ވެރިކަމުގެ ދެވަނަ ދައުރެއް ލިބިވަޑައިގެންފިކަމަށް ވާނަމަ މ. ކޮޅުފުށީ ކައިރީގައި ޓުއަރިސްޓު ރިސޯޓެއް އަޅުއްވާދެއްވާނެ ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ.
ރައީސުލްޖުމްހޫރިއްޔާ މިފަދައިން ވައުފުވެވަޑައިގެންފައި ވަނީ އެމަނިކުފާނު މ އަތޮޅަށް ކުރައްވާ ކެމްޕޭނު ދަތުރުފުޅުގައި އެ އަތޮޅު ކޮޅުފުއްޓަށް ވަޑައިގެން ދެވަނަ ދައުރެއްގައި އެ ރަށަށް ކޮށްދެއްވާނެ ކަންކަން ހާމަކުރައްވަމުން ނެވެ.
ރައީސް ޞާލިހު ވިދާޅުވީ ކޮޅުފުށީ ކައިރީގައި ރިސޯޓެއް ހެދުމަށް ކުރީ ސަރުކާރުން 1 ރަށުގެ ގޮތުގައި 3 ރަށް ބަޔަކަށް ދޫކޮށްފައިވާއިރު، މިހާތަނަށް އެއިން އެއްވެސް ރަށެއްގައި ރިސޯޓު ހެދުމުގެ މަސައްކަތް ކުރިއަށް ނުދާކަމަށެވެ.
"މި ރަށު ކައިރިން ރިސޯޓު ހެދުމަށްޓަކައި ކުރީ ދައުރުގައި ވަކި ފަރާތަކަށް އެއް ރަށުގެ ގޮތުގައި 3ރަށް ދީފައި އެބޮތް. އަދިއަދަށް ދާންދެން ވެސް އެ ރަށުގައި އެއްވެސް މަސައްކަތެއް ނުކުރޭ"
ރައީސް ޞާލިހު
ކޮޅުފުއްޓަކީ މީގެ ކުރިން މަސްވެރިކަން ކުރަމުން އައި ރަށެއް ނަމަވެސް، އެ މަސައްކަތް ރަށުގައި ހީނާރުވެފައިވާއިރު ޒުވާނުން އަދާކުރާނެ ވަޒީފާތަކެއް ހޯދައިދޭން ޖެހޭކަމަށާއި، އެގޮތުން ވެރިކަމުގެ ދެވަނަ ދައުރެއް ލިބިވަޑައިގެންފި ނަމަ ކޮޅުފުށީ ކައިރީގައި ރިސޯޓެއް ތަރައްގީ ކުރައްވާނެކަމަށް ރައީސް ޞާލިހު ވިދާޅުވި އެވެ.
"އިރާދަކުރެއްވިއްޔާ މިރަށުގެ ރައްޔިތުން އެދޭގޮތަށް މިރަށު ކައިރިން ރިސޯޓު ތަރައްގީކުރުމުގެ މަޝްރޫއެއް އަޅުގަނޑުމެން ހިންގަދޭނަން"
ރައީސް ޞާލިހު
ރިސޯޓު ތަރައްގީ ކުރުމުގެ އިތުރުން ވެސް ރައީސް ޞާލިހު ވަނީ ދެވަނަ ދައުރެއް ލިބިއްޖެނަމަ ކޮޅުފުށީގައި މިހާރު ކުރިއަށްދާ 100 ހައުސިން ޔުނިޓުގެ މަޝްރޫއަށް އިތުރު 50 ޔުނިޓު އިތުރުކޮށްދެއްވާނެކަމަށް ވައުދުވެވަޑައިގެންފަ އެވެ. އަދި އެރަށުގެ މަގުތައް ޒަމާނީ ފެންވަރަކަށް ހެދުމަށް ވެސް ރައީސް ވަނީ ވައުދުވެލައްވާފަ އެވެ.
Advertisement
This content is created and paid for by advertisers and does not involve Voice Journalists
