ރައީސް އިބްރާހިމް މުޙައްމަދު ޞާލިޙް މ ކޮޅުފުށީގައި ދެ މަޝްރޫޢެއް އިފްތިތާޙް ކޮށްދެއްވަވައިފިއެވެ.

ރިޔާސީ އިންތިޚާބުގެ ކެމްޕޭނަށް ކުރައްވަމުން ގެންދަވާ ދަތުރުފުޅުގެ ތެރެއިން ރައީސް ޞާލިޙްވަނީ ކޮޅުފުށީ ފެނުގެ ނިޒާމް އިފްތިތާޙް ކޮށްދެއްވައިފައެވެ. އަދި  އެރަށު ގޮނޑުދޮށް ހިމާޔަތްކުރުމުގެ މަސައްކަތް ނިމުންވެސް ވަނީ ފާހަގަ ކުރައްވައިފައެވެ.

 މީގެ އިތުރުން މ. އަތޮޅު މަދަރުސާގެ މަލްޓި ޕާޕޯސް ހޯލާއި އާ އަށް ކްލާސް ރޫމްގެ އިމާރާތް ހުޅުއްވައިދެއްވައިފައިވެއެވެ.

Advertisement

ރައީސް އޮފީހުން ބުނެފައިވަނީ ރައީސް ޞާލިޙް މ އަތޮޅަށާއި ވ އަތޮޅަށް ކުރައްވަމުންމިގެންދަވާ ދަތުރުފުޅުގައި އެކިރަށްރަށުގައި ނިމިފައިހުރި މަޝްރޫޢޫތައް އިފްތިތާޙް ކޮށްދެއްވާނެ ކަމަށެވެ.

ރައީސް ޞާލިޙް ކުރައްވަމުންގެންދަވާ 3 ދުވަހުގެ މިދަތުރުފުޅުގައި މ. ކޮޅުފުށި، ނާލާފުށި، މުލި އަދި މުލަކަށް ވަޑައިގަތުމަށް ވަނީ ހަމަޖެހިފައެވެ. 

މ. އަތޮޅަށް މިއަދު ފެއްޓެވި ކެމްޕޭން ދަތުރުފުޅު ނިންމަވާލެއްވުމަށް ފަހު ރިޔާސީ އިންތިޚާބުގެ ކެމްޕޭންގައި ރައީސް ޞާލިހު ދެން ވަޑައިގަންނަވާނީ ވ. އަތޮޅަށެވެ.

ވ. އަތޮޅަށް ރައީސް ކުރައްވާ ދަތުރުފުޅުގައި ވ. ރަކީދޫ، ކެޔޮދޫ، ފެލިދޫ، ތިނަދޫ އަދި ފުލިދޫއަށް ވަޑައިގަތުމަށް ވަނީ ހަމަޖެހިފަ އެވެ.

ރައީސް އިންތިޚާބުގެ ކެމްޕޭންގައި ރައީސް ޞާލިޙް މިދިޔަ ހަފްތާގައި ވަނީ ށ. އަދި ކ. އަތޮޅުގެ ބައެއް ރަށްރަށަށް ވަޑައިގެންފަ އެވެ..