ލ ފޮނަދޫގައި ހުންނަ އެމްޑީޕީ ޖަގަހައަށް ވިޔަފާރި އުސޫލުން ބިލްކުރާނެ ކަމަށްބުނި ފެނަކަ މުވައްޒަފަކު ސަސްޕެންޑްކޮށް ނޯޓިސް ފޮނުވައިފިއެވެ.
މިމައްސަލައިގައި ސަސްޕެންޑްކުރި މުވައްޒަފު ފޮނަދޫ ޒަމާނީ ވިލާ އަބުދުލް މުހުސިން އަލީއަށް ފޮނުވައިފައިވާ ނޯޓިސްގައި ބުނެފައިވަނީ ބަލަމުންދާ މައްސަލައަކާ ގުޅިގެން މުސާރަ ނުލިބޭގޮތަށް 15 ދުވަހަށް ސަސްޕެންޑްކޮށްފައިވާ ކަމަށެވެ.
ފެނަކައިގެ ޑިރެކްޓަރ އުސައިދު ހުސެއިން ސޮއިކޮށް މުހުސިނަށް ފޮނުވައިފައިވާ ސިޓީގައި ބުނެފައިވަނީ އެ ކުންފުނީގެ ހިއުމަން ރިސޯސަސް ޑިޕާޓުމަންޓުން މުހުސިނު އާއި ގުޅޭ މައްސަލައެއް ތަހުގީގު ކުރަމުންދާ ކަމަށެވެ.
އަދި އެ މައްސަލައިގެ ތަހުގީގުގައި އިތުރަށް ބަލަންޖެހޭ ކަންކަން ހުރުމުން ފެނަކައިގެ ޤަވާއިދުގެ 40 ވަނަ މާއްދާހެ (ހ) އަށް ރިއާޔަތްކޮށް 13 ޖުލައި 2023 އިން ފެށިގެން 15 ދުވަގެ މުއްދަތަށް މުސާރަ ނުލިބޭ ގޮތަށް ވަގުތީގޮތުން އޮފީހުގެ މަސައްކަތަށް ނިކުތުން މަނާ ކުރެވިފައިވާ ކަމަށެވެ.
މުހުސިން އެމްޑީޕީގެ ފޮނަދޫ ޖަގަހައަށް ވިޔަފާރި އުސޫލުން ކަރަންޓް ބިލު ކުރާނެކަން ފޮނުވި ސިޓީގައި ސޮއިކޮށްފައިވަނީ ވަގުތީ ގޮތުން ޑިޕާޓްމަންޓާއި ހަވާލުވެ ހުރުމުގެ ސަބަބުންނެވެ.
މިކަމާއި ގުޅިގެން ގިނަބަޔަކު ދަނީ ސަރުކާރަށް ފާޑުކިޔަމުންނެވެ. ވަޒީފާގެ ބިރު ދެއްކުން ނިމުމަކަށް ގެނައުމަށް ވަކާލާތު ކުރަމުންދިޔަ މިސަރުކާރުންވެސް މިފަދަ ކަންކަން އިތުރުވަމުން ދިޔުމާއެކު ގިނަ ބަޔަކު ދަނީ މި މައްސަލާގައި ސަރުކަރަށް ފާޑުކިޔަމުންނެވެ.
Advertisement
This content is created and paid for by advertisers and does not involve Voice Journalists
