މިއަހަރުގެ މިނިވަންދުވަހުގެ ހަރަކާތައް ޖުލައި މަހުގެ 25 އިން އޮގަސްޓު 4 ވަނަ ދުވަހާއި ހަމައަށް ކުރިއަށް ގެންދިޔުމަށް ނިންމައިފައިވާ ކަމަށް ސަރުކާރުން ހާމަކޮށްފިއެވެ.

ސަރުކާރުން ނިންމާފައިވަނީ މިއަހަރުގެ މިނިވަން ދުވަސް ކުލަ ގަދަ ގޮތެއްގައި ފާހަގަކުރުމަށެވެ.

މިއަހަރުގެ މިނިވަން ދުވަސް ފާހަގަ ކުރުމާއި ބެހޭ ގޮތުން ހޯމް މިނިސްޓްރީ އިން ހާމަކޮށްފައިވަނީ  ޖުލައި 26 ވަނަ ދުވަހުގެ ހެނދުނު ޖުމްހޫރީ މައިދާނުގައި ދިދަ ނެގުމުގެ ރަސްމިއްޔާތު ކުރިއަށްދާނެ ކަމަށެވެ. އަދި އެއަށްފަހު ހެނދުނު 10:00 ޖަހާއިރު މިނިވަންދުވަހުގެ ރަސްމީ ޖަލްސާ ސޯޝަލް ސެންޓަރުގައި ކުރިއަށްދާނެ ކަމަށްވެސް ހޯމް މިނިސްޓްރީ އިން ބުނެފައިވެއެވެ.

އެއަށްފަހު މިނިވަން އުފާގެ ނަމުގައި ބާއްވާ ޝޯއެއް ހެނދުނު 6:00 އިން ފެށިގެން ރޭގަނޑު 11:00 އާއި ހަމައަށް ކުރިއަށްދާނެ ކަމަށާއި މީގެއިތުރުން 27 ވަނަ ދުވަހުގެ ހަވީރު ޕެރޭޑް އަދި އެ ރޭ ފުޅަނދުބުރު އޮންނާނެ ކަމަށްވެސް އެމިނިސްޓްރީ އިން ހާމަކޮށްފައިވެއެވެ.

މިނިވަންދުވަހާއި ގުޅިގެން މާލެސިޓީގެ އިތުރުން އައްޑޫ އަދި ކުޅުދުއްފުށި ސިޓީގައި ހަވާއެރުވާނެ ކަމަށް ބުނެފައިވެއެވެ.

ރާއްޖޭގައި ކުލަގަދަކޮށް މިނިވަން ދުވަސް ފާހަގަކުރުމަށް ސަރުކާރުން ނިންމައިފިއެވެ.

ސަރުކާރުން މިނިވަން ދުވަސް ފާހަގަކުރުމަށް ނިންމާފައިވަނީ 25 ޖުލައި އިން ފެށިގެން އޮގަސްޓް 4 އާ ހަމައަށެވެ.