ދުނިޔޭގައި މިހާތަނަށް އުފެދުނު އެންމެ މޮޅު އެއް ފުޓްބޯޅަ ކުޅުންތެރިޔާ ކަމަށްވާ އާޖެންޓީނާގެ ކެޕްޓަން ލިއޮނަލް މެސީ އާއި ސްޕެއިންގެ ތަޖުރިބާކާރު މިޑްފިލްޑަރު ސާޖިއޯ ބުސްކެޓްސް އެމެރިކާގެ މޭޖަ ލީގު ސޮކާގެ އިންޓަ މިއާމީއާއެކު ދެ އަހަރު ދުވަހުގެ އެއްބަސްވުމެއްގައި ސޮއިކޮށްފި އެވެ.

ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާއަށް ދޭ ބެލެންޑޯ އެވޯޑް ހަތްފަހަރު ހޯދާފައިވާ އުމުރުން 36 އަހަރުގެ މެސީ ފާއިތުވި ދެ ސީޒަނުގައި ފްރާންސްގެ ޕީއެސްޖީއަށް ކުޅެފައިވާއިރު، މިދިޔަ ސީޒަނުގެ ނިޔަލަށް ބުސްކެޓްސް ކުޅެފައިވަނީ ބާސެލޯނާ އަށެވެ. އަދި މި ދެ ކުޅުންތެރިންނަކީ ވެސް ބާސެލޯނާގެ ޔޫތު ޓީމުން ވިދާލި ދެކުޅުންތެރިންނެވެ.

އުމުރުން 35 އަހަރުގެ ބުސްކެޓްސް ބާސެލޯނާ ދޫކޮށްލަން ނިންމީ އެކުލަބުގައި ކާމިޔާބު 15 އަހަރު ހޭދަކުރުމަށްފަހުއެވެ. އަދި ނިމިދިޔަ ސީޒަން ނިމުމާއެކު ބާސެލޯނާ ދޫކޮށްލާނެކަން އިއުލާންކޮށްފައިވާ އެޓީމުގެ ކެޕްޓަން އިންޓަ މިއާމީއަށް ބަދަލުވީ ހިލޭ ޓްރާންސްފާއެއްގެ ދަށުންނެވެ.

Advertisement

ބުސްކެޓްސްއަށް ބާސެލޯނާގެ ކެޕްޓަން ކަމާއި ހަވާލުވީ 2021 ވަނަ އަހަރު އޭރުގެ ކެޕްޓަން ލަޔޮނަލް މެސީ ބާސެލޯނާ ދޫކޮށް ފްރާންސްގެ ޕީއެސްޖީއަށް ބަދަލުވުމާއި އެކު އެވެ. ބުސްކެޓްސް ވަނީ އޭނާ ބާސެލޯނާގައި ހޭދަކުރި 15 އަހަރުތެރޭގައި އެކުލަބަށް ކުޅެދިން 722 މެޗުގައި 18 ލަނޑު ކާމިޔާބުކޮށްދިނީ، ބާސެލޯނާގެ ޖާޒީގައި 32 ތަށި ކާމިޔާބުކޮށްފައެވެ.

މޭސީ ވެސް އޭނާގެ ފުޓްބޯޅަ ކެރިއަރުގެ ބޮޑުބައި ހޭދަކުރީ ބާސެލޯނާ ގައެވެ. ބާސާގައި އޭނާ ހޭދަކުރި 21 އަހަރު ދުވަހުގެ ތެރޭ ކުލަބް ފުޓްބޯޅައިގެ ހުރިހާ ކާމިޔާބެއް އޭނާ ވަނީ ހޯދާފައެވެ. އެގޮތުން އެޓީމަށް ކުޅެދިން 778 މެޗުގައި 672 ލަނޑު ކާމިޔާބުކޮށްދިނުމުގެ އިތުރުން މެސީ ވަނީ އެޓީމާއެކު 34 ތަށި ކާމިޔާބުކޮށްފަ އެވެ.

ނަމަވެސް 2021 ވަނަ އަހަރު ބާސެލޯނާ ދޫކޮށް ޕީއެސްޖީ އަށް ބަދަލުވިފަހުން ފާއިތުވި ދެ ސީޒަންގައި، އެކި ސަބަބުތަކާއި ހުރެ މެސީގެ އެންމެ މޮޅު ކުޅުން ފީއެސްޖީގައި ވަނީ ދެއްކޭގޮތް ނުވެފައެވެ.

އިންޓަ މިއާމީގެ ކޯ އޯނަރު އަދި ކުރީގެ މަޝްހޫރު ފުޓްބޯޅަ ތަރި ޑޭވިޑް ބެކަމް އެ ޓީމާއި މެސީ ގުޅުމުން ބުނެފައިވަނީ އިންޓަ މިއާމީ ފުޓްބޯޅަ ކްލަބުގެ މަސައްކަތް ފެށިއިރު، ކޮންމެވެސް ދުވަހަކުން ދުނިޔޭގެ އެންމެ މަގުބޫލު ކުޅުންތެރިން ގެނެވޭނެކަމަށް އުއްމީދުކުރި ކަމަށާއި، މެސީ އެޓީމާއި ގުޅުމާއިއެކު އެ ހުވަފެން ހަގީގަތަކަށް ވެގެން ގޮއްސިކަމަށެވެ.