ކުރިއަށް އޮތް ސީޒަނަށް ތައްޔާރުވުމުގެ ގޮތުން މިރޭ ސްޕެއިންގެ ސެލްޓަ ވީގޯ އާއި ދެކޮޅަށް އަލް ނަސްރު ކުޅުނު މެޗު 5-0 ގެ ނަތީޖާއަކުން ސެލްޓަ ވީގޯ ކާމިޔާބުކޮށްފިއެވެ.

މިރޭގެ މެޗުގައި އަލް ނަސްރުގެ ކެޕްޓަން ކްރިސްޓިއާނޯ ރޮނާލްޑޯ އާއި އެޓީމާއި އަލަށް ގުޅުނު ކްރޮއޭޝިޔާގެ މިޑްފީލްޑަރު މާސެލޯ ބްރޮޒޮވިޗް ފުރަތަަމަ އެގާރައިގައި ހިމެނިގެން ކުޅުނުއިރު، މި މެޗުގެ ފުރަތަަމަ ހާފުގައި ދެޓީމުގެ ފަރާތުން ފެނިގެންދިޔައީ ވަރަށް ހަމަހަމަ ކުޅުމެކެވެ.

މިހާފުގައި ދެޓީމުން ވެސް ލަނޑުޖަހާނެ ރަގަޅު ފުރުސަތުތަކެއް ތަނަވަސްކުރި ނަމަވެސް ފުރަތަަމަ ހާފު ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ސެލްޓާއިން ފެށީވެސް އެގާރަ ބަދަލާއެކުގައެވެ. މި މި ހާފު ފެށިގެން ތިންވަނަ މިނެޓުގައި އަލް ނަސްރުން ވަނީ އެޓީމުގެ ކެޕްޓަން ކްރިސްޓިއާނޯ ރޮނާލްޑޯ ބަދަލުކޮށްފައެވެ.

މި މެޗުގެ އޮއިވަރު ބަދަލުވެގެން ދިޔައީ ދެވަނަ ހާފުގެ 52 ވަނަ މިނެޓުގައި އަލް ނަސްރުގެ ޑިފެންޑަރު އަލް  އަމްރީ ކުރި ފައުލަކާއި ގުޅިގެން ރެފްރީ އޭނާއަށް ސީދާ ރަތް ކާޑެއް ދައްކާ ދަނޑުން ފޮނުވާލުމުންނެވެ.

އަލް ނަސްރުގެ އެއް ކުޅުންތެރިއަކު މަދުވުމުގެ ފައިދާ ނަގައި ސެލްޓާއިން މެޗުގެ ލީޑު ހޯދީ ދެވަނަ ހާފުގެ 57 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ޒުވާން ޑިފެންޑަރު އަލޮންސޯ އެވެ. އަދި އޭޓީމުގެ ދެވަނަ ލަނޑާއި ތިން ވަނަ ލަނޑު 62 ވަނަ މިނެޓާއި 71 ވަނަ މިނެޓުގައި ކާމިޔާބުކޮށްދިނީ ސްޕެނިޝް ފޯވާޑް މިގުއެލް ރޮޑްރިގޭޒް އެވެ.

ސަލްޓާއި މި މެޗުގައި ކާމިޔާބުކުރި ހަތަރުވަނަ ލަނޑާއި ފަސްވަނަ ލަނޑު ކާމިޔާބުކޮށްދިނީ ފަހުހާފުގެ 73 ވަނަ މިނެޓާއި 75 ވަނަ މިނެޓުގައި ނޯވޭގެ ފޯވާޑް ޖޯޖެން ސްޓްރެންޑް ލާސަން އެވެ. މި ލަނޑާއެކު މެޗުގެ ކުޅުން ނިމިގެންދިޔައީ 5-0 ގެ ނަތީޖާއަކުން ސެލްޓަ ވީގޯ ކުރީގައި އޮވެގެންނެވެ.

މިއީ ކުރިއަށް އޮތް ސީޒަނަށް ތައްޔާރުވުމުގެ ގޮތުން އަލް ނަސްރު ކުޅުނު ތިންވަނަ މެޗެވެ. އަދި މި މެޗުން އެޓީމު ބަލިވިއިރު މިއީ މިދިޔަ ހަފްތާގައި އެޓީމުގެ ފަރިތަކުރުންތަކުގައި ރޮނާލްޑޯ އާއި ބްރޮޒޮވިޗް ބައިވެރިވާން ފެށިފަހުން އެޓީމު ކުޅުނު ފުރަތަަމަ މެޗެވެ.