނަށް އެންމެ އަގުބޮޑު އުތުރު އެމެރިކާ އަށް ނިސްބަތްވާ ކުޅުންތެރިއާއެވެ.

20 މިލިއަން ޕައުންޑުގެ ޓްރާންސްފާއޭއްގައި ޕްލިސިޗް އޭސީ މިލާނަށް ވިއްކާލުމަށް ދެ ކުލަބުން އެއްބަސްވެފައިވާއިރު، އޭނާގެ މެޑިކަލް ކަންކަން މިލާނުން މި ހަފްތާގައި ނިންމާނެކަމަށް ރިޕޯޓްތައް ބުނެއެެވެ.

ޕުލިސިޗް މިލާނާއި ގުޅުމާއި ގާތަށް ގޮސްފައިވާއިރު، މި ޓްރާންސްފާ މާކެޓްގައި އޭނާ ހޯދުމުގެ މަސައްކަތް ފްރާންސްގެ ލިޔޯނުން ވެސް ވަނީ ކޮށްފައެވެ.

ޕުލިސިޗް ވަނީ ޗެލްސީއަސް 145 މެޗު ކުޅެ 26 ލަނޑު ކާމިޔާބުކޮށްދީފައެވެ. އަދި ޗެލްސީ އާއެކު އޭނާ ވަނީ 2021 ވަނަ އަހަރު ޔުއެފާ ޗެމްޕިއަންސްލީގާއި ޔުއެފާ ސުޕަކަޕްގެ އިތުރުން ފީފާ ކްލަބް ވޯލްޑް ކަޕް ކާމިޔާބުކޮށްފައެވެ.

މި ޓްރާންސްފާ މާކެޓްގައި މިހާތަނަށް ޗެލްސީ އިން ގިނަ ކުޅުންތެރިންތަކެއް ދޫކޮށްލި އިރު، އެ ޓީމުން ވަނީ މިހަފްތާގެ ހޯމަ ދުވަހު ލޯން އެއްބަސްވުމެއްގެ ދަށުން ޑޭވިޑް ޑެޓްރޯ ފޮފާނާ ޖަރުމަނުގެ ޔޫނިއަން ބާލިންއަށް ދޫކޮށްލާފައެވެ.

މި ޓްރާންސްފާ މާކެޓުގައި އެޓީމުގެ ޖަރުމަނު ފޯވާޑް ކައި ހަވާޓްޒް ވާދަވެރި އާސެނަލްއަށް ބަދަލުވި އިރު، އިގިރޭސި މިޑްފީލްޑަރު މޭސަން މައުންޓް ބަދަލުވީ މެންޗެސްޓާ ޔުނައިޓެޑަށެވެ. އަދި ކްރޮއޭޝިޔާގެ މިޑްފީލްޑަރު މެޓްރޯ ކޮވެސިޗް މެންސިޓީއަށް ބަދަލުވި އިރު، ސެނަގާލްގެ ކީޕަރ މެންޑީއާއި ކަންޓޭގެ އިތުރުން ކަލިދޫ ކުލިބާލީ ވަނީ ސައުދީ ލީގަށް ބަދަލުވެފައެވެ.