ސޭވް އެފްއޭއެމް ކެމްޕޭނުން ގައުމީ ފުޓްބޯޅަ ކޮންފަރެންސެއް ބާއްވަން ނިންމާފިއެވެ.
މިކަމާއި ގުޅިގެން ސޭވް އެފްއޭއެމް އިން ނެރުން ނޫސް ބަޔާނުގައި ބުނެފައިވަނީ މި ކޮންފަރެންސްގެ މަގްސަދަކީ ފުޓުބޯޅަ ލާމަރުކަޒުކޮށް ގައުމީ ޕްރޮފެޝަނަލް ލީގެއް ބައްޓަންކުރާނެ ގޮތެއް ކަނޑައެޅުން ކަމަށެވެ.
އަދި އެ މަގަށް ސަރުކާރާއި، އެފްއޭއެމް ގެ ސިޔާސަތު ބައްޓަން ކުރުމަށް ވަކާލާތުކޮށް ކެމްޕޭން ކުރުމަށް ކަމަށެވެ.
މިއާއިއެކު ސޭވް އެފްއޭއެމް ކެމްޕޭން އުފެދުނީ އެފްއޭއެމްގެ ރައީސް ބަދަލުކުރަން ނޫން ކަމަށާއި ސޭވް އެފްއޭއެމް ކެމްޕޭން އުފެދުނީ ޕްރޮފެޝަނަލް ފުޓްބޯޅަ ލީގެއް ހޯދައި މިފަދަ ލީގެއް ބައްޓަން ކުރެވޭނެ ނިޒާމެއް ހޯދުމަށް ކަމަށް ބަޔާނުގައި ވަނީ ފާހަގަކޮށްފައެވެ.
މިއާއިއެކު ސޭވް އެފްއޭއެމް އިން ބޭނުންވަނީ މީހާ ބަދަލު ކުރަން ނޫން ކަމަށާއި މިހާރު މިއޮތް ފޭލް ވެފައިވާ ނިޒާމް ބަދަލުކޮށް، ހިފެހެއްޓިފައި އޮތް ހިފެހެއްޓުން ނިމުމަކަށް ގެނެސް، ސިއްރިއްޔާތުގައި ކެމްޕެއިން ނުކޮށް، ފާޅުގައި ކެމްޕޭން ކުރުން ކަމަށްވެސް ސޭވް އެފްއޭއެމް އިން ވަނީ ފާހަގަކޮށްފައެވެ.
އެގޮތުން ފުޓުބޯޅަ ނިޒާމަށް ގެންނަ ބަދަލާއިއެކު އަތޮޅު ޓީމްތަކަށް ވޯޓު ލުމުގެ ހައްގު ލިބުމުގެ އިތުރުން އަތޮޅާއި ސަރަހައްދީ އެސޯސިއޭޝަންތައް ވުޖޫދު ވާނެ ކަމަށް ސޭވް އެފްއޭއެމް އިން ވަނީ ބުނެފައެވެ.
އަދި މީގެ ސަބަބުން އެފްއޭއެމް ގެ ހިންގާ ކޮމިޓީގެ ކޮމްޕޮސިޝަން ބަދަލުވާނެ ކަމަށާއި އެއީ މާލެ ކްލަބްތަކެކޭ އެއްފަދައިން އަތޮޅު ކްލަބްތަކަށްވެސް އެފްއޭއެމްގެ ހިންގާ ކޮމިޓީއަށް ވަދެވޭނެތީ ކަމަށް ސޭވް އެފްއޭއެމް އިން ވަނީ ބުނެފައެވެ.
އެހެންކަމުން ސޭވް އެފްއޭއެމް ކެމްޕެއިން އަމާޒުކުރަންވީ ގައުމީ ފުޓްބޯޅަ ކޮންފަރެންސް އެއް މެދުވެރިކޮށް އަތޮޅުތަކުގެ ކްލަބްތަކަށް ބައިވެރިވެވޭ ގައުމީ ފުޓޫބޯޅަ ލީގެއް ގާއިމް ކުރަން ކަމަށް ސޭވް އެފްއޭއެމް އިން ވަނީ ފާހަގަކޮށްފައެވެ.
Advertisement
This content is created and paid for by advertisers and does not involve Voice Journalists
