އިގިރޭސި ޕްރިމިއާ ލީގުގެ އާސެނަލް ކުރިއަށް އޮތް ސީޒަނަށް ތައްޔާރުވުމުގެ ގޮތުން ކުޅުނު ފުރަތަމަ އެކުވެރިކަމުގެ މެޗެއްގައި ޖަރުމަނުގެ ދެވަނަ ޑިވިޝަންގެ ކުލަބެއްކަމަށްވާ ނޫރްންބާގް އާއި ދެކޮޅަށް ކުޅުނު މެޗު 1-1 ގެ ނަތީޖާއަކުން ދެޓީމް އެއްވަރުވެއްޖެ އެވެ.

ނޫރްންބާގް ދަނޑުގައި ރޭ ކުޅެވުނު މި މެޗުގައި ފުރަތަމަ ލަނޑުޖަހައި ކުރިހޯދީ އާސެނަލް އިންނެވެ. މިލަނޑު ފުރަތަމަ ހާފުގެ 7 ވަނަ މިނެޓުގައި ކާމިޔާބުކޮށްދިނީ އެޓީމުގެ ފޯވާޑް ސަކާ އެވެ. މިއީ އެޓީމުގެ ޑިފެންޑަރު ބެން ވައިޓް ތަނަވަސްކޮށްދިން ފުރުސަތެއްގައި ބޯޅައާއެކު ޕެނަލްޓީ އޭރިއާ ތެެރެއަށް ވަދެ ކައިރީގައި ތިބި ދެ ޑިފެންޑަރުން ކައިރިން ނައްޓާލުމަށް ގޯލުގެ ދުރު ކަނަށް ބޯޅަ އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މި ލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އާސެނަލް ކުރީގައި އޮވެގެންނެވެ.

Advertisement

މެޗުގެ ދެވަަނަ ހާފު އާސެނަލް އިން ފެށި ގިނަ ބަދަލުތަކަކާއެކުގައެވެ. އެގޮތް މިދިޔަ ޖޫން މަހު ޗެލްސީ ދޫކޮށް އެޓީމައި ގުޅުނު ޖަރުމަނުގެ ފޯވާޑް ކައި ހާވަޓްޒް ވެސް މިހާފުގައި ވަނީ ފުރަތަމަ ފަހަރަށް އާސެނަލްގެ ޖާޒީގައި ކުޅެން ނިކުމެފައެވެ.

ނޫރްންބާގް އިން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ 62 ވަނަ މިނެޓުގައި ކާމިޔާބުކޮށްދިނީ އެޓީމުގެ ޖަޕާން ފޯވާޑް ކަންޖީ އޮކުނުކީ އެވެ. މި ލަނޑާއެކު މެޗުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.