ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ސަރުކާރުން ޤާއިމްކޮށްދިނީ ނުރުހޭ މީހާ ކުށްވެރިވެފައި، ރުހޭ މީހާ ކިތަންމެ ބޮޑު ކުށެއް ކުރި ނަމަވެސް ސަލާމަތްކުރާ އިންސާފުކަމަށް އިދިކޮޅު ކޯލިޝަނުން ބުނެފި އެވެ. 

އިދިކޮޅު ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމުގެ މައްޗަށް މިދިޔަ ޑިސެމްބަރު މަހުގެ 25 ގައި ކްރިމިނަލް ކޯޓުން ކުރި ހުކުމް އެމަނިކުފާނުގެ ފަރާތްޕުޅުން ހައިކޯޓުގައި އިސްތިއުނާފުކޮށް، އެ މައްސަލައިގެ އަޑުއެހުންތައް ގާތްގަނޑަކަށް ނިމުމަކާއި ހަމަޔަށް ގޮސްފައި ވަނިކޮށް މަޑިޖެހިގެން ދިއުމާއި ގުޅިގެން، އިދިކޮޅުން ގެންދަނީ ކަންބޮޑުވުން ފާޅުކުރަމުން ނެވެ. 

ރައީސް ޔާމިނަކީ ޕީޕީއެމްގެ ރިޔާސީ ކެންޑިޑޭޓަށް ވެފައި މި މަހުގެ 23 ގައި ރިޔާސީ އިންތިޚާބަށް ކުރިމަތިލުމަށް އިލެކްޝަނުން ހުޅުވާލާއިރު، އެމަނިކުފާނުގެ އިސްތިއުނާފު މައްސަލަ ލަސްވެގެން ދިއުމަކީ ރައީސް ޔާމިނުގެ އިންތިޚާބީ ހައްގަށް ވަރަށް ބޮޑަށް ހުރަސްއެޅޭނެ ކަމެއްކަން ފާހަގަކޮށް ހުރި ކަންބޮޑުވުންތަކާއި އެކު އިދިކޮޅު ލީޑަރުން ވަނީ ހޯމަ ދުވަހު ވެސް ހައިކޯޓަށް ވަޑައިގެން ރައީސް ޔާމިނުގެ އިސްތިއުނާފު މައްސަލަ އޮތް ހިސާބެއް ހޯއްދެވުމަށް މަސައްކަތްޕުޅު ކުރައްވާފަ އެވެ. 

Advertisement

ހައިކޯޓަށް ވަޑައިގަތުމަށްފަހު މީޑިއާއަށް މައުލޫމާތު ދެއްވަމުން އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވީ ރައީސް ޔާމިނުގެ އާރަށު އިސްތިއުނާފުގެ މައްސަލަ ހައިކޯޓުގައި ތާވަލުކުރެވިފައި ނުވާކަމަށް ހައިކޯޓުގެ މީޑިއާ އޮފިޝަލު މައުލޫމާތު ދެއްވާ ކަމަށެވެ. 

އެ މައްސަލަ ތާވަލުނުކުރަނީ އެ މައްސަލަ ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވާ ފަނޑިޔާރުން ޗުއްޓީގައި އުޅުއްވާތީ އިދިކޮޅުން ސުވާލުކޮށްފައިވާނެ ކަމަށާއި، އެހެން ނަމަވެސް އެއީ ފަނޑިޔާރުންގެ ޒާތީ މައުލޫމާތަށް ވާތީ އެ މައުލޫމާތުތައް ހާމކޮށްފައި ނުވާކަމަށް އަބްދުއްރަހީމް ވިދާޅުވި އެވެ. 

އަބްދުއްރަހީމް ވިދާޅުވީ ރައީސް ޔާމިނުގެ މައްސަލައަށް ނުފޫޒު ފޯރުވަނީ ރައީސް ޞާލިހު އަޑީގައި ހުންނަވައިގެން ކަމަށެވެ. މި ސަރުކާރަކީ ޝަރުއީ ދާއިރާ އިސްލާހުކޮށް، ފިނިވަން ފަނޑިޔާރު ގެތަކެއް ހޯދައިދޭނެކަމުގެ ވައުދާއެކު އައި ސަރުކާރެއް ނަމަވެސް މިހާރު ފެނިގެންދާ މަންޒަރަކީ ސަރުކާރުން ރުހޭ މީހުން ދޫކޮށްލާ، ނުރުހޭ މީހުން ހައްޔަރުކުރާ އިންސާފު ގާއިމްކުރާ މަންޒަރުކަމަށް އަބްދުއްރަހީމް ވިދާޅުވި އެވެ.

ވާދަވެރި ސިޔާސީ ލީޑަރު ރައީސް އަބްދުالله ޔާމީން އަބްދުލްގައްޔޫމު

އަބްދުއްރަހީމް އިތުރަށް ވިދާޅުވީ ރައީސް ޞާލިހުގެ ކިބައިގައި ރައީސް ޔާމިނާއި ވާދަކުރުމުގެ ހިތްވަރުފުޅު ނެތްކަމަށެވެ.

ވާދަވެރި ސިޔާސީ ކެންޑިޑޭޓު ހުރަގެއަށްލާ ބަންދުކޮށްފައި މައިދާނަށް ނިކުމެވަޑައިގެން ހުންނަވާ އިންތިޚާބުގައި ވާދަކުރައްވާށޭ ވިދާޅުވުމަކީ ފިނޑި އަމަލެއްކަަމަށާއި، އެވަރު ބޭފުޅުން އިންތިޚާބުތަކުގައި ވާދަނުކުރެއްވުން ރަނގަޅުވާނެކަމަށް އަބްދުއްރަހީމް ވިދާޅުވި އެވެ.