ޚާރިޖީ ދާއިރާއިން ރާއްޖެއަށް ބޭނުންވާ މީހުން ތަމްރީނުކުރުމަށް ރާއްޖެއާއި މިޞްރާއި ދެމެދު އެެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ސޮއިކޮށްފައިވަނީ ރާއްޖެ އާއި މިސްރާ ދެމެދު މިހާރު ކުރިއަށްދާ ބައިލެޓްރަކް ޕޮލިޓިކަލް ކޮންސަލްޓޭޝަންގެ ދެވަނަ ބުރުގެ ހަވާސާގެ ތެރެެއިންނެވެ.

ޚާރިޖީ ވުޒާރާއިން ބުނީ، މި އެއްބަސްވުމުގެ މައިގަނޑު މަޤްސަދަކީ މި ދެ ރާއްޖޭގެ ޚަރިޖިއްޔާ އާއި މިޞްރުގެ ޚަރިޖިއްޔާއި ދެމެދުގައި ގުޅުން ބަދަހިކޮށް ތަޖުރިބާ ބަދަލުކުރުމާއި، ޑިޕްލޮމެޓިކް ހުނަރާއި އިލްމު ކުރިއެރުވުމަށް މަގުފަހިކުރުން ކަމަށެވެ.

މީގެ އިތުރުން މިއީ ރާއްޖެއާއި މިޞްރާ ދެމެދު ޑިޕްލޮމެޓިކް ގާބިލްކަން އިތުރުކުރުމަށް ކުރަމުންދާ މަސައްކަތްތައް ހަރުދަނާކޮށް އިތުރުކުރުމަށް އެޅުނު މުހިންމު ފިޔަވަޅެއްކަމަށް ވެސް އެވުޒާރާއިން ބުނެއެވެ.

ޚާރިޖީ ވުޒާރާއިން ބުނީ، މި އެއްބަސްވުމުގައި ދިވެހިރާއްޖޭގެ ފަރާތުން ސޮއިކުރައްވާފައިވަނީ ޚާރިޖީ ވުޒާރާގެ ސްޓޭޓް މިނިސްޓަރު އަހްމަދު ހަލީލު ކަމަށެވެ.

އަދި މިޞްރުގެ ފަރާތުން ސޮއިކުރެއްވީ، އެ ޤައުމުގެ ޚާރިޖީ ވުޒާރާގެ އެސިސްޓެންޓް މިނިސްޓާ ފޯ އޭޝިއަން އެފެއާޒް އައިމަން ކަމެލް ކަމަށް އެވުޒާރާއިން ބުނެއެވެ.