ސައުދީ ޕްރޮފެޝަނަލް ލީގުގެ އަލް ނަސްރަށް، ކުރިން އޮތް ދެ ޓްރާންސްފާ މާކެޓްގައި ކުޅުންތެރިން ނުގެނެވޭގޮތަށް ދުނިޔޭގެ ފުޓްބޯޅައިގެ މައި އިދާރާ، ފީފާ އިން އެ ކްލަބަށް އަދަބުދީފި އެވެ.

ފީފާއިން އަލް ނަސްރަށް އަދަބު ދީފައި މިވަނީ 2018 ވަނަ އަހަރު އިނގިރޭސި ކްލަބް ލެސްޓާ ސިޓިއަށް ކުޅެމުންދިޔަ ނައިޖީރިއާގެ ފޯވާޑް އަހުމަދު މޫސާ އެކުލަބުން ގަތްއަގުގެ ދައްކަންޖެހޭ ފައިސާގެ ބާކީ އަދަދެއް އޮތުމުންނެވެ.

އަހުމަދު މޫސާ، ލެސްޓާ ދޫކޮށް ދާއިމީ އެއްބަސްވުމެއްގައި އަލް ނަސްރަށް ބަދަލުވީ 2018 ވަނަ އަހަރު އޮގަސްޓް މަހު އެވެ. އޭރު އޭނާ ކުޅެމުން ދިޔައީ ލޯނު އެއްބަސްވުމެއްގެ ދަށުން ރަޝިޔާގެ ސީއެސްކޭއޭ މޮސްކޯ އަށެވެ.

ލެސްޓާ އަށް އަލް ނަސްރުން ނުދައްކާ އޮތީ ފަސް ލައްކަ ޑޮލަރެވެ. ފީފާ އިން އަލް ނަސްރަށް އަދަބުދިނީ އެ ފައިސާ ހޯދުމަށް ލެސްޓާ އިން ފީފާއަށް ހުށަހެޅުމުންނެވެ.

ދެ ސީޒަނަށް ފަހު އަލް ނަސްރު ދޫކޮށްލި އުމުރުން 30، އަހަރުގެ މޫސާ ވަނީ އެޓީމަށް ކުޅެދިން 62 މެޗުގައި 14 ލަނޑު ކާމިޔާބުކޮށްދީފައެވެ. އަދި މިހާރު މޫސާ ކުޅެމުން އަންނަނީ ތުރުކީ ލީގުގަ އެވެ.

ސައުދީ ޕްރޮފެޝަނަލް ލީގު ދުނިޔޭގެ ސަމާލުކަން ހޯދީ މިދިޔަ އަހަރު އޮތް ފީފާ ވޯލްޑް ކަޕަށް ފަހު ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯގެ ސޮއި އަލް ނަސްރުން ހޯދުމާއެކުގައެވެ. އަދި ކުރިން އޮތް ސީޒަނަށް ރޮނާލްޑޯގެ ފަހަތުން ސައުދީ ޕްރޮފެޝަނަލް ލީގަށް ޔޫރަޕުގެ މަޝްހޫރު ގިނަ ތަރިންތަކެއް އަންނަނީ ބަދަލުވަމުންނެވެ.

އަލް ނަސްރުގެ ސަސްޕެންޝަނާއި ބެހޭގޮތުން ފީފާ އިން ބުނެފައި ވަނީ އަލް ނަސްރުން އެ ފައިސާ ދެއްކުމާ އެކު ކުޅުންތެރިން ގެންނަން ކުރި ސަސްޕެންޝަން އުވާލާނެ ކަމަށެވެ.

މިދިޔަ ސީޒަނުގައި ސައުދީ ޕްރޯ ލީގުގެ ދެ ވަނަ ހޯދި އަލް ނަސްރު ވަނީ ކުރިއަށް އޮތް ސީޒަނަށް ޓީމު ވަރުގަދަ ކުރުމުގެގޮތުން މިހާރު ކުރިއަށްދާ ޓްރާންސްފާ ބާޒާރުގައި ކްރޮއޭޝިއާގެ މާސެލޯ ބްރޮޒޮވިޗް ގެނެސްފަ އެވެ. އަދި، ޗެލްސީގެ މޮރޮކޯ ފޯވާޑް ހަކީމް ޒިޔެކް ގެންނަން ވެސް އެޓީމުން އަންނަނީ މަސައްކަތް ކުރަމުންނެވެ.