އެމްޑީޕީ ރޫޅާލާނެ ކަމަށް އެ ޕާޓީގެ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ދަ ޑިމޮކްރެޓްސްއަށް ސޮއި ކުރުމަށް ރޭ ބޭއްވި ހާއްސަ ޖަލްސާގައި ވާހަކަދައްކަވަމުން ނަޝީދު ވިދާޅުވީ ސަރުކާރުގައި ތިއްބެވުމަށްފަހު މަގާމު ދޫކުރައްވާ ޑިމޮކްރެޓުންނާ ގުޅިވަޑައިގެންނެވި ބޭފުޅުންނަކީ އަޒުމު ވަރުގަދަ، ތަބީއަތު ހަރުދަނާ އަހްލާގު ރަނގަޅު ބައެއް ކަމަށެވެ. އަދި އެ ބޭފުޅުން އެމްޑީޕީ ދޫކޮށް ޑިމޮކްރެޓްސް އާއި ގުޅުމުން އެމްޑީޕީގެ "ފޫވަށް" ވެއްޓިފައިވާ ކަމަށްވެސް ނަޝީދު ވިދާޅުވި އެވެ.

މިއާއެކު ނަޝީދު ވިދާޅުވީ ސިޔާސީ ޕާޓީއެއް އުފެއްދެވީ ފިކުރެއް ދިރުވަން ކަމަށެވެ. އެމަނިކުފާނު ގެ އަބަދުވެސް އަމާޒަކަށް ވީ އުސޫލެއް ހޯއްދެވުން ކަން ފާހަގަކުރައްވައި އިތުރަށް ވިދާޅުވީ އެ ތައާރަފް ކުރަން ބޭނުންވި އުސޫލު ތަކަކީ ދިވެހިންނަށް މިއަދު ލިބޭ މިންވަރަށް ވުރެ ރަނގަޅު މިންވަރެއް ލިބޭނެ ހަމަތަކާއި އުސޫލުތަކެއް ކަމަށެވެ. އަދި އެމްޑީޕީ ހެދީ ރައްޔިތުން ބޭނުންވާ ފިކުރު ދިރުވާ ރައްޔިތުންނަށް އުފާވެރިކަން ތަނަވަސްކަން އިތުރުކޮށްދީ އެމީހުންގެ އާންމު ހާލަތު ރަނގަޅުކޮށްދިނުމަށް ކަމަށްވެސް ނަޝީދު ވިދާޅުވި އެވެ.

އެހެންކަމުން އެ އުފެއްދި އެމްޑީޕީ ދޫކޮށްލެއްވީ އިންތިހާއަށް ހިތާމަކުރައްވަމުން ކަމަށްވެސް ނަޝީދު ވިދާޅުވި އެވެ. 

"އަޅުގަނޑުގެ ދޮށީ އަންހެން ދަރިފުޅަށް 24 އަހަރު. އޭނާ ބުނީ ނޫން. ބައްޕަ އުޅުނީކީ ކުލައަކާ ރަށްޓެހިވެގެނެއް ނޫނޭ. ބައްޕަ އުޅުނީކީ ލަވައަކާ ގަޔާވެގެނެއް ނޫނޭ. ލޯގޯއަކަށް ހިތްކިޔައިގެނެއް ނޫނޭ. އަދި މަލަކަށްވެސް ފަތަކަށްވެސް މީގޭން އެހެން އެއްވެސް ކަމަކަށް ނޫނޭ. އަޅުގަނޑުމެން އުޅުނީ ފިކުރެއް ދިރުވާށޭ، އެ ފިކުރު ދޫކޮށްނުލައްވައްޗޭ" އެމްޑީޕީން ވަކިވެވަޑައިގަތުމުގެ ނިންމުން ނިންނެވި ގޮތް ހިއްސާކުރައްވަމުން ވިދާޅުވި އެވެ.

ނަޝީދު ވިދާޅުވީ އެމްޑީޕީން މަސައްކަތް ކުރީ ގޮތުގައި ތިބޭ ދިވެހި ރައްޔިތުން އުފައްދަން ކަމަށެވެ. އެހެންކަމުން، ގަބޫލުކުރައްވާ ފިކުރު ނުވަތަ ގޮތް ދޫކޮށްނުލެއްވުމަށް އެ ޖަލްސާ އަށް ވަޑައިގެން ތިބި ހުރިހާ ބޭފުޅުންނަށްވެސް އެމަނިކުފާނު ވަނީ ނަސޭހަތްތެރިވެވަޑައިގަންނަވާފަ އެވެ. 

"ރާއްޖޭގެ ރައްޔިތުންނަށް ދެންވެސް ދަންނަވަން އޮތީ ގޮތް ދޫނުކުރައްވައްޗޭ،" ނަޝީދު އެދިވަޑައިގެންނެވި އެވެ.

މިއާއެކު ނަޝީދު ވިދާޅުވީ އެމްޑީޕީގެ ތެރޭގައި އެ މަނިކުފާނުގެ ވަރަށް ގާތް ރަހުމަތްތެރިން ތިއްބެވި ކަމަށެވެ. ނަމަވެސް އެ ބޭފުޅުން މިހާރު އެ ތިއްބެވީ "ގޯސްތަނުގައި" ކަމަށް ކަމަށްވެސް ވިދާޅުވި އެވެ. 

ނަޝީދު ވިދާޅުވީ އެމްޑީޕީގައި މިހާރު ތިއްބެވި ބޭފުޅުންނަކީ އެސްއެމްއީ ލޯނަކަށް ނަފުސު ވިއްކާލައިގެން ތިއްބެވި ބޭފުޅުން ކަމަށެވެ. އަދި އެމްޑީޕީ އުފެއްދި ސިޔާސަތު މިހާރު ނެތް ކަމަށާއި އެ ސިޔާސަތަށް ތާއީދުކުރާ މީހުން މިހާރު ތިބީ ދަ ޑިމޮކްރެޓްސް އާއެކު ކަމަށް ވިދާޅުވި އެވެ.

ރައީސް މުހައްމަދު ނަޝީދަކީ އެމްޑީޕީ އުފެއްދުމުގައި އެންމެ އިސް ދައުރެއް އަދާކުރެއްވި ބޭފުޅުންގެ ތެރެއިން އެއް ބޭފުޅެކެވެ. 2003 ވަނަ އަހަރު އެމްޑީޕީ އުފެއްދުމުގެ މަސައްކަތް ލަންކާގައި ފެއްޓެވިއިރު އެކަމުގައި އެމަނިކުފާނުގެ ބައިވެރިވުން ވަރަށް ބޮޑެވެ. އެމްޑީޕީގެ ހަޔާތުން ފާއިތުވެދިޔަ 18 ވަރަކަށް އަހަރު އެ ޕާޓީގެ އެންމެ މަގުބޫލު ޝަހުސިއްޔަތަކީ ނަޝީދެވެ. ނަމަވެސް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެރިކަމަށް ވަޑައިގަންނަވައި، އެމަނިކުފާނަަށް ތާއީދު ކުރައްވާ ބޭފުޅުން ޕާޓީގެ އިސް މަގާމުތަކަށް އިންތިހާބު ވާން ފެށުމާއި އެކު ނަޝީދަށް އޮތް ތާއީދު އެމްޑީޕީގެ ތެރެއިން ދިޔައީ ކުޑަވަމުންނެވެ.