ކެޕްޓަން ކްރިސްޓިއާނޯ ރޮނާލްޑޯ އާއި މިހާރު ކުރިއަށްދާ ޓްރާންސްފާ މާކެޓުގައި ޓީމާއި އަލަށް ގުޅުނު ކްރޮއޭޝިޔާގެ މިޑްފީލްޑަރު މާސެލޯ ބްރޮޒޮވިޗް އާއި ނުލައި އަލް ނަސްރުން ކުޅުނު ދެ ވަނަ މެޗު ވެސް އެޓީމުން ކާމިޔާބުކޮށްފިއެވެ.

ކުރިއަށް އޮތް ސީޒަނަށް ތައްޔާރުވުމުގެ ގޮތުން މިގާރު އެޓީމުން ޕޯޗުގަލްގައި ކުރިއަށް ގެންދާ ޓްރޭނިންގ ކޭމްޕުގެ ތެރެއިން އެގައުމުގެ ދެވަނަ ޑިވިޝަންގެ ކުލަބެއްކަމަށްވާ އެފްސީ ފަރެންސް އާއި ދެކޮޅަށް މިރޭ ކުޅުނު މެޗު އެޓީމުން ކާމިޔާބުކުރީ 5-1 ގެ ނަތީޖާއަކުންނެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ އަލް ނަސްރު އިންނެވެ. މި ލަނޑު ފުރަތަމަ ހާފުގެ ފެށިގެން ހަތަރުވަނަ މިނެޓުގައި ކާމިޔާބުކޮށްދިނީ ބްރެޒިލްގެ މިޑްފީލްޑަރު އެންޑަސަން ޓަލިސްކާ އެވެ. ނަމަވެސް އޭގެ ފަސް މިނެޓު ފަހުން އެފްސީ ފަރެންސް އިން ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކުރި އެވެ.

މިލަނޑު އެޓީމަށް ކާމިޔާބުކޮށްދިނީ މާރކޯ މެޓިއަސް އެވެ. ނަމަވެސް ފުރަތަމަ ހާފު ނިމުމުގެ ކުރިން އަލް ނަސްރުގެ އިން ދެވަނަ ފަހަރަށް މެޗުގެ ލީޑު ހޯދިއެވެ. ފުރަތަަމަ ހާފުގެ 23 ވަނަ މިނެޓުގައި މި ލަނޑު ވެސް އެޓީމަށް ކާމިޔާބުކޮށްދިނީ ފުރަތަމަ ލަނޑުވެސް ކާމިޔާބުކޮށްދިން އެންޑަސަން ޓަލިސްކާ އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-1 ގެ ނަތީޖާއަކުން އަލް ނަސްރު ކުރީގައި އޮވެގެންނެވެ.

ނެޗުގެ ދެވަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މި މެޗުގައި އަލް ނަސްރުގެ ތިންވަނަ ލަނޑު ފަހުހާފުގެ 74 ވަނަ މިނެޓުގައި ކާމިޔާބުކޮށްދިނީ ފޯވާޑް ޚާލިދު އަލް ޣަންނާން އެވެ. އަދި މި މެޗުގައި އެޓީމުން ކާމިޔާބުކުރި ފަހު ދެ ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އަލް ފައްތާހު އާއި މުހައްމަދު އަހުމަދު ޔަހުޔާ ސަހްލޫލީ އެވެ. މިއާއެކު މެޗުގެ ކުޅުން ނިމިގެންދިޔައީ 5-1 ގެ ނަތީޖާއަކުން އަލް ނަސްރު ކުރީގައި އޮވެގެންނެވެ.

ޗުއްޓީއަށް ފަހު އަލް ނަސްރުގެ ކެޕްޓަން ކްރިސްޓިއާނޯ ރޮނާލްޑޯ އާއި އެޓީމާއި އަލަށް ގުޅުނު ކްރޮއޭޝިޔާގެ މިޑްފީލްޑަރު މާސެލޯ ބްރޮޒޮވިޗް ޓީމުގެ ފަރިތަކުރުންތަކުގައި ބައިވެރިވާން ފަށާފައި ވީ ނަމަވެސް މިރޭގެ މެޗުގައި އެދެ ކުޅުންތެރިން ކުޅެފައެއް ނުވެއެވެ.

ނަމަވެސް މި މަހުގެ 18 ވަނަ ދުވަހުގެ ރޭ ސެލްޓަ ވީގޯ އާއި ދެކޮޅަށް އަލް ނަސްރު ކުޅޭ މެޗުގައި މި ދެކުޅުންތެރިން ފެނުމުގެ ފުރުސަތު ބޮޑު ކަމުގައި މީޑިއާ ރިޕޯޓްތައް ބުނެއެވެ.