ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމުގެ މައްޗަށް ވ އާރަށް ކުއްޔަށް ދޫކުރުމުގެ މުއާމަލާތާއި ގުޅުވާ އުފުލާފައިވާ ދައުވާތައް ސާބިތުކޮށްދިނުމަށް ދައުލަތުގެ ފަރާތުން ހެކިންގެ ގޮތުގައި ހުށައަޅާފައިވާ މީދޫ ދާއިރާގެ މެމްބަރު އަދި އެމްޑީއޭގެ ރައީސް އަހުމަދު ސިޔާމާއި، އެމްޑިއޭގެ ނައިބު ރައީސް އަލީ މައުރޫފު، އެ މައްސަލައިގައި ހެކިބަސް ދޭން އިންކާރުކޮށްފި އެވެ.
ފުއްގިރި ކުއްޔަށް ދޫކުރުމުގެ މުއާމަލާތާއި ގުޅިގެން ރައީސް ޔާމިނުގެ އިތުރުން ދައުވާ އުފުލާފައިވާ އަހުމަދު ކުރިކް ރިޒާގެ މައްސަލަ އަނބުރާ ގެންގޮސް އަޑުއެހުންތައް ފަށާފައިވާއިރު، މިހާރު ކުރިއަށް ދަނީ ރައީސް ޔާމިނުގެ މައްޗަށް އުފުލާފައިވާ ދައުވާތަކާއި ގުޅޭ މައްސަލައިގެ އިތުރުން، ސަން ކޮންސްޓްރަކްޝަނާއި، ސަން އިންވެސްޓުމަންޓުގެ މައްޗަށް އުފުލާފައިވާ މަނީލޯންޑަރިންގެ ކުށުގެ ދައުވާ އެވެ.
އަދި މިހާރު އެ މައްސަލައިގައި ކުރިއަށް ދަނީ ދައުލަތުގެ ފަރާތުން ހުށައަޅާ ހެކިންގެ ހެކިބަސް ނެގުމުގެ މަރުހަލާއެވެ.
އެ މައްސަލައިގައި އާދިއްތަ ދުވަހު ބޭއްވި އަޑުއެހުމުގައި ވަނީ ދައުލަތުގެ ފަރާތުން ހުށައަޅާ 6 ހެކިންގެ ހެކިބަސް ނެގުމަށް ނިންމާފަ އެވެ. އެހެން ނަމަވެސް އޭގެ ތެރެއިން 4 ހެއްކެއް ވަނީ ފުއްގިރި މައްސަލައިގައި ދައުލަތާއި އެއްކޮޅަށް ހެކިބަސް ދޭން ބޭނުންނުވާކަމަށް ކޯޓަށް އަންގާފައެވެ.
އެގޮތުން މި މައްސަލައިގައި ދައުލަތުގެ ފަރާތުން ހެކިބަސް ދޭން ބޭނުންނުވާކަމަށް ސިޔާމާއި މައުރޫފު ވެސް ވަނީ ކޯޓަށް އަންގާފައެވެ. އަދި ދައުލަތުން ވަނީ އެ މީހުންގެ ހެކިބަސް ނަގަން ބޭނުންނުވާކަމަށް ވެސް ވިދާޅުވެފަ އެވެ.
އެދެބޭފުޅުންގެ އިތުރުން ކުރީގެ ޓޫރިޒަމް މިނިސްޓަރު އަހުމަދު އަދީބުގެ ޑްރައިވަރަކަށް މަސައްކަތް ކުރި މުހައްމަދު ހުސެއިން (އޮއިއްޓޭ) ވެސް މި މައްސަލާގައި ހެކިބަސް ދޭން ބޭނުން ނުވާ ކަމަށް ދައުލަތުން ފާހަގަކޮށްފައިވެ އެވެ.
އެހެންކަމުން ދެން ބާކީ އޮންނާނީ ދެ ހެކިންގެ ހެކިބަސް ނެގުމެވެ. އެ މީހުންގެ ހެކިބަސް ނެގުމަށް މާދަމާއަށް ކްރިމިނަލް ކޯޓުން ވަނީ އަޑުއެހުމެއް ތާވަލުކޮށްފަ އެވެ.
އެގޮތުން ދައުލަތުން ހުށައަޅާ މުހައްމަދު ޝިފާއު މިވަގުތު ހުރީ ސައުދީގެ ޖިއްދާގައި ކަމަށްވާތީ މާދަމާގެ އަޑުއެހުމުގައި އޭނާގެ ހެކިބަސް އޮންލައިންކޮށް ނެގޭނެ އިންތިޒާމު ހަމަޖައްސައިދިނުމަށް ދައުލަތުން ވަނީ އެދިފައެވެ.
އޭގެ އިތުރުން ދެން ދައުލަތުން ހުށައަޅާ އަނެއް ހެއްކަކީ ލަންކާގެ ރަށްވެއްސަކަށް ވެފައި، މިވަގުތު އޭނާ ހުރީ ލަންކާގައި ކަމަށްވާތީ، އޭނާގެ ހެކިބަސް ލަންކާގައި ހުންނަ ދިވެހި އެމްބަސީ މެދުވެރިކޮށް ހެކިބަސް ނެގޭނެ އިންތިޒާމު މާދާމާގެ އަޑުއެހުމުގައި ހަމަޖައިސައިދިނުމަށް ވެސް ދައުލަތުން ވަނީ އެދިފަ އެވެ.
Advertisement
This content is created and paid for by advertisers and does not involve Voice Journalists
