ދެފުށްފެންނަ ގޮތަށް އިންތިހާބު ގެ މަސައްކަތްތައް ކުރިޔަށް ގެންދިއުން ނޫން ގޮތަކަށް އެއްވެސް ފަރާތަކާއި މަޝްވަރާ ކުރެވިފައިނުވާނެ ކަމަށް އިލެކްޝަންސް ކޮމިޝަންގެ ފަރާތުން އެކޮމިޝަންގެ ނައިބު ރައީސް އިސްމާއިލް ޙަބީބް ވިދާޅުވެއްޖެއެވެ.
ޙަބީބް ކުރެއްވެވި ޓްވީޓެއްގައި ވިދާޅުވެފައިވަނީ ރިޔާސީ އިންތިޚާބު 2023 އޮބްޒާވް ކުރުމަށް އާންމުކޮށް ހުޅުވާލި ފުރުސަތާ ގުޅިގެން، ދުނިޔޭގެ އެކި ޖަމިއްޔާ، ޖަމާޢަތްތަކާއި، އެކިއެކި ގައުމުތަކުން ވޭތުވެދިޔަ ގާތްގަނޑަކަށް ދެމަސްދުވަހުގެ ތެރޭގައި އިލެކްޝަންސް ކޮމިޝަނާ ބައްދަލު ކުރައްވާފައިވާ ކަމަށެވެ.
މިގޮތުން، ޔޫ.އެން، ޔޫރަޕިއަން ޔޫނިއަން، ކޮމަންވެލްތު، ޔޫ.އެސް އެއިޑް، އައިއެފްއީއެސް އާއި، އޮސްޓްރޭލިޔާ، ކެނެޑާ، ޖަޕާން، އިނގިރޭސި ވިލާތް އަދި އިންޑިޔާ އިން ރާއްޖެއަށް ކަނޑައަޅުއްވާފައިވާ ސަފީރުން ކޮމިޝަނާ ބައްދަލު ކުރައްވައި ފައި ވާކަމަށްވެސް އޭނަ ވިދާޅުވިއެވެ.
މި ބައްދަލު ކުރެއްވުންތަކުގައި އިންތިޚާބު އޮބްޒާވް ކުރުމާއި ބެހޭގޮތުންނާއި، އިންތިޚާބަށް ވަމުންދާ ތައްޔާރީތަކާ ބެހޭ ގޮތުން މައުލޫމާތު ހޯއްދަވައި، ދެފުށް ފެންނަ، އިންސާފުވެރި އިންތިޚާބެއް ބޭއްވުމުގެ މައްޗަށް މަޝްވަރާ ކުރެވިފައިވާ ކަމަށް ޙަބީބް ވިދާޅުވިއެވެ.
މީގެއިތުރުން ޙަބީބް ވިދާޅުވެފައިވަނީ ބައެއް ޖަމާއަތްތަކުންނާއި ޤައުމުތަކުން އިންތިޚާބުގެ މަސައްކަތްތަކުގައި ފަންނީ އެހީތެރިކަން ފޯރުކޮށްދިނުމާ ގުޅޭގޮތުންވެސް ވާހަކަ ދައްކާފައިވާކަމަށެވެ.
"މިދިޔަ ހަފްތާގައި ކޮލަމްބިޔާ ގައި ބޭއްވި ދުނިޔޭގެ އިލެކްޝަންސް ޖަމްޢިއްޔާ އޭވެބް ގެ އެގްޒެކްޓިވް ބޯޑު މީޓިންގ ގައި ބައިވެރިވެ ވަޑައިގެންނެވި އެކި ޤައުމުތަކުގެ ކޮމިޝަނަރުން، އެ ބައްދަލުވުމުގެ ހަވާސާގައި، ކޮމިޝަންގެ މެންބަރު ޑރ. މުހައްމަދު ޒާހިރު އާ ވެސް ބައްދަލު ކުރައްވައި، ރިޔާސީ އިންތިހާބު އޮބްޒާވް ކުރެއްވުމާއި، ގުޅުން ބަދަހި ކުރުމުގެ މަޝްވަރާ ކުރައްވާފައިވޭ" ޙަބީބް ވިދާޅުވެފައިވެއެވެ.
ޙަބީބް ވިދާޅުވީ ޔޫ.އެން.ޑީ.ޕީ އިންނާއި، އީޔޫގެ ޑެލިގޭޝަނުންނާއި، ކޮމަންވެލްތުގެ ޕްރީ އެސެސްމެންޓް މިޝަން ގެ ބޭފުޅުންގެ ފަރާތްޕުޅުން ވެސް އިންތިޚާބު އިންތިޒާމުތައް ރޭވެމުންދާ ގޮތާއި، މަސައްކަތްތައް ކުރިއަށްދާގޮތް ވަރަށްގާތުން ބައްލަވަމުން ގެންދަވާ ކަމަށެވެ. މިގޮތުން، ކޮމަންވެލްތުގެ ޓީމުން 'އުންމީދުއޮތް' ބައެއް ކެންޑިޑޭޓުންނަށް ރިޔާސީ އިންތިޚާބުގައި ވާދަކުރުމުގެ ފުރުސަތާ ބެހޭ ގޮތުން ވެސް މައުލޫމާތު ހޯއްދަވާފައިވާ ކަމަށްވެސް ޙަބީބް ވިދާޅުވިއެވެ.
"ބޭރުގެ ވީހާވެސް ގިނަ ފަރާތްތަކުން އިންތިހާބު އޮބްޒާވް ކުރެއްވުމަކީ، އިންސާފުވެރި ކަމާއެކީގައި އިންތިޚާބުގެ މަސައްކަތްތައް ކުރިޔަށް ގެންދިއުމަށް ލިބޭ ހިތްވަރެއް"
އިސްމާއިލް ޙަބީބް
ޙަބީބްގެ ޓުވީޓުގައި އިތުރަށް ވިދާޅުވެފައިވަނީ މިނިވަންކަމާއި އިންސާފުވެރިކަމާއެކު ދެފުށް ފެންނަގޮތަށް، ރިޔާސީ އިންތިޚާބު ގެ މަސައްކަތްތައް ކުރިޔަށް ގެންދިއުމުގެ މައްޗަށް ނޫން ގޮތަކަށް، ބޭރުގެ އަދި އެތެރޭގެ އެއްވެސް ފަރާތަކުން ވެސް، އެއްވެސް މަޝްވަރާއެއް ކޮމިޝަނަށް ދެއްވާފައި ނުވާ ކަމަށެވެ.
ޙަބީބް މިފަދައިން ވިދާޅުވެފައިމިވަނީ އީސީގެ ރައީސް ފުއާދް ތައުފީޤް އިއްޔެ އިންޑިޔާގެ ހައިކޮމިޝަނަރ މުނޫ މަހާވަރާއި ބައްދަލު ކުރެއްވި ކުރެއްވުމާއި ގުޅިގެން އިދިކޮޅު ފަރާތްތަކުން ފާޑު ކިޔަމުން ދަނިކޮށެވެ.
އިދިކޮޅު ފަރާތްތަކުން އަބަދުވެސް އިންޑިޔާގެ ސަރުކާރުގެ އިސް ފަރާތްތަކާއި ދިވެހި ސަރުކާރުގެ އިސްފަރާތްތަކާއި އޮންނަ ގުޅުމާއި މެދު ފާޑުކިޔައެވެ.
Advertisement
This content is created and paid for by advertisers and does not involve Voice Journalists
