ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމަށް އިންސާފު ލިބެންދެން ރިޔާސީ އިންތިޚާބު ފަސްކުރުމަށް އިދިކޮޅު ކޯލިޝަނުން ގޮވާލައިފި އެވެ.
ރައީސް ޔާމީނު މިވަގުތު ގެންދަވަނީ އެމަނިކުފާނުގެ މައްޗަށް އާރަށު މުއާމަލާތާއި ގުޅުވާ ދައުލަތުން އުފުލާފައިވާ ދައުވާތައް ސާބިތުވާކަމަށް ކަނޑައަޅާ މިދިޔަ ޑެސެމްބަރު މަހުގެ 25 ވަނަ ދުވަހު ކްރިމިނަލް ކޯޓުން އިއްވި ޖަލު ހުކުމް ތަންފީޒުކުރައްވަމުން ނެވެ.
އެ ހުކުމަކީ ނުރައްކާތެރި މިންވަރަކަށް ފަނޑިޔާރަށް ނުފޫޒު ފޯރުވައިގެން ރިޝްވަތުދީގެން އިއްވި ހުކުމެއްކަމަށް އިދިކޮޅުން ދަނީ ތުހުމަތުކުރަމުން ނެވެ. އަދި ރައީސް ޔާމިނުގެ ފަރާތްޕުޅުން ވެސް އެ ހުކުމް ވަނީ ހައިކޯޓުގައި އިސްތިއުނާފުކޮށްފަ އެވެ.
މިދިޔަ އޭޕްރިލް މަހު ރައީސް ޔާމިނުގެ ފަރާތްޕުޅުން އާރަށު ހުކުމް ހައިކޯޓުގައި އިސްތިއުނާފުކޮށް، އެ މައްސަލައިގެ އަޑުއެހުންތައް ވެސް ނިމުމަކާއި ހަމަޔަށް ގޮސްފައިވަނިކޮށް މިހާރު އޮތީ މަޑުޖެހިފައެވެ.
ރައީސް ޔާމިނުގެ އިސްތިއުނާފު މައްސަލަ ލަސްވެގެން ދިއުމަކީ އެމަނިކުފާނަށް އިންސާފު ލިބިވަޑައިގަތުމަށް އޮތް ވަރަށް ބޮޑު ހުރަހެއްގެ ގޮތުގައި އިދިކޮޅުން ފާހަގަކުރެއެވެ. އަދި ރައީސް ޔާމިނުގެ އިސްތިއުނާފު ލަސްކުރަމުންދަނީ ކަނޑައެޅިގެން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ނުފޫޒު ފޯރުވައިގެން ކަމަށް ވެސް އެ ފަރާތްތަކުން ދަނީ ތުހުމަތު ކުރަމުންނެވެ.
އިދިކޮޅުގެ ލީޑަރުން ވަނީ އެ މައްސަލައިގައި ކުރިއެރުމެއް ހޯދުމަށް ހައިކޯޓަށާއި ކަމާއި ގުޅުންހުރި އިދާރާތަކަށް ވަޑައިގެން އެ އިދާރާތާތަކުގެ އިސް މުއައްސިސުންނާއި ބައްދަލުކުރުމުގެ މަސައްކަތްޕުޅު ވެސް ކުރައްވާފަ އެވެ.
އެހެން ނަމަވެސް، މިހާތަނަށް އެދެވޭ ނަތީޖާތަކެއް ހާސިލުވެފައި ނުވާއިރު، ޕީއެންސީގެ ރައީސް އަބްދުއްރަހީމް އަބްދުالله ވަނީ ރައީސް ޔާމިނަށް އިންސާފު ލިބުމަށް ހުރަސްއަޅާފައި އޮތް މި ދަނޑިވަޅުގައި މިއަހަރުގެ ސެޕްޓެމްބަރުމަހުގެ 9 ގައި ބޭއްވުމަށް ހަމަޖެހިފައިވާ ރިޔާސީ އިންތިޚާބު ފަސްކުރުމަށް ގޮވާލައްވާފަ އެވެ.
"ރައީސް ޔާމީނަށް އިންޞާފު ލިބެންދެން ރިޔާސީ އިންތިޚާބު ފަސްކުރުމަށް ގޮވާލަން"
ޕީއެންސީގެ ރައީސް އަބްދުއްރަހީމް
އަބްދުއްރަހީމް ވިދާޅުވީ ރައީސް ޔާމިނަކީ ވާދަވެރި ސިޔާސީ ލީޑަރަށް ވާއިރު، އެމަނިކުފާނާއ ނުލާ ބާއްވާ ރިޔާސީ އިންތިޚާބެއް ޞައްޙަވާނެ ގޮތެއް ނޯންނާނެ ކަމަށެވެ.
އަދި ރައީސް ޔާމިނަށް އިންސާފު ހޯދުމަށް ހުރަސްއަޅާ އެމަނިކުފާނު ހުރަގޭގައި ބާއްވަނީ ކަނޑައެޅިގެން ރައީސް ޞާލިހު ކޯޓުތަކަށް ނުފޫޒު ފޯރުވައިގެންކަން އެނގިވަޑައިގަންނަވާކަމަށް އަބްދުއްރަހީމް ވިދާޅުވި އެވެ.
އެހެންކަމުން، ރައީސް ޔާމިނަށް އިންސާފުލިބެން ދެން ރިޔާސީ އިންތިޚާބު ފަސްކޮށްދިނުމަށް އަބްދުއްރަހީމް ވަނީ ގޮވާލައްވާފަ އެވެ.
Advertisement
This content is created and paid for by advertisers and does not involve Voice Journalists
