ފަށައިގެން މިއުޅެނީ އެފްއޭއެމްގެ ރައީސް ބައްސާމް ޢަދީލް ޖަލީލް ބަދަލުކުރުމުގެ މަސައްްކަތް ނޫން ކަމަށާއި ސޭވް އެފްއޭއެމް ހަރަކާތަކީ ފެއިލްވެފައިވާ ފުޓްބޯޅަ ހިންގުމުގެ ނިޒާމް ބަދަލުކުރުމަށް ކުރާ މަސައްކަތެއް ކަމަށް "ސޭވް އެފްއޭއެމް" އިން ބުނެފި އެވެ.

ރޭ އެހަރަކާތުން ނެރުނު ބަޔާނެއްގައި ބުނެފައިވަނީ ސޭވް އެފްއޭއެމް އުފެދުނީ މުޅި ރާއްޖެ ޝާމިލުވާ ޕްރޮފެޝަނަލް ލީގެއް ހިންގާނެ ނިޒާމަކަށް ފުޓްބޯޅައިގެ ހިންގުން ބަދަލު ކުރުމަށް ކަމަށެވެ.

ފުޓްބޯޅަ ހިންގުމުގެ ނިޒާމުގައި ހިފެހެއްޓި ސިއްރު ކުރެވިފައިވާ ކަންކަން ނިމުމަކަށް ގެނެސް ފާޅުގައި "ކެމްޕޭން" ކޮށް ދެފުށް ފެންނަށް އުސޫލަކުން ހިންގުމުގެ ނިޒާމް ބަދަލު ކުރުމަކީ ވެސް އެ ހަރަކާތުން ބާރުއަޅާ ކަމެއް ކަމަށް ސޭވް އެފްއޭއެމުން ނެރުނު ބަޔާނުގައި ބުނެފައިވެއެވެ.

މީގެއިތުރުން އެ ހަރަކާތުން ބުނީ އެފްއޭއެމްގެ ދަށުން އަތޮޅު އަދި ސަރަހައްދީ އެސޯސިއޭޝަންތައް އުފެއްދުމަށް ބާރުއަޅައި އަތޮޅު ކްލަބްތަކަށް އެ އެސޯސިއޭޝަންގެ ކަންކަން ނިންމުމުގައި ވޯޓް ލުމުގެ ހައްގު ހޯދައި ދިނުމަކީ ވެސް ސޭވް އެފްއޭއެމްގެ އެއް މަގުސަދު ކަމަށެވެ.

ފުޓުބޯޅަ ހިންގުމުގެ ނިޒާމަށް ގެންނަން ބަދަލާ އެކު އަތޮޅު ޓީމްތަކަށް ވޯޓު ލުމުގެ ހައްގު ލިބޭނެ ކަމަށާއި، އަދި އަތޮޅާއި، ސަރަހައްދީ އެސޯސިއޭޝަންތައް ވުޖޫދު ވާނެ ކަމަށެވެ. އަދި މީގެ ސަބަބުން އެފްއޭއެމް ގެ ހިންގާ ކޮމިޓީގެ ކޮމްޕޮސިޝަން ބަދަލުވާނެ ކަމަށްވެސް ބުނެފައިވެއެވެ. އެއީ މާލޭ ކްލަބްތަކެކޭ އެއްފަދައިން އަތޮޅު ކްލަބްތަކަށްވެސް އެފް.އޭ.އެމް ގެ ހިންގާ ކޮމިޓީއަށް ވަދެވޭނެތީ ކަމަށް އެބަޔާނުގައި ވެއެވެ.

ގައުމީ ފުޓްބޯޅަ ކޮންފަރެންސް ބާއްވަން ތައްޔާރުވާކަން ވެސް  ސޭވް އެފްއޭއެމް ކެމްޕޭނުން ނެރުނު މި ބަޔާނުގައި އިޢުލާނު ކޮށްފައިވެއެވެ.