ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ރިޔާސީ ކެމްޕޭނަށް މ އަތޮަޅަށް ދަތުރުފުޅު ފައްޓަވައިފި އެވެ. 

މި ދަތުރުފުޅުގައި އެންމެ ފުރަތަމަ މަންޒިލެއްގެ ގޮތުގައި ވަޑައިގެންފައިވަނީ މ ކޮޅުފުއްޓަށެވެ.

އެ ރަށަށް ވަޑައިގެން ރައީސް ޞާލިހުވަނީ ރައްޔިތުންނާއި ބައްދަލުކުރެއްވުމަށް ޖަގަހަ ޖަލްސާއެއް ވެސް ބާއްވާފަ އެވެ. އަދި އެމަނިކުފާނަށް ދެވަނަ ދައުރެއް ރައްޔިތުން ދެއްވައިފި ނަމަ ކޮޅުފުށީގެ ރައްޔިތުންނަށް ކޮށްދެއްވާނެ ބައެއް ކަންކަން ވެސް ހާމަކުރައްވާފަ އެވެ. 

ރައީސް ވިދާޅުވީ ކޮޅުފުއްޓަކީ ސުނާމީ ކާރިސާގައި ވަރަށް ބޮޑަށް ހަލާކުވި ރަށެއް ކަމަށެވެ. އެހެން ނަމަވެސް ރަށުގެ ރައްޔިތުން ރަށް ދޫކޮށް ދާން ބޭނުން ނުވާ ކަމަށާއި، ރައްޔިތުން ބޭނުންވަނީ ރަށުގައި ތިބެގެން އަސާސީ ޚިދުމަތްތައް ލިބޭނެ އިންތިޒާމުތައް ހަމަޖެހިގެން ދިއުންކަމަށް ރައީސް ޞާލިހު ވިދާޅުވި އެވެ. 

އެކަން ފާހަގަކުރައްވާ އެމަނިކުފާނު ވިދާޅުވީ ކޮޅުފުށީ ގިރާ ސަރަހައްދު ހިމާޔަތްކުރުމުގެ ފުރަތަމަ ފިޔަވަހި މި ސަރުކާރުން ނިންމާފައިވާނެ ކަމަށެވެ. އަދި ދެވަނަ ދައުރެއް ލިބިވަޑައިގެންފި ނަމަ ދެވަނަ ފިޔަވަހީގެ މަސައްކަތް ފަށާ، މިޅު ރަށް ވަށާ ތޮށި ޖަހާނެކަމަށް ރައީސް ޞާލިހު ވަނީ ވައުދުވެވަޑައިގެންފަ އެވެ. 

ރައީސް ޞާލިހު އިތުރަށް ވިދާޅުވީ ކޮޅުފުށީގައި 100 ހައުސިން ޔުނިޓު އެޅުމުގެ މަސައްކަތް މި ސަރުކާރުން ވާނީ ފަށާފައި ކަމަށެވެ. އަދި ކުރިއަށް އޮތް ދައުރުގެ ތެރޭގައި އޭގެ ތެރެއަށް އިތުރު 50 ހައުސިން ޔުނިޓު އިތުރުކޮށްދެއްވާނެ ކަމަށް ރައީސް ވަނީ ވައުދުވެވަޑައިގެންފަ އެވެ. 

ރައީސް ޞާލިހު ވިދާޅުވީ އެމަނިކުފާނުގެ މި ދައުރުގައި ކޮޅުފުށީގައި ފެނާއި ނަރުދަމާގެ ނިޒާމު ގާއިމްކޮށްދެވިފައި ވާ ކަމަށެވެ. އަދި ކުރިއަށް އޮތް ދައުރުގައި މަގުހަދާ ރަށްތަކުގެ ތެރޭގައި ކޮޅުފުށި ހިމެނިގެންދާނެކަމުގެ ޔަގީންކަން ދެއްވާކަމަށެވެ. 

ރައީސް ޞާލިހު ކޮޅުފުއްޓަށް ވަޑައިގެން ވަނީ ކޮޅުފުށީ ސުކޫލުގައި އިމާރާތްކުރާ 8 ކްލާސްރޫމާއި މަލްޓިޕާޕަސް ހޯލުގެ އިމާރާތް ރަސްމީކޮށް ހުޅުވާދެއްވާފަ އެވެ. އަދި މި ސަރުކާރުން ވަނީ ކޮޅުފުށީގައި ފެނުގެ ނިޒާމު ގާއިމްކޮށްދީފަ އެވެ. ރައީސްގެ މި ދަތުރުފުޅުގައި ވަނީ އެކަން ވެސް ރަސްމީކޮށް ފައްޓަވާދެއްވާފަ އެވެ.