މިއަހަރުގެ އެއް މިލިއަން ވަނަ ފަތުރުވެރިޔާ ރާއްޖެ އަތުވެއްޖެއެވެ.

މިއަހަރު ރާއްޖެއައި އެއްމިލިއަން ވަނަ ފަތުރުވެރިޔާއަކީ ރަޝީޔާގެ ފިރިހެނެކެވެ.

އޭނާ ރާއްޖެއައުމުން ވެލާނާ އިންޓަރނޭޝަނަލް އެއަރޕޯޓުން އޭނާއަށް މަރުހަބާ ވިދާޅުވެފައިވަނީ ޓުއަރިޒަމް މިނިސްޓަރ ޑރ. ޢަބްދުﷲ މަޢުޞޫމާއި، މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯރޕަރޭޝަން އެމް.އެމް.ޕީ.އާރު.ސީގެ މެނޭޖިންގ ޑިރެކްޓަރ ތޮއްޔިބު މުޙައްމަދާއި، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް އެމް.އޭ.ސީ.އެލްއާއި އަދި މޯލްޑިވްސް އިމިގްރޭޝަންގެ އިސްވެރިންނެވެ.

މިއަހަރު ރާއްޖެއަށް އައި އެއް މިލިއަން ވަނަ ފަތުރުވެރިއަކީ ރަޝިޔާގެ ފިރެހެނެއްކަމަށްވާ އެންޓޮން ޕަވްލޮވްއެވެ.

އޭނާ ރާއްޖެ އައީ އޭނާގެ އާއިލާއާއިއެކު ޗުއްޓީއަކަށެވެ. މިއީ އެ އާއިލާ ރާއްޖެ އައި ފުރަތަމަ ފަހަރެވެ. ނަމަވެސް މިއީ ރާއްޖެ އަންނާނެ ފަހު ފަހަރު ނޫންކަމުގެ ޔަޤީންކަން އޭނާ ވަނީ ދީފައެވެ. މި މީހުން ރާއްޖޭގައި 2 ހަފްތާގައި މަޑުކުރުމަށް ވަނީ ހަމަޖެހިފައެވެ.

އެންޓޮން ޕަވްލޮވް ބުނީ މިފަދަ މަރުހަބާއެއް އެމީހުންނަށް ކިޔުމުން ވަރަށް އުފާވާ ކަމަށެވެ.

އެމް.އެމް.ޕީ.އާރު.ސީގެ މެނޭޖިންގ ޑިރެކްޓަރ ތޮއްޔިބު މުޙައްމަދު ވިދާޅުވީ، މިއީ މި އަހަރުގެ ފަތުރުވެރިކަމުގެ ވަރަށް އުފާވެރި ދުވަހެއްކަމަށެވެ. އަދި މިއީ ފަތުރުވެރިކަމުގެ ދާއިރާއިން ކުރިއަށްދިއުމަށް ލިބުނު ވަރަށް ބޮޑު ކާމިޔާބީއެއްގެ ގޮތުގައި އޭނާ ސިފަކުރެއްވިއެވެ.

އަހަރުގެ ކުރިއަށްއޮތް ތަނުގައިވެސް ފަތުރުވެރިން އަންނަ ޢަދަދު އިތުރުވެ މި އަހަރު ރާއްޖޭގެ ފަތުރުވެރިކަމުގައި ކަނޑައެޅި އަމާޒަށް ވާސިލްވެވޭނެކަމުގެ އުންމީދު ބޮޑުކަމަށް އޭނާ ވިދާޅުވިއެވެ.

ރަޝިއާއަކީ މިހާރު ރާއްޖެއަށް 2 ވަނައަށް އެންމެ ގިނަ ފަތުރުވެރިން އަންނަ ޤައުމެވެ. އެ ޤައުމުން އަހަރުގެ މިހާތަނަށް ރާއްޖެއަށް 114000 އަށްވުރެ ގިނަ ފަތުރުވެރިން ވަނީ އައިސްފައެވެ.