މާދަމާގެ ފޮޓޯއަކަށްވާނީ އުއްތަމަ ފަނޑިޔާރާއި އެކު އިންޑިޔާ ސަފީރު ހުންނަވާ ފޮޓޯއެއް ކަމަށް މަހިބަދޫ ދާއިރާގެ މެމްބަރު އަޙްމަދު ޠާރިޤް ވިދާޅުވެއްޖެއެވެ.
ޠާރިޤް މިހެން ވިދާޅުވެފައިވަނީ އިންޑިޔާ ސަފީރު މުނޫ މަހާވަރް އާއި އިލެކްޝަންސް ކޮމިޝަންގެ ރައީސް ފުއާދު ތައުފީޤް ބައްދަލުކުރައްވައި ނަގައިފައިވާ ފޮޓޯ އެއް ޓްވިޓާގައި ހިއްސާ ކުރައްވައި، ކުރައްވައިފައިވާ ޓްވީޓެއްގައެވެ.
"މާދަމާގެ ފޮޓޯއަކަށް ވާނީ ރާއްޖޭގެ އުއްތަމަ ފަނޑިޔާރާއެކު ހުންނަވާ ފޮޓޯއެއް. ގައުމު އަޅުވެތިކޮށް ނިންމައިފި"
ޠާރިޤް ވިދާޅުވެފައިވެއެވެ.
މީގެ އިތުރުން ޠާރިޤް ވިދާޅުވެފައިވަނީ ރައީސް ޔާމިންގެ މައްސަލައިގެ ހައިކޯޓްގެ އެއްފަނޑިޔާރު ހުންނެވީ ތައިލެންޑްގެ ޕަތާޔާގައި ކަމަށާއި، ސެޕްޓެމްބަރު 9 ގެ ވޯޓަކީ ރާއްޖޭގެ މިނިވަންކަމާ ގުޅޭ ވޯޓެއް ކަމަށެވެ.
އިންޑިޔާ ސަފީރާއި އީސީގެ ރައީސް ބައްދަލު ކުރެއްވުމާއި ގުޅިގެން އިދިކޮޅު ފަރާތްތަކުގެ ފާޑު ކިޔުންތަކާއި ގުޅިގެން އީސީގެ ފަރާތުން އީސީގެ ނައިބު ރައީސް ކުރެއްވެވި ޓްވީޓެއްގައި ވިދާޅުވެފައިވަނީ ބޭރުގެ ވީހާވެސް ގިނަ ފަރާތްތަކުން އިންތިޚާބު އޮބްޒާވް ކުރެއްވުމަކީ، އިންސާފުވެރި ކަމާއެކީގައި އިންތިޚާބުގެ މަސައްކަތްތައް ކުރިޔަށް ގެންދިއުމަށް ލިބޭ ހިތްވަރެއް ކަމަށެވެ.
އަދި މިނިވަންކަމާއި އިންސާފުވެރިކަމާއެކު ދެފުށް ފެންނަގޮތަށް، ރިޔާސީ އިންތިޚާބު ގެ މަސައްކަތްތައް ކުރިޔަށް ގެންދިއުމުގެ މައްޗަށް ނޫން ގޮތަކަށް، ބޭރުގެ އަދި އެތެރޭގެ އެއްވެސް ފަރާތަކުން ވެސް، އެއްވެސް މަޝްވަރާއެއް ކޮމިޝަނަށް ދެއްވާފައި ނުވާ ކަމަށެވެ.
Advertisement
This content is created and paid for by advertisers and does not involve Voice Journalists
