އެމްޑަބްލިއުއެސްސީ ދިވެހި ޕްރެމިއާ ލީގުގެ މިރޭ ކުލަބު ވެލެންސިއާ އާއި ޔުނައިޓެޑް ވިކްޓަރީ ވާދަކުރި މެޗު ވާދަވެރި ކުޅުމަކަށްފަހު 1-0 ގެ ނަތީޖާއަކުން ޔުނައިޓެޑް ވިކްޓަރީ އިން ކާމިޔާބުކޮށްފި އެވެ.

ސާފްޗެމްޕިއަންޝިޕް ފުޓްބޯޅަ މުބާރާތަށް ލީގު މެދުކަނޑާލުމަށް ފަހު މިހަފްތާގައި ލީގުގެ ކުޅުން ފެށިއިރު، މިއީ މި ދެޓީމުގެ ވެސް ފުރަތަަމަ މެޗެވެ. މިރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ވަރަށް ވާދަވެރި ކުޅުމެއް ފެނިގެންދިޔަ އިރު، މި މެޗުގައި ފެނިގެންދިޔަ ހަމައެކަނި ލަނޑު ފުރަތަަމަ ހާފުގެ 33 ވަނަ މިނެޓުގައި ކާމިޔާބުކޮށްދިނީ ޔުނައިޓެޑް ވިކްޓަރީ ގެ ޝަނާން ރަޝީދު އެވެ.

މިއީ އެޓީމުގެ ކުޅުންތެރިއަކު މަތިމަތިން ވެލެންސިއާގެ ޕެނަލްޓީ އޭރިއާ ތެެރެއަށް ހުރަސްކޮށްދިން ބޯޅައެއް ކޮންޓްރޯލް ކުރުމަށް ފަހު ކައިރީގައި ހުރި ކުޅުންތެރިއާ ކައިރިން ނައްޓާލުމަށް ފަހު ފޮނުވާލި ބާރު ހަމަލާއެއް ގޯލުގެ މަތީ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

Advertisement

މި ލަނޑާއެކު މެޗުގެ ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ޔުނައިޓެޑް ވިކްޓަރީ ކުރީގައި އޮވެގެންނެވެ.

މެޗުގެ ދެވަނަ ހާފުގައި ވެސް ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު މިހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން ޔުނައިޓެޑް ވިކްޓަރީ ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ކުޅުނު ހަތަރު މެޗުން ޔުނައިޓެޑް ވިކްޓަރީ އަށް ތިން ޕޮއިންޓް ލިބިފައިވާއިރު، އެޓީމު މިވަގުތު އޮތީ ލީގު ތާވަލްގެ ހަ ވަނައިގައެވެ. އަދި މި މެޗުން ބަލިވި ވެލެންސިއާ ލީގުގައި ކުޅުން ހަތަރު މެޗުން ވެސް ބަލިވެފައިވާއިރު، އެޓީމު މިވަގުތު އޮތީ 8 ޓީމު ހިމެނޭ ލީގު ތާވަލުގެ ފުލުގައެވެ.