ރ. ފުއްގިރި ކުއްޔަށް ދޫކުރުމުގެ މުއާމަލާތުގެ ތެރެއިން ޓުއަރިޒަމް މިނިސްޓްރީ މެދުވެރިކޮށް ޚިޔާނާތް ހިންގިކަމެއް އޭރުވެ ވެރިންނަށް އެނގިނުލައްވާނެ ކަމަށް އެ މައްސަލައިގައި ދައުލަތުގެ ފަރާތުން ހެކިބަސް ދެއްވަމުން މަޖިލީހުގެ މާދަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑާ) ވިދާޅުވެއްޖެ އެވެ. 

ރ. ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ ރައީސް އަބްދުﷲ ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތަކާއި ގުޅޭ ޝަރީއަތުގެ އަޑުއެހުމެއް ބުރާސްފަތި ދުވަހު ވަނީ ކްރިމިނަލް ކޯޓުގައި ބާއްވާފަ އެވެ. އަދި މިއަދުގެ އަޑުއެހުމުގައި ވަނީ ބޮންޑާގެ ހެކިބަސް ނަގާފަ އެވެ. 

ބޮންޑާ ވިދާޅުވީ އޭނާ އަކީ ފުއްގިރި ކުއްޔަށް ދޫކުރުމުގެ މުއާމަލާތުގައި، އޭރު އެރަށް ހޯދުމަށް މަސައްކަތް ކުރަމުންދިޔަ ބޭރުގެ ކްލަސިކް ސިޓީ ދުބާއީ ކުންފުނީގެ މަންދޫބެއްގެ ގޮތުގައި މަސައްކަތްކޮށްފައިވާ ފަރާތެއް ކަމަށެވެ. 

މިއަދުގެ އަޑުއެހުމުގައި ބޮންޑޭ ވިދާޅުވީ ފުއްގިރީގެ ކޮންސެޕްޓް ޑިޒައިނިންގ އާއި އީއައިއޭއާ ގުޅޭ ކަންކަމުގައި ބޭރުގެ ކްލަސިކް ސިޓީ ދުބާއީ ކުންފުނީގެ މަންދޫބެއްގެ ގޮތުން އޭނާގެ ކުންފުނިން ފައިސާ ދައްކާފައިވާނެ ކަމަށާއި، އެ ފައިސާއަކީ ބޭރުގެ ކުންފުނިން ފޮނުވި ފައިސާކަމަށެވެ.

އެގޮތުން އެ މުއާމަލާތާއި ގުޅިގެން 150،000 ޑޮލަރު އިނިޝަލް ޕޭމަންޓެއްގެ ގޮތުން ބޭރުގެ ކުންފުނިން ދެއްކި ފައިސާކަމަށް ބޮންޑޭ ވިދާޅުވި އެވެ. 

އެ މުއާމަލާތް ހިނގިތާ 6 ވަރަކަށް ދުވަސް ފަހުން އޭނާ ބޭންކު ސްޓޭޓުމަންޓެއް ނަގައިގެން ބެލިބެލިމުން ކުންފުނިން އެމްއެމްޕީއާރުސީއަށް ދެއްކި ފައިސާ ޖަމާވެފައިވަނީ އެސްއޯއެފް ކިޔާ ކުންފުންޏަކަށްކަމަށާއި، އެ ކުންފުންޏާއި ގުޅޭ މައުލޫމާތު ހޯދި ހޯދުމުން އެއީ އޭރުގެ ޓުއަރިޒަމް މިނިސްޓަރު އަހުމަދު އަދީބާއި ގާތް ގުޅުމެއް އޮންނަ އޭރާގެ އަރިހުގައި އުޅޭ ބައެއްގެ ކުންފުންޏެއްކަން އެގުނުކަމަށް ބޮންޑާ ވިދާޅުވި އެވެ. 

ފުއްގިރި ކުއްޔަށް ދޫކުރުމުގެ އަގު 1.2 އާ 1.5 މިލިއަން ޑޮަލަރުގެ ދެމެދު ގެ އަގެއް ހުށަހަޅާފައި އޮއްވާ 4 ލައްކަ ޑޮލަރަށް އަގު ތިރިވެގެން ދިއުމުންވެސް ޝައްކު ކުރެވުނު ކަމަށާއި، ދައުލަތުގެ މުއައްސަސާއަކަށް ޖަމާކުރަން ދިން ފައިސާ އަމިއްލަ ކުންފުންޏަކަށް ޖަމާކުރުމުން އެ އޮތީ ގޯސް ހަދާފައިކަން ކަށަވަރުކުރެވުނު ކަމާއި، އެއީ ޚިންގާފައިވާ ޚިޔާނާތަކަށް ވާތީ އެ މައްސަލަ އޭސީސީއަށް ހުށައަޅާފައިވާނެކަމަށް ބޮންޑާ ވިދާޅުވި އެވެ. 

އޭނާ ވިދާޅުވީ ފުއްގިރި ޚިޔާނާތް ހިންގާފައިވަނީ ޓުއަރިޒަމް މިނިސްޓްރީ ތެރެއިން ކަމަށެވެ. އޭސީސީއަށް އެ މައްސަލަ ހުށައެޅި ހިސާބުން އެ މައްސަލަ ބަލަން ފެށުމުން، އޭރު ސަރުކާރުގެ ވެރިންނަށް އެ ޚިޔާނާތް ހިންގާފައިވާކަން އެނގިނުލައްވާކަމަށް ހާމަވެގެންދާކަމަށް ބޮންޑާ ވިދާޅުވި އެވެ. 

ބޮންޑާ އިތުރަށް ވިދާޅުވީ ފުއްގިރި ކުއްޔަށް ދޫކުރުމުގެ މުއާމަލާތާއި ގުޅޭ އެއްވެސް ކަމެއްގައި އޭރުގެ ޓުއަރިޒަމް މިނިސްޓަރު އަހުމަދު އަދީބާއި ބައްދަލުކުރައްވާފައި ނުވާނެކަމަށެވެ.

އެ މައްސަލައިގައި ހެކިބަސް ދެއްވަމުން ފުއްގިރި ކުއްޔަށް ދިނުމަށް ރައީސް ޔާމީން ވިދާޅުވެގެން ދުބާއީގެ ކުންފުންޏެއް ހިންގުމުގައި އުޅޭ އިންޑިއާގެ ބަޔަކާއި ބައްދަލުކުރެއްވިއިރު އެ ބައްދަލުވުމުގައި ބޮންޑާ ވެސް ބައިވެރިވެވަޑައިގެންނެވި ކަމަށް ވިދާޅުވެ އަދީބު ކޯޓަށް ދިނީ ކަނޑައެޅިގެން ދޮގުހެކި ބަހެއްކަމަށް ކަމަށް ބޮންޑާ ވަނީ ވިދާޅުވެފަ އެވެ. 

މިއަދުގެ އަޑުއެހުމުގައި ވަނީ ދައުލަތުން ހެއްކެއްގެ ގޮތުގައި ހުށައަޅުއްވާފައިވާ ތިމާވެށީގެ ދާއިރާގެ ކޮންސަލްޓެންސީ މަސައްކަތް ކުރާ ކުންފުންޏެއްގައި މަސައްކަތް ކުރައްވާ އަހުމަދު ޝާއިރުގެ ހެކިބަސް ވެސް ނަގާފަ އެވެ. 

އޭގެ އިތުރުން ދައުލަތުގެ ފަރާތުން ހުށައަޅާ އިތުރު ފަރާތެއްގެ ހެކިބަސް ނެގުމަށް ވެސް މިއަދު އޮތީ ނިންމާފައެވެ.

އެހެން ނަމަވެސް އެމީހާ ރާއްޖެއިން ބޭރުގައި ހުންނެވުމާއި ގުޅިގެން، އެފަރާތް ކޯޓަށް ހާޒިރުކޮށްގެން ހެކިބަސް ނަގަން ބޭނުންވާތީ އެ އަޑުއެހުން އެހެން ދުވަހަކަށް ތާވަލުކުރުމަށް ނިންމާ މިއަދުގެ އަޑުއެހުން ވަނީ ކުރުކޮށްލާފަ އެވެ.