އަންނަ ސެޕްޓެމްބަރު މަހު ބާއްވާ ރިޔާސީ އިންތިހާބުގައި، އިދިކޮޅު ޕީޕީއެމް/ޕީއެންސީގެ ފަރާތުން ވާދަކުރައްވާ ކެންޑިޑޭޓް، ރައީސް އަބްދުالله ޔާމީން އަބްދުލްގައްޔޫމްގެ ކެމްޕެއިން ޖަލްސާއެއް މިރޭ ބޭއްވުމަށް ހަމަޖެހިއްޖެއެވެ.

ޕީޕީއެމް، ޕީއެންސީ ކޯލިޝަނުން ބުނީ މި ޖަލްސާ އޮންނާނީ މިރޭ 20:45 ގައި މާލޭ އާޓިފިޝަލް ބީޗުގަ އެވެ. އެ ޕާޓީން ވަނީ އެ ޖަލްސާގެ ދައުވަތު އެންމެހާ ފަރާތްތަކަށް އަރުވާފައެވެ. 

ކުރިއަށް އޮތް ރިޔާސީ އިންތިޚާބަށް ޕީޕީއެމުން ރަސްމީކޮށް ބޭނުންކުރާ ސްލޯގަން އެއްކަމަށް ކަނޑައަޅާފައި ވަނީ "ދިވެހިންގެ ރާއްޖެ" އެވެ. ޕީޕިއެމުން ބުނީ އެ ޝިޔާރުން ދޭހަކޮށްދެނީ ދިވެހިންގެ އެއްބައިވަންތަ ކަމާއި ގައުމުގެ އިސްތިގްލާލާއި މިނިވަންކަން ކަމަށެވެ. 

ރައީސް ޔާމީންގެ ރިޔާސީ ކެމްޕެއިންގައި، ކެންޑިޑޭޓް ބްރޭންޑިން އަށް ބޭނުން ކުރާނީ "ސްޓްރައިޕްޑް ވައި" މާކު ކަމަށްވެސް ޕީޕީއެމުން ބުނެއެވެ. ޕީޕީއެމުން ބުނީ އެ ސިމްބޮލް އިން ރަމްޒުކޮށްދެނީ އެއްބައިވަންތަ ކަމާއި، އުންމީދާއި، ވަރުގަދަކަން ކަމަށެވެ. އަދި ޖުޑިޝަރީގެ ބާރާއި، ގުޅިފައިވާ ޕީއެންސީ ކޯލިޝަން ވެސް އެ ލޯގޯ އިން ރަމްޒުކޮށްދޭކަމަށް ޕީޕީއެމުން ވަނީ ބުނެފައެވެ. 

ޕީޕީއެމްގެ ރިޔާސީ ކެންޑިޑޭޓު ރައީސް ޔާމީން އަބްދުލްގައްޔޫމުގެ ރިޔާސީ ކެންޕޭނު ފަށާ މާލޭގައި ދޮރުން ދޮރަށް ކުރިއަށްގެންދާ ކްމެޕޭނު ހަރަކާތްތައް އެ ޕާޓީން ފަށާފައިވާއިރު، އަތޮޅުތެރޭގައި ރަސްމީކޮށް ކެމްޕޭނު ހަރަކާތްތައްވެސް ވަނީ ފަށާފައެވެ. 

ޕީޕީއެމުން އެ ޕާޓީގެ ރިޔާސީ ކެންޑިޑޭޓު ރައީސް ޔާމިނުގެ ކެމްޕޭނު ރަސްމީކޮށް ފަށައިގެން ކުރިއަށް ގެންދާއިރު، އެމަނިކުފާނަށް އަމަލީގޮތުން ކެމްޕޭނުގައި ބައިވެރިވުމުގެ ފުރުސަތު ލިބިވަޑައި ނުގަތުމަކީ ވަރަށް ބޮޑު ފަޅުކަމެއްގެ ގޮތުގައި އެމަނިކުފާނުގެ ކެމްޕޭނު މެނޭޖަރު ކެޕްޓަން މުޙައްމަދު އަމީނު ވަނީ ސިފަކުރައްވާފަ އެވެ. 

މިވަގުތު އެމަނިކުފާނުގެ މައްޗަށް ކޮށްފައިވާ ޖަލު ހުކުމެއް ތަންފީޒުކުރައްވަމުން ގެންދެވި ނަމަވެސް، ހައިކޯޓު މަރުހަލާއިން ރައީސް ޔާމީން މިނިވަންވެވަޑައިގަންނަވާނެ ކަމުގެ ފުރިހަމަ ޔަގީންކަން އޮތްކަމަށް ކެޕްޓަން އަމީނު ވަނީ ވިދާޅުވެފަ އެވެ.