ބެޑްމިންޓަން އެކަޑަމީ އޮފް ނައިފަރު ވޫޖުދަށް އައިސް، އެ އެކަޑަމީގެ ކެރިއަރ ޑިވޮލޮޕްމަންޓް ޕްރޮގްރާމް ހިންގަން ފެށުނީ 21 އޮގަސްޓު 2021 ގައެވެ. އަދި ފާއިތުވެދިޔަ ދޮޅު އަހަރެއްހާ ދުވަހުގެ ތެރޭގައި އެ އެކަޑަމީގެ ފަރާތުން މިދާއިރާއަށް ޒުވާން ކުޅުންތެރިން ނެރުމަށްޓަކައި އަންނަނީ ގިނަގުނަ މަސައްކަތްތަކެއް ކުރަމުންނެވެ.

އެގޮތުން މި އަހަރު މުޅި ރާއްޖެއަށް ހުޅުވާލައިގެން ބޭއްވުނު ފުރަތަމަ ބެޑްމިންޓަން އެސޯސިއޭޝަންގެ ޖޫނިއަރ ޗެމްޕިއަންޝިޕްގައި "ބެޑްމިންޓަން އެކަޑަމީ އޮފް ނައިފަރު" ގެ 36 ކުޅުންތެރިއަކު ވަނީ ބައިވެރިވެ، ފަޚުރުވެރި ތާރީޚީ ކާމިޔާބީތަކެއް ހޯދާފައެވެ. 

އެގޮތުން މި މުބާރާތުގައި ބައިވެރިވި އެކަޑަމީގެ ކުޅުންތެރިން ވަނީ ޖުމްލަ 20 މެޑަލް ހޯދާފައެވެ. އޭގެތެރޭގައި 4 ގޯލްޑް މެޑަލާއި 4 ސިލްވާ މެޑަލްގެ އިތުރުން 12 ބްރޯންޒް މެޑަލް ހިމެނެއެވެ. 

އެކުވެނި އިންޑޯ ބެޑްމިންޓަން ހޯލުގައި ޖުލައި 8-12 އަށް ކުރިއަށް ގެދިޔަ މި މުބާރާތުގައި ޖުމްލަ 182 ކުޅުންތެރިން ވާދަކުރިއެވެ. އެއީ ފިރިހެން 110 ކުޅުންތެރިންނާއި އަންހެން 72 ކުޅުންތެރިންނެވެ. މީގެ ތެރޭގައި ބެޑްމިންޓަން އެސޯސިއޭޝަންގެ ޖޫނިއަރ ޕޫލްގެ ކުޅުންތެރިންނާއި ރާއްޖޭގައި ހިންގާ އެކިއެކި އެކަޑަމީ ތަކުގެ އިތުރުން އަމިއްލަ ގޮތުން ވެސް ގިނަ ކުޅުންތެރިންތަކެއް ވަނީ ބައިވެރިވެފަ އެވެ.

މި މުބާރާތުގައި 11 އަހަރުން ދަށް، 13 އަހަރުން ދަށް، 15 އަހަރުން ދަށް، 17 އަހަރުން ދަށުގެ އިތުރުން 19 އަހަރުން ދަށުގެ އުމުރުފުރާ ހިމެނޭގޮތަށް ކޮންމެ އުމުރުފުރާއެއްގައި ވެސް ކުރިއަށް ގެންގޮސްފައިވަނީ ހަތަރު އިވެންޓެވެ. އެއީ ފިރިހެން ސިންގަލްސް، އަންހެން ސިންގަލްސް، ފިރިހެން ޑަބަލްސް އަދި އަންހެން ޑަބަލްސްއެވެ.

މި މުބާރާތުން "ބެޑްމިންޓަން އެކަޑަމީ އޮފް ނައިފަރު" ގެ ކުޅުންތެރިން ހޯދި ކާމިޔާބީ އާއި ބެހޭގޮތުން ވޮއިސް އަށް މައުލޫމާތު ދެމުން އެކަޑަމީގެ ޖެނަރަލް ސެކެޓްރީ ހަސަން އަމާން ބުނީ އެކަޑަމީގެ އަމާޒަކީ ކުރިއަށް އޮތް ތަނުގައި ކުޅުންތެރިންގެ ފެންވަރު އިތުރަށް ރަގަޅުކޮށް ބައިނަލްއަގުވާމީ ފެންވަރުގައި ވާދަކޮށް ކާމިޔާބު ހޯދޭނެ ފެންވަރުގެ ކުޅުންތެރިންތަކެއް އުފެއްދުމެވެ. އެކަމަށްޓަކައި އަޅުގަނޑުމެން މަސައްކަތް ކުރަމުން މި އަންނަނީ އަމާން ބުންޏެވެ.

އިތުރަށް ވާހަކަ ދައްކަމުން އަމާން ބުނީ މި މުބާރާތުގެ ކުރިން އެ އެކަޑަމީގެ 14 ކުޅުންތެރިއަކު 30 ޖޫން އިން ފެށިގެން 7 ޖުލައި އާއި ހަމައަށް ލަންކާގައި ތަމްރީނު ހެދުމުގެ ފުރުސަތު ހޯދައިދިން ކަމަށާއި އަދި މި ދަތުރުގައި ރަގަޅު މެޗުތަކެއް އެކުޅުންތެރިންނަށް ކުޅެލަން ލިބިގެން ދިޔަ ކަމަށެވެ.

ކުރިއަށް އޮތްތަނުގައި ވެސް މިފަދަ ގިނަ ފުރުސަތުތަކެއް އެކަޑަމީގެ ކުޅުންތެރިންނަށް ހޯދައިދީ ކުޅުންތެރިންގެ ޑިވޮލޮޕްމަންޓަށް ގިނަ ކަންތައްތަކެއް ރާވަމުން އަންނަކަމަށާއި މިވީ ކުޑަ ދުވަސްކޮޅުގެ ތެރޭގައި "ބެޑްމިންޓަން އެކަޑަމީ އޮފް ނައިފަރު" ގެ ފަރާތުން ކުރަމުން އަންނަ ބުރަ މަސައްކަތާއެކު އެކަޑަމީގެ މުސްތަގުބަލް ފެންނަނީ ވަރަށް އުޖާލާކޮށް ކަމަށް އަމާން ބުންޏެވެ.