ޢުމަރު ނަސީރުގެ ކެމްޕެއިން ހުކުރު ދުވަހު ރަސްމީކޮށް ފެށުމަށް ހަމަޖެހިފައިވާކަމަށް ޢުމަރު އިޢުލާނު ކުރައްވައިފިއެވެ.
ސެޕްޓެމްބަރު 9 ވަނަ ދުވަހު ބާއްވާ ރިޔާސީ އިންތިޚާބުގައި ޢުމަރު ނަސީރު ވާދަކުރައްވަން ނިންމަވައިފައިވަނީ އަމިއްލަ ގޮތުންނެވެ.
ކެމްޕޭނު ހަރަކާތްތައް ރަސްމީކޮށް ފައްޓަވާކަން ޢުމަރު އިޢުލާނު ކުރައްވައިފައިވަނީ އޭނާ ކުރައްވައިފައިވާ ފޭސްބުކް ޕޯސްޓެެއްގައެވެ.
ޢުމަރު ވިދާޅުވެފައި ވަނީ އޭނާގެ ކެމްޕޭނު ޓީމުން އަންނަ ހުކުރުދުވަހު ވ.އަތޮޅުގެ 3 ރަށަކަށް ދަތުރުކުރައްވާނެކަމަށެވެ.
މި ދަތުރުގައި ވ. ފެލިދޫ، ވ. ކެޔޮދޫ އަދި ވ. ފުލިދޫ އަށް ޒިޔާރަތް ކުރުމަށް ވަނީ ހަމަޖެހިފައި ކަމަށްވެސް ޢުމަރު ވިދާޅުވެފައިވެއެވެ.
ޢުމަރު ވިދާޅުވެފައިވަނީ މަސްތުވާއެއްޗެތީގެ ސަބަބުން މިޤައުމަށް ލިބެމުންމިދާ ގެއްލުމާ، ޤައުމަށް ދިމާވެފައި ހުރި ބޮޑެތި މައްސަލަތަށް ޙައްލު ކުރުމަށް އިސްލާމީ ޝަރީއަތުގައި ހިފުމުގެ މުހިންމު ކަމާ ބެހޭގޮތުން ވާހަކަ ދައްކަވާނެ ކަމަށެވެ.
ރިޔާސީ އިންތިޚާބުގައި ވާދަކުރާނެ ކަމަށް އިޢުލާނު ކޮށްފައިވާ ޕާޓީތަކުން އެޕާޓީތަކުގެ ކެނޑިޑޭޓުންގެ ކެމްޕެއިން ހަރަކާތްތައްވެސް ވަނީ ފަށައިފައެވެ.
އެގޮތުން އެމްޑީޕީ، ޢަދާލަތު، އެމްޑީއޭ އިން ރައީސް އިބްރާހިމް މުޙައްމަދުގެ ކެމްޕޭނު ކުރަމުންދާއިރު ޕީޕީއެމް ޕީއެންސީ ކޯލިޝަނުން ރައީސް ޔާމީން ޖަލުގައި ހުންނެވި ނަމަވެސް ފޯރިއާއި އެކު ޕާޓީގެ އެހެން ލީޑަރުން ދަނީ ކެމްޕެއިން ކުރައްވަމުނެވެ.
މީގެ އިތުރުން އެމްއެންޕީ އިން ކާނަލް މުޙައްމަދު ނާޒިމް ގެ ކެމްޕޭނު ފަށައިގެން ކުރިއަށް ގެންދާއިރު ޖޭޕީ އިން ދަނީ ޤާސިމް އިބްރާހިމްއަށް ކެމްޕޭނު ކުރަމުންނެވެ.
ދާދި ފަހުން އުފެދުނު ދަ ޑިމޮކްރެޓްސް އިން ބުނެފައިވަނީ އެޕާޓީ އިން ވެސް ރިޔާސީ އިންތިޚާބުގައި ވާދަކުރާނެ ކަމަށެވެ. ނަމަވެސް އަދި އެޕާޓީ އިން ކެނޑިޑޭޓަކު ހަމަޖައްސައިފައެއް ނުވެއެވެ.
Advertisement
This content is created and paid for by advertisers and does not involve Voice Journalists
