ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމުގެ މައްޗަށް ރ ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ ދައުލަތުން އުފުލާފައިވާ ދައުވާތައް ސާބިތުކޮށްދިނުމަށް ކުރީގެ ނައިބު ރައީސް އަހުމަދު އަދީބުގެ ބޮޑީގާޑު އަހުމަދު އާމިރުގެ ހެކިބަސް ނަގައިފި އެވެ.
އަހުމަދު އާމިރަކީ އެމްއެންޑީއެފްގައި އެސްޕީޖީގައި އޭރު ނައިބްރައީސް އަހުމަދު އަދީބުގެ ސެކިއުރިޓީ ބެލެހެއްޓުުމުގައި ޙަރަކާތްތެރިވި އޮފިސަރެވެ.
އޭނާގެ ހެކިބަސް އާދިއްތަ ދުވަހުގެ އަޑުއެހުމުގައި ނަގާފައިވަނީ މެލޭޝިއާގައި ހުންނަ ހައިކޮމިޝަން މެދުވެރިކޮށެވެ.
އާމިރުގެ ހެކިބަސް ނެގީ އެމްއެމްޕީއާރުސީގައި ބޭއްވި ބައްދަލުވުމާއި ގުޅޭގޮތުން މައުލޫމާތު ދިނުމަށެވެ.
އެގޮތުން އާމިރު ބުނީ އެމްއެމްޕީއާރުސީގެ އޮފީހުގައި އަދީބާއި ޒިޔަތާއި އެކު، ފުއްގިރި މައްސަލައިގައި ރައީސް ޔާމިނުގެ އިތުރު ދައުލަތުން ދައުވާ އުފުލި އަހުމަދު ކުރިކް ރިޒާއާއި، މީދޫ ދާއިރާގެ މެމްބަރު އަހުމަދު ސިޔާމުގެ ކޮއްކޯފު ސާލިމް އާއި ޝިފާއު ކިޔާ މީހަކާއި، ކެނދިކުޅުދޫ ދާއިރާގެ ކުރީގެ މެންބަރު އަލީ މައުރޫފް އިންނެވިތަން ފެނުނުކަމަ ށެވެ.
އެ ބައްދަލުވުން އޮތް ދުވަހު ލޮބީގައި މަޑުކޮށްލައިގެން ހުއްޓާ އަދީބުގެ ދަބަސް ގެނެސްދިނުމަށް އެދުމުން މީޓިން ރޫމަށް ވަތްއިރު އެމީހުން އެ ރޫމުގައި ބައްދަލުކުރަން ތިއްބާ ފެނުނުކަމަށް އާމިރު ވަނީ ކޯޓަށް ކިޔައިދީފަ އެވެ.
ސިޔާމްގެ ކޮއްކޮ އެ ބައްދަލުވުުގައި އިންކަން މީގެ ކުރިން އާމިރު ތަހުގީގަށް ދިން ބަޔާނުގައި ބުނެފައިނުވާތީ، ސިޔާމްގެ ކޮއްކޮ ހުންނަ ގޮތް އެނގޭތޯ ދިފާއީ ވަކީލުން ސުވާލުކޮށްފައިވެ އެވެ.
އެހެން ނަމަވެސް އޭނާއަށް އެ ސުވާލުތަކަށް ސާފުޖަވާބެއް ދެވިފައެއް ނުވެއެވެ. އަދި އޭނާގެ ސިޔައެއް ވެސް ޔަގީންކަމާއެކު ބަޔާންކޮށެއް ނުދެވުނެވެ.
މި މައްސަލައިގައި ދައުލަތުގެ ފަރާތުން ހުށައަޅާ 4 ހެކިންގެ ހެކިބަސް ނުނެގުމަށް ދައުލަތުން ވަނީ ނިންމާފަ އެވެ.
އޭގެ ތެރޭގައި މީދޫ ދާއިރާގެ މެމްބަރު އަދި އެމްޑީއޭގެ ރައީސް އަހުމަދު ސިޔާމާއި، އެމްޑިއޭގެ ނައިބު ރައީސް މައުރޫފުގެ ހެކިބަސް ނުނެގުމަށް ވަނީ ނިންމާފަ އެވެ.
ދައުލަތުގެ ފަރާތުން ހުށައަޅާ ދެ ހެކިންގެ ހެކިބަސް ނެގުން މާދަމާކުރިއަށް ގެންދާ އެ މައްސަލައިގެ އަޑުއެހުމުގައި އޮންނާނެކަމަށް ގާޒީ ވަނީ ވިދާޅުވެފަ އެވެ.
އެގޮތުން ދައުލަތުން ހުށައަޅާ މުހައްމަދު ޝިފާއު މިވަގުތު ހުރީ ސައުދީގެ ޖިއްދާގައި ކަމަށްވާތީ މާދަމާގެ އަޑުއެހުމުގައި އޭނާގެ ހެކިބަސް އޮންލައިންކޮށް ނެގޭނެ އިންތިޒާމު ހަމަޖައްސައިދިނުމަށް ދައުލަތުން ވަނީ އެދިފައެވެ.
އޭގެ އިތުރުން ދެން ދައުލަތުން ހުށައަޅާ އަނެއް ހެއްކަކީ ލަންކާގެ ރަށްވެއްސަކަށް ވެފައި، މިވަގުތު އޭނާ ހުރީ ލަންކާގައި ކަމަށްވާތީ، އޭނާގެ ހެކިބަސް ލަންކާގައި ހުންނަ ދިވެހި އެމްބަސީ މެދުވެރިކޮށް ހެކިބަސް ނެގޭނެ އިންތިޒާމު މާދާމާގެ އަޑުއެހުމުގައި ހަމަޖައިސައިދިނުމަށް ވެސް ދައުލަތުން ވަނީ އެދިފަ އެވެ.
Advertisement
This content is created and paid for by advertisers and does not involve Voice Journalists
