ކުރިޔަށް އޮތް ރިޔާސީ އިންތިޚާބުގައި އެމްޑީޕީގެ ކުރީގެ ރައީސް، އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަކީ ޗެލެންޖެއް ނޫންކަމަށާއި އަދިވެސް ޗެލެންކަޖަށްވާނީ ޕީޕީއެމް ކަމަށް އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ރިޔާސީ އިންތިޚާބުގެ ކެމްޕެއިނަށް ވ އަދި މ އަތޮޅަށް ކުރެއްވި ދަތުރުފުޅު ނިންމަވާލައްވަމުން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ، ކުރިއަށް އޮތް ރިޔާސީ އިންތިހާބުގައި ކުރީގެ ރައީސް މުހައްމަދު ނަޝީދު އެމްޑީޕީ އާއި އެކު ނުހުންނާނެ ކަން ފާހަގަކޮށް، އެ މަނިކުފާނު އެމްޑީޕީން ވަކިވެ، އިދިކޮޅުގައި ހުންނެވުމުން ކިހާވަރެއްގެ ގޮންޖެހުމަކަށް ވާނެތޯ ސުވާލު ކޮށްފައެވެ.
އެ ސުވާލަށް ޖަވާބު ދެއްވަމުން ރައީސް ޞާލިހު ވިދާޅުވީ، ލ އެއްވެސް މީހަކު ޕާޓީއާ ދުރުވުމަކީ އޭގެން ނަތީޖާއަށް އަސަރުކުރާނެކަމެއްކަމަށެވެ. އަދި އެމަނިކުފާނު ބޭނުންފުޅުވަނީ އެންމެންވެސް ކުރީގައި ތިބި ވިސްނުމާއި އެކު އެކުގައި ކުރިއަށް ދާން ކަމަށާ، އެއްވެސް މީހަކު ޕާޓީ އާއި ދުރުވުމަކީ ޕާޓީއަށް ގެއްލޭ ވޯޓެއް ކަމަށެވެ. އެހެންކަމުން އެމްޑީޕީީން މަސައްކަތް މަސައްކަތްކުރަމުންދަނީ ގެއްލޭ ވޯޓުތައް އެހެން ގޮތްގޮތުން ހޯދުމަށްކަމަށާއި އެވޯޓުތައް ލިބޭތަންވެސް ފެނިވަޑައިގަންނަވާކަމަށް ރައީސް ވިދާޅުވިއެވެ.
މިއާއެކު ރައީސް ޞާލިހް ވިދާޅުވީ، 2018 ވަނަ އަހަރު އޮތް ކޯލިޝަނާއި މިހާރު އޮތް ކޯލިޝަން ތަފާތުކަމަށާއި، ކުރީގެ ސިޔާސަތުތަކާއި އަމާޒުތަކާއި ކަންކަން ކުރާ ގޮތާއި ވައްޓަފާޅިއަށްވެސް ބަދަލުތަކެއް އައިސްފައިވާކަމަށް ރައީސް ވިދާޅުވިއެވެ. އަދި އޭގެ ސަބަބުން ކުރިން އެމްޑީޕީއަށް ތާއީދު ނުކުރާ އެތައް ބައެއްގެ ތާއީދުވެސް ލިބެމުންދާ ކަން އެމަނިކުފާނު ފާހަގަކުރެއްވިއެވެ.
އަދި އަޅުގަނޑުމެންގެ ސިޔާސަތުތަކާއި އަމާޒުތަކާއި ކަންތައް މިކުރާ ވައްޓަފާޅިއަށް މިގެނެވުނު ބަދަލާއެކު ކުރީގައި އަޅުގަނޑުމެންނަށް ތާއީދުނުކުރާ އެތައް ބައެއްގެ ތާއީދުވެސް އެބަލިބޭ. އެހެންވީމާ ގެއްލިގެންދިޔަ އަދަދާއި އެއްވަރަށް ނޫނީ އެއަށްވުރެ އިތުރަށް ވޯޓު ލިބޭތަން ފެނިގެންދަނީ. އެވެސް އަޅުގަނޑުމެންނާ ދުރަށް މިޖެހިލި ބޭފުޅުން ވެސް މިއަށް އަތުވިއްޖިއްޔާ މިއީ ވަރަށް ފަސޭހަ އިންތިހާބެއް.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
މީގެ އިތުރުން ރައީސް ނަޝީދު ވާދަކުރައްވައިފި ނަމަ ގޮންޖެހުމަކަށް ވެދާނެތޯ ކުރެއްވި ސުވާލަށް ޖަވާބު ދެއްވަމުން ރައީސް ޞާލިހު ވިދާޅުވީ، އެމްޑީޕީ އެތެރޭގެ ޕްރައިމަރީގައި ނަތީޖާ އައި ގޮތް އެންމެނަށްވެސް ފެނިފައި ވާ ކަމަށެވެ. އަދި އެމަނިކުފާނު ގަބޫލުކުރައްވާ ގޮތުގައި، ކުރިއަށް އޮތް އިންތިހާބުގައި ވާދަވެރި ދެ ޕާޓީ އަކަށް އަދިވެސް ވާނީ ޕީޕީއެމާއި އެމްޑީޕީ ކަމަށްވެސް ވިދާޅުވި އެވެ.
ތިބޭފުޅުނަށް ފެނިވަޑައިގަންނަވާނެ ޕާޓީގެ އެތެރޭގެ ނަތީޖާ. އަޅުގަނޑަށް ފެންނަ ގޮތުގައި ކުރިޔަށް މިއޮތް ރިޔާސީ އިންތިޚާބުގައި ވާދަވެރި ދެޕާޓީއަކަށް ވާނީ އެމްޑީޕީ އާއި ޕީޕީއެމް. އެއަކަށް ތަފާތެއް އައިސް އޮތްތަނެއް ނުފެނޭ. އެހެންވީމާ އަޅުގަނޑުމެންގެ ޗެލެންޖަކީ ޑިމޮކްރެޓްސް އެއް ނޫން. އަޅުގަނޑުމެން ގެ ޗެލެންޖަކީ ޕީޕީއެމް
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ނަޝީދަކީ ޗެލެންޖެއް ނޫން ކަމަށް ރައީސް ޞާލިހު ވިދާޅުވާ އިރު، ނަޝީދުގެ ޑިމޮކްރެޓްސް އިން ބުނަމުން އަންނަނީ، އެޕާޓީ ނުކުމެ، ރިޔާސީ އިންތިހާބުގައި ރައީސް ޞާލިހު، ބޮޑުތަނުން ބަލި ކުރައްވާނެ ކަމަށެވެ. އެއީ އެހެން ޕާޓީ އަކާއި ގުޅިގެން ނަމަވެސް އެކަން ކުރާނެ ކަމަށް ޑިމޮކްރެޓްސް އިން އަންނަނީ ބުނަމުންނެވެ. އަދި އެ ޕާޓީން މިހާރު އަންނަނީ އެކަމަށްޓަކައި ޕީޕީއެމާއި އެކު މަޝްވަރާތައް ވެސް ކުރިއަށް ގެންދަމުންނެވެ.
Advertisement
This content is created and paid for by advertisers and does not involve Voice Journalists
