މާއްދީ ވަސީލަތްތައް ކިތަންމެ ވަރުގަދަ ވިޔަސް އީމާންކަން ބަލިކަށިވެ، އަޤީދާގައި ރެނދު އަޅައިފިނަމަ އެ ބަޔަކު ބަލިވެގެން ހިނގައިދާނެ ކަމަށް ހުކުރު ޚުތުބާގައި ބުނެފިއެވެ.

ހިޖްރައިގެ ޒިކްރާއާއި ފިލާވަޅުތައް މި މައުޟޫއަށް ރާއްޖޭގެ އެކި ކަންކޮޅުތަކުގައި އިއްވި ހުކުރު ޚުތުބާގައި ބުނީ ހިޖްރައަކީ އިސްލާމީ ދައުލަތުގެ ފެށުމެވެ. އަދި އެ ހިޖްރައިގެ ސަބަބުން އިސްލާމީ ދައުވަތު އައު ފަތިހަކަށް އަލިވިލުނު ކަމަށާއި މަދު މީސްކޮޅަކުން ބޮޑު އުއްމަތަކަށް ބަދަލުވި ކަމަށެވެ. ހަމަ އެހެންމެ މުސްލިމުންނަށް ނަސްރާއި ނަސީބު ލިބެން ފެށީ، މަދީނާގައި މުސްލިމުންނަށް ހަމަޖެހުން ލިބުމުން ކަމަށް ވެސް ޚުތުބާގައި ބުނެފައިވެއެވެ. 

މިއާއެކު ޚުތުބާގައި މުސްލިމުންނަށް އިއްޒަތާއި ޤަދަރު ލިބެން އޮތީ އެމީހުންގެ އަޤީދާގައި ހިފެހެއްޓި މިންވަރަކުން ކަމަށެވެ. އަދި އަޤީދާ ބަލިކަށިވި ވަރަކަށް އެބަޔަކު ނިކަމެތިވާނެ ކަމަށްވެސް ބުނެފައިވެއެވެ. ކީރިތި ރަސޫލާ ﷺ މަދީނާގައި ޤާއިމުކުރެއްވި އިސްލާމީ ދައުލަތް، ކުޑަ ދުވަސްކޮޅެއްގެ ތެރޭގައި އޭރު ދުނިޔޭގައި އޮތް އެންމެ ބޮޑު ދެ ބާރު ކަމަގައިވާ ފާރިސީންނާއި ރޯމަނުން ބަލިކުރީ މުސްލިމުންގެ އަދަދު ގިނަވެގެން ނޫން ކަމަށެވެ. އަދި ގެންގުޅުނު ހަތިޔާރު މޮޅުވެގެނެއް ވެސް ނޫނެވެ. އެކަމަކު އެމީހުންގެ އަޤީދާއާއި އިމާންކަން ހަރުދަނާވުމުގެ ސަބަބުން ކަމަށް ޚުތުބާގައި ބުންޏެވެ.

މީގެ އިތުރުން މާއްދީ ވަސީލަތްތައް ކިތަންމެ ވަރުގަދަ ވިޔަސް އީމާންކަން ބަލިކަށިވެ, އަޤީދާގައި ރެނދު އަޅައިފި ނަމަ, އެ ބަޔަކު ބަލިވެދާނެ ކަމަށް ހުތުބާގައި ބުންޏެވެ. އަދި ހިޖުރައިގެ ވާހަކައަކީ މުނިފޫހިފިލުވުމަށް ޓަކައި ކިޔާލަން ޖެހޭ ވާހަކައެއް ނޫން ކަމަށާއި އެއީ ޖާހިލުކަމާއި ކުފުރުގެ ރާޅުތަކުން އަރަމުން ދިޔަ ސަހަރާއެއްގެ މެދުތެރޭގައި މުސްލިމުންނަށް ވަތަނެއް ގާއިމްކޮށްދިން ހާދިސާއެއް ކަމަށް ހުތުބާގައި ބުންޏެވެ.

ހިޖްރައިން ލިބިދޭ އަނެއް ފިލާވަޅު ކަމުގައި ޚުތުބާގައި ބުނީ ގައުމު ބިނާކުރުމުގައި ފިރިހެނުންނާ އެއްގޮތަށް އަންހެނުން ވެސް ބައިވެރިވާންޖެހޭ ކަން ކަމަށެވެ. 

"ގައުމު ބިނާކުރުމުގައި ފިރިހެނުންނާ އެއްގޮތަށް އަންހެނުން ވެސް ބައިވެރިވާން ޖެހޭނެ އެވެ. އެމީހުން ބާކީކޮށްގެން ނުވާނެ އެވެ. އަހުރެމެންނަށް ހިޖުރައިގެ ދަތުރުފުޅުގައި ފެންނަ ބަތަލާއަކީ، އަބޫބަކުރުގެފާނުގެ ދަރިކަނބަލުން އަސްމާ އެވެ،" ޚުތުބާގައި ބުނެފައިވެއެވެ.