ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ގެ މައްޗަށް ކޮށްފައިވާ ދައުވާތައް ސާބިތުވާ ކަމަށް ކަނޑައަޅައި އެމަނިކުފާނު ޖަލަށް ލެވުމުން، ބޭސްފަރުވާއަށް ރާއްޖެއިން ބޭރަށް ވަޑައިގަންނަވަން އެދިލެއްވި ކަމަށާ، އެހެން ނަމަވެސް އެކަމަށް އެމަނިކުފާނު އިންކާރު ކުރެއްވި ކަމަށް ރައްޔިތުންގެ މަޖިލީހުގެ މާވަށު ދާއިރާގެ މެންބަރު މުހައްމަދު ސަޢީދު ވިދާޅުވެއްޖެއެވެ.
ރޭ ބޭއްވި ޕީޕީއެމްގެ ޖަގަހަ ޖަލްސާގައި ވާހަކަ ދައްކަވަމުން ސައީދު ވިދާޅުވީ ރައީސް ޔާމީނަށް ޖަލުން ސަލާމަތް ވެވަޑައިގެން، ރާއްޖެއިން ބޭރުގަައި އެމަނިކުފާނު ބޭނުންފުޅު މަސައްކަތެއް ކުރެއް ވުމުގެ ފުރުސަތު ލިބިވަޑައިގެންނެވި ކަމަށެވެ. އެހެންނަމަވެސް އެފަދައިން ޖަލުން ފިއްްލަވައިގެން ރާއްޖެއިން ބޭރަށް ވަޑައިގަންނަވަން އެމަނިކުފާނު ބޭނުންނުވާ ކަމަށް އޭނާ ވިދާޅުވި އެވެ.
"ރައީސް ޔާމީން އަށް ލިބިވަޑައިގަތޭ، ހަމަގައިމުވެސް މަދުވެގެން ތިން ގައުމަށް، އެމަނިކުފާނު ބޭނުންފުޅު މަސައްކަތެއް ކުރައްވަން، ބޭނުން ޔުނިވާސިޓީ އެއްގައި ކިޔަވައިދޭން، ބޭނުން ދިރާސާ އެއް ކުރައްވަން. ބޮޑެތި ބެނެފިޓް ތަކާއި އެކު ވަޑައިގަންނަވަން ފުރުސަތު."
މުހައްމަދު ސަޢީދު
ސަޢީދު އިތުރަށް ވިދާޅުވީ ރައީސް ޔާމީން ޖަލަށް ލެވުނު ދުވަސްކޮޅަކީ އިދިކޮޅު ލީޑަރޝިޕް ވަރަށް ނިކަމެތިވި ދުވަސްވަރެއް ކަމަށެވެ. އަދި އެކަން ތަހައްމަލް ކުރުމުގެ ހިތްވަރު އޭރު އެ ޕާޓީގެ ލީޑަރޝިޕްގައި ނެތް ކަމަށްވެސް އޭނާ ވިދާޅުވި އެވެ. އެހެންކަމުން، ބޭސްފަރުވާ އަށް ރާއްޖެއިން ބޭރަށް ވަޑައިގެންނެވުމަށް ޕާޓީގެ ލީޑަރޝިޕްގެ ފަރާތުން ޕީއެންސީގެ ރައީސް އަބްދުއްރަހީމް އަބްދުالله ރައީސް ޔާމީން އަރިހުން އެދިލެއްވި ކަމަށާ އެހެންނަމަވެސް އެކަމަށް އެމަނިކުފާނު އިންކާރު ކުރެއްވި ކަމަށް ސަޢީދު ވިދާޅުވިއެވެ.
އަޅުގަނޑުމެން ގެ ޕާޓީގެ ލީޑަޝިޕުން، އަބްދުއްރަހީމް ޖަލަށް ވަޑައިގެން ރައީސް ޔާމީންއަށް ދެންނެވި. އަޅުގަނޑުމެންގެ ހިތަކަށް ކެތެއް ނޫނޭ މަނިކުފާނުގެ އާއިލާ މިއަދު ކަޑައްތު ކުރަމުންދާ ކަންކަން ބަލާކަށް. އަޅުގަނޑުމެން ޕާޓީއަށް އެކަން ބެއާ ކުރެވޭނެ، ގޯ ތުރޫ ކުރެވޭނެ ފުރިހަމަ ކަމެއް ޕާޓީގައި އެވަގުތަކު ނެތޭ. އެހެންވީމާ، ރައީސް ބޭސްފަރުވާ އަށް ބޭރަށް ވަޑައިގަންނަވަންވީ ނޫންތޯއޭ. އަބްދުއްރަހީމް އެވާހަކަ ވިދާޅުވެ ނުނިމެނީސް ރައީސް ޔާމީން ވިދާޅުވި ތިޔަ ވާހަކަ ދައްކަވަން، އަބްދުއްރަހީމް ލީޑަރޝިޕް ގެ ފަރާތުން ޖަލަށް އައި ނަމަ، ވަތް ދޮރުން ނުކުމެ ވަޑައިގަންނަވާށޭ. ތިމަން މަނިކުފާނު، (ރައީސް ޔާމީން) ދިވެހި ރައްޔިތުން ދޫކޮށްފައި، މި ގައުމު ދޫކޮށްފައި، ދާން ޖެހޭނެ ދެވަނަ ތަނެއް ނޯންނާނެ ކަމަށް އެމަނިކުފާނު ވިދާޅުވި ސާބިތު ކަމާއި އެކު.
މުހައްމަދު ސައީދު
ސަޢީދު މިފަދައި ވިދާޅުވެފައިވާއިރު، ރައީސް ޔާމީންގެ ވެރިކަމުގައި، ޖަލަށް ލެވުނު ގިނަ ސިޔާސީ ލީޑަރުން ވަނީ ބޭސްފަރުވާއަށް ރާއްޖެއިން ބޭރަށް ވަޑައިގެން، ދައުރު ނިމެންދެން ނުވަތަ ޖަލު ހުކުމުން މިންޖުވަންދެން ރާއްޖެއިން ބޭރުގައި މަޑު ކުރައްވާފައެވެ.
އެހެންނަމަވެސް، ވޮޑުމުއްލާ މައްސަލަ އާއި، އާރަށު މައްސަލަ އާއި ގުޅިގެން ރައީސް ޔާމީން ޖަލަށް ލެވިފައިވާ އިރު، ކުރިންގެ މައްސަލާގައި އަދި މިހާރުގެ މައްސަލާގައި ޖަލުގައި ހުންނަވައިގެން ވެސް އެފަދަ ކަމެއް ރައީސް ޔާމީން ކުރައްވާފައެއް ނުވެއެވެ.
Advertisement
This content is created and paid for by advertisers and does not involve Voice Journalists
