Advertisement

ސާފްޗެމްޕިއަންޝިޕަށް ފަހު ކުޅުނު ފުރަތަމަ މެޗުގައި މާޒިޔާއަށް ފަސޭހަ މޮޅެއް!

15 Jul 2023 | 06:04
އަލީ ފާސިރު (ސެންޓޭ) ޓީސީ ކޮޅަށް ލަނޑުޖެހުމަށް ފަހު އުފާފާޅުކުރަނީ؛.. ފޮޓޯ/ ދިވެހި ޕްރެމިއާ ލީގު ފޭސްބުކް ޕޭޖުން

ސާފްޗެމްޕިއަންޝިޕް ފުޓްބޯޅަ މުބާރާތައްފަހު ދިވެހި ޕްރެމިއާ ލީގުގެ ކުޅުން އަލުން ފަށާފައިވާއިރު، ލީގުގައި ރޭކުޅެވުނު މެޗު ޓީސީ ސްޕޯޓްސް ކްލަބާއި ވާދަކޮށް 6-0 ގެ ތަފާތުބޮޑު ނަތީޖާއަކުން މާޒިޔާ އިން ކާމިޔާބުކޮށްފިއެވެ.

ރޭގެ ނެޗުގެ ފުރަތަމަ ހާފުގައި މާޒިޔާގެ ފޯވާޑް ހަމްޒާ މުހައްމަދު (ހަމްޕު) ތިން ލަނޑު ކާމިޔާބުކޮށް ހެޓްރިކް ހެދިއިރު، އެޓީމުގެ ފުރަތަަމަ ލަނޑު  ހަމްޒާ ކާމިޔާބުކޮށްދިނީ ފުރަތަމަ ހާފުގެ 22 ވަނަ މިނެޓުގައި އެޓީމަށް ލިބުނު ޕެނަލްޓީއަކުންނެވެ.

މާޒިއާގެ ދެވަނަ ލަނޑު ފުރަތަމަ ހާފުގެ 42 ވަނަ މިނެޓުގައި ހަމްޒާ ކާމިޔާބުކުރިއިރު މި މެޗުގައި އޭގެ ހެޓްރިކް ފުރިހަމަކުރި ލަނޑު އޭނާ ކާމިޔާބުކުރީ ފުރަތަމަ ހާފުގެ އެންމެ ފަހު މިނެޓްގައެވެ. މިއާއެކު ފުރަތަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން މާޒިޔާ ކުރީގައި އޮވެގެންނެވެ.

Advertisement

މެޗުގެ ދެވަަނަ ހާފު ފެށިގެން ދެވަނަ މިނެޓުގައި މާޒިޔާގެ ހަތަރުވަނަ ލަނޑު ކާމިޔާބުކޮށްދިނީ އެޓީމުގެ އިބްރާހިމް އައިސަމް އެވެ. މިއީ އެޓީމުގެ ކުޅުންތެރިއަކު މުޅިން ހުސްކޮށްލާފައި ޖައްސާލި ބޯޅައެއް ޓީސީ ލީގުގެ ގޯލު އޭރިޔާ ތެރޭގައި މުޅިން ހުސްކޮށް ހުރެ ގޯލުގެ ތެރެއަށް ބޯޅަ ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މި މެޗުގައި މާޒިޔާގެ ފަސްވަނަ ލަނޑު ކާމިޔާބުކޮށްދިނީ އަލީ ފާސިރު ސެންޓޭ އެވެ. މިއީ އެޓީމުގެ ހަމްޒާ މުހައްމަދު (ހަމްޕު) ތަނަވަސްކޮށްދިން ފުރުސަތެއްގައި ބޯޅައާއެކު ޓީސީގެ ގޯލްއޭރިއާ ތެރެއަށް ވަދެ ކައިރީގައި ހުރި ޑިފެންޑަރު ކައިރިން ނައްޓާލުމަށް ފަހު ގޯލުގެ ތެރެއަށް ބޯޅަ ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މުޅި މެޗުގައިވެސް ޓީސީގެ ފަރާތުން ވަރަށް އާދައިގެ ކުޅުމެއް ފެނިގެންދިޔަ މިމެޗުގައި މާޒިޔާ އިން ކާމިޔާބުކުރި ހަވަނަ ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ ހަސަން ރާއިފް އެވެ. މި ލަނޑާއެކު މެޗުގެ ކުޅުން ނިމިގެންދިޔައީ 6-0 ގެ ނަތީޖާއަކުން މާޒިޔާ ކުރީގައި އޮވެގެންނެވެ.

މި މެޗުގެ މޭން އޮފް ދަ މެޗަކަށް ހޮވުނީ މާޒިޔާ އަށް މި މެޗުގައި ތިން ލަނޑު ކާމިޔާބުކޮށް ހެޓްރިކް ހެދި ހަމްޒާ މުހައްމަދު އެވެ.

މި މެޗުން ލިބުނު ތިން ޕޮއިންޓާއެކު ހަތަރު މެޗުން މާޒިޔާއަށް 12 ޕޮއިންޓް ލިބިފައިވާއިރު، މި މެޗުން ބަލިވި ޓީސީ ސްޕޯޓްސް ކްލަބަށް ހަތަރު މެޗުން ލިބިފައިވަނީ 4 ޕޮއިންޓެވެ.

އިއްޔެ ހަވީރު ލީގުގެ ކުޅުން އަލުން ފެށި މެޗުގައި ބުރު ސްޕޯޓްސް ކުލަބާއި ގުރީން ސްޓްރީޓް ވާދަކުރި މެޗު 3-0 ގެ ނަތީޖާއަކުން ކާމިޔާބުކުރީ ބުރު ސްޕޯޓްސް ކްލަބެވެ.

Advertisement

ކޮމެންޓް