ދިވެހި ޕްރެމިއާ ލީގުގައި މިއަދު ހަވީރު ސްޕަރ ޔުނައިޓެޑް ސްޕޯޓްސް އާއި ކުލަބު އީގަލްސް ވާދަކުރި މެޗު 7-3 ގެ ނަތީޖާއަކުން ކުލަބު އީގަލްސް އިން ކާމިޔާބުކޮށްފި އެވެ.

ކުލަބް އީގަލްސްގެ ފަރާތުން މޯޅު ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ ކުލަބު އީގަލްސް އިންނެވެ. މިލަނޑު ފުރަތަމަ ހާފު ފެށިގެން ހަ ވަނަ މިނެޓުގައި ކާމިޔާބުކޮށްދިނީ ނިޝާމް މުހައްމަދު އެވެ. އަދި އެޓީމުގެ ދެވަނަ ލަނޑު ފުރަތަމަ ހާފުގެ 19 ވަނަ މިނެޓުގައި ކާމިޔާބުކޮށްދިނީ ބްރެޒިލްގެ ފޯވާޑް އިވާން އެވެ. އަދި އޭގެ ތިން މިނެޓު ފަހުން އެޓީމުގެ އަހުމަދު ރިޒުވާން ވާނީ އިތުރު ލަނޑެއް މެޗުގެ 3-0 އަށް ބަދަލުކޮށްދިފައެވެ.

މިހާފުގައި އީގަލްސް އިން ކާމިޔާބުކުރި ހަތަރުވަނަ ލަނޑު 30 ވަނަ މިނެޓުގައި އިބްރާހިމް މަހުދީ ކާމިޔާބުކޮށްދިންއިރު، އެޓީމުގެ ފަސްވަނަ ލަނޑު 38 ވަނަ މިނެޓުގައި ކާމިޔާބުކޮށްދިނީ ޒައިން ޒަފަރު އެވެ.

Advertisement

މި މެޗުގައި ސްޕަރ ޔުނައިޓެޑް ސްޕޯޓްސް އިން ކާމިޔާބުކުރި ފުރަތަމަ ލަނޑު ފުރަތަމަ ހާފުގެ 41 ވަނަ މިނެޓުގައި އަހުމަދު ހުސާމް ކާމިޔާބުކޮށްދިންއިރު އޭގެ ދެ މިނެޓު ފަހުން އެޓީމުގެ އަލީ ނަސޫހް ވަނީ ލަނޑެއް ކާމިޔާބުކޮށް ނަތީޖާ ފަރަގު ކުޑަކޮށްދީފައެވެ. މި ލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 5-2 ގެ ނަތީޖާއަކުން ކުލަބު އީގަލްސް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ކުލަބް އީގަލްސް އިން އިތުރު ދެ ލަނޑު ކަމިޔާބުކުރި އިރު، އެޓީމުގެ ހަވަނަ ލަނޑު ދެވަނަ ހާފުގެ 60 ވަނަ މިނެޓުގައި ކާމިޔާބުކޮށްދިނީ ބިދޭސީ ކުޅުންތެރިޔާ އިވާން އެވެ. އަދި އެޓީމުގެ ފަހު ލަނޑު ދެވަނަ ހާފުގެ 80 ވަނަ މިނެޓުގައި ކާމިޔާބުކޮށްދިނީ އަހުމަދު ރިޒުވާން އެވެ.

މި މެޗުގައި ސްޕަރ ޔުނައިޓެޑް ސްޕޯޓްސް އިން ކާމިޔާބުކުރި ތިންވަނަ ލަނޑު ދެވަނަ ހާފުގެ އެންމެ ފަހު މިނެޓްގައި ކާމިޔާބުކޮށްދިނީ އިބްރާހިމް އަތީގް އެވެ. މި ލަނޑާއެކު މެޗުގެ ކުޅުން ނިމިގެންދިޔައީ 7-3 ގެ ނަތީޖާއަކުން ކުލަބު އީގަލްސް ކުރީގައި އޮވެގެންނެވެ.

މި މެޗުގެ މޭން އޮފް ދަ މެޗަކަށް ހޮވުނީ ކުލަބް އީގަލްސްގެ އަހުމަދު ރިޒުވާން އެވެ.

މި މެޗުން ލިބުނު ތިން ޕޮއިންޓާއެކު ކުލަބު އީގަލްސް އަށް ހަތަރު މެޗުން 10 ޕޮއިންޓް ލިބިފައިވާއިރު، އެޓީމު މިވަގުތު އޮތީ ލީގު ތާވަލްގެ ދެވަނައިގައެވެ. އަދި މިމެޗުން ބަލިވި ސުޕަރ ޔުނައިޓެޑް ސްޕޯޓްސް އޮތީ ހަ ޕޮއިންޓާއެކު ލީގު ތާވަލުގެ ހަތަރު ވަނައިގައެވެ.