ވެރިކަމަށް ވަޑައިގެންނެވިއިރު ފުލުހުންގެ މުއައްސަސާ އޮތީ ސިޔާސީ ބާރުވެރިކަމެއްގެ ތެރޭގައި ކަމަށާއި، މިއަދު އެ މުއައްސަސާއަށް އޮތް ހުރިހާ ސިޔާސީ ނުފޫޒެއް ނައްތާލެވިއްޖެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ.
ރައީސް ޞާލިހު މިފަދައިން ވިދާޅުވެފައިވަނީ މ އަތޮޅަށް އެމަނިކުފާނު ކުރައްވާ ރިޔާސީ ކެމްޕޭނު ދަތުރުފުޅުގައި އެ އަތޮޅު ކޮޅުފުއްޓަށް ވަޑައިގެން ރައްޔިތުންނާއި މުޚާތަބުކުރައްވާ ވާހަކަފުޅު ދައްކަވަމުން ނެވެ.
ރައީސް ޞާލިހު ވިދާޅުވީ ކުރީ ސަރުކާރުގައި ފުލުހުންގެ މުއައްސަސާ ވަރަށް ބޮޑަށް ސިޔާސީކޮށްފައިވާ ކަމަށެވެ. އަދި ސިޔާސީ ވެރިންނަށް ފިޔަވަޅު އެޅުމަށް އެ މުއައްސަސާގެ ބޭނުން ނަހަމަގޮތުގައި ހިފަމުން ގޮސްފައިވާކަމަށެވެ.
އެގޮތުން ސަރުކާރުން ބުނާ ގޮތަށް ވަކި މީހަކަށް ފިޔަވަޅު ނާޅާނަމަ ޕޮލިސް ކޮމިޝަނަށް މަޤާމުގައި ވެސް ނުހުރެވޭކަމަށާއި، އެ ދައުރުގައި ފަސް ފަހަރަށް ޕޮލިސް ކޮމިޝަނަރު ބަދަލުކުރެއްވި ކަމަށް ރައީސް ޞާލިހު ވިދާޅުވި އެވެ. އަދި އެކަމުގެ ސަބަބުން އެ މުއައްސަސާ ހިންގުމަށް ބޮޑެތި ގޮންޖެހުންތަކާއި ކުރިމަތިލާން ޖެހުނުކަމަށް ރައީސް ވިދާޅުވި އެވެ.
"ޕޮލިސް ކޮމިޝަނަރު 5 ޕޮލިސް ކޮމިޝަނަރުން ބަދަލުވެގެން ދިޔަ. އަހަރަކަށް މީހަކު. އަހަރަކަށް މީހަކު. އަހަރަކަށް މީހަކު. ތަނެއް ހިނގާނީ ކިހެނެއްތޯ؟ ސިޔާސީ ބޭނުމެއްގައި ވަކި މީހަކާއި ދޭތެރޭގައި ވަކިކަމެއް ކުރަން ބުނީމާ ނުކުރުން.. ގެއަށް! ދެން ހުންނަ މީހާ ލަނީ. މިގޮތުން އެބަހުރި ގާތްގަނޑަކަށް ހަތް ދުވަހު ތެރޭ ޕޮލިސް ކޮމިޝަނަރުން ބަދަލުވެފައި"
ރައީސް ޞާލިހު
އެކަން ކަން ފާހަގަކުރައްވާ ރައީސް ވިދާޅުވީ ކުރިން ފުލުހުންގެ މުއައްސަސާއަށް އޮތް އެ ނުފޫޒު މިހާރު ނައްތާލެވިއްޖެ ކަމަށެވެ. އަދި އެ މުއައްސަސާއަކީ މިނިވަންކަމާއެކު ހިންގާ މުއައްސަސާއަކަށް މިހާރު ހެދިފައިވާ ކަމަށެވެ.
އެކަން ކުރުމުގައި ހޯމް މިނިސްޓަރު އިމްރާނު އަބްދުﷲގެ ބޮޑު ދައުރެއް ވެސް އޮތްކަމަށާއި، އެކަމަށްޓަކައި މިނިސްޓަރު އިމްރާނަށް ތައުރީފު ހައްގުކަމަށް ރައީސް ވިދާޅުވި އެވެ.
މިހާރު ޕޮލިސް ކޮމިޝަނަރުގެ މަޤާމުގައި ހުންނެވީ ރައީސް ޞާލިހާއި އާއިލީގޮތުން ގުުޅުން އޮންނަ ބޭފުޅެކެވެ.
Advertisement
This content is created and paid for by advertisers and does not involve Voice Journalists
